حلقة 80
#محمود_يحكي
اول مرة في حياتي نحس روحي تحطيت قدام الأمر الواقع .. وصلت لخانة إليك مكانش قدامي حل غير اني نخلي ولدي يمشي مع لمجانين .. حسيت قلبي وجعني علييه و عالحالة الي وصللها .. وزيد بعد هذاا الكل انا بش نعلن موتو .. بش نقول قدام الناس لكل انو ولدي مااات .. حتى ولو كان كذب .. انا هذا بش يخليني نخسر ولدي و سندي الي كنت معمل علييه .. كل مانخمم في هذا .. كل مانزيد ننقم علاهم .. كان موت ايهم بش يكون مزيف .. موتهم هوما بش يكون حقيقة .. والله ماندفنهم بيديا واحد واحد .. اهم حاجة تو اني نطمن على ايهم و نهربو .. و بعدها لحساب بش يبدا وقتو .. هوما بداو و انا بش نكمل ..
طلعت في الكرهبة وشديت ثنية السبيطار .. تو جمعة تعدات وهو في لبلاصة هاذي .. كان بمقدوري نخرجو من اليلة الأولى .. اما حبيت كل شي يبان طبيعي .. ماحبيت حد يشك فياا و لا فيه و نزيد نوحل في مشكلة اخرى .. تعدا لكثير و ما بقى شي .. نهار اخر و كل شي يوفى .. نهار اخر و ايهم يتحرر و يبعد من هناا .. نهار و الكابوس هذا بش يوفى بالنسبة ليناااا و يبدااا عنهم هومااا ..
اول ما وصلت هبطت من الكرهبة ودخلت بقيت نستنى فيه .. هزيت راسي مع الباب الي تحل .. ريتو كيفاه داخل وجهو تاعب .. يكركر في ساقيه بالسيف .. قعد قدامي يغزرلي ساكت .. دورت بعينيا عليه نحكي
" شبي حالتك هكاااا انت ؟"
تبسم على جنب يحكي " سوالك مش في محلو بابا .. حالتي هكااا خاطرني تعبت من لبلاصة هاذي .. الحبس ارحم .. كان نزيد جمعة اخرى هنااا بش تجي تلقاني هبلت بالرسمي "
قربتلو نحكي " نعرف انك تعبت .. سايي تحمل ليوم كهو .. غدوة كل شي بش يتحل و العملية بش تتنفذ "
حل عينيه فيا يحكي " بلحق بابا ؟ غدوة بش نخرج من هنااا ؟؟"
هزيتلو براسي اي نحكي " اي غدوة .. اما اسمعني كانحب حتى غلطة .. بش يجيك شكون و يهربك .. و بعدها بش تسافر فترة من هنااا .. حتى الأوضاع تهدى ..و بعدها نخممو في خطوتنا الجاية "
عض على شفايفو يحكي " بابا .. انجم نشوف امي قبل .. توحشتها والله "
عديت بيديا على وجهي نحكي " لااا ايهم ماتنجمش .. اصبر و بعد هي تو تخلط علييك ماتخافش "
هزلي براسو باهي يحكي " باهي بابا .. ميسالش .. المهم خرجوني من هنااا والله تعبت "
قمت من قدامو نحكي " عدي الليلة و غدوة انشاالله ماتباتش هنااا .. تهني "
قام ووقف قدامي يحكي " و هوما بابا؟ بش تخلاهم هكاكا من غير حساب .. الي صار فياا هذا بش يتعدا بالساهل ؟؟"
غزرتلو على جنب نحكي " الأمور هاذي ماتتدخلش فيهاا .. انا نعرف شنعمل .. غير انت رد بالك على روحك "
شفتو كيف قرب مني و عنقني يحكي " عيشك بابا .. ريي يخليك ليااا "
بقيت واقف نسمع فيه .. على قد ما حبيت نحضنو اما ما نجمتش نهز حتى يدي .. رغم حبي ليه اما مازلت مغزل منو و من عملتو .. بعدتو عليا نحكي " انا بش نمشي تو .. كيف ماوصيتك غلطة لااا .. و الي بش يقولهولك الراجل انت بش تعملو بالكلمة "
هزلي براسو باهي و خرج .. خرجت وراه و طلعت في الكرهبة .. خذيت التاليفون و حطيت النومرو .. اول ما سمعت صوتو .. تكلمت
" نحب كل شي يوفى غدوة .. العملية لازم تصير بدقة .... اي و ميسالش اقتلو كم مريض هكاكا لحكاية تبان حقيقية اكثر "
كملت كلامي و علقت علييه .. رميت التاليفون و تكيت براسي عالكرسي .. بقيت كل مرة نخمم في حاجة حتى فقت من سرحتي على صوت التاليفون الي رجع ينوقز .. تبسمت كيف ريت النومرو .. هزيت عليه نحكي
" شفما ؟؟ ..... متاااكد ؟؟ ....... مالا نفذ لحكاية هاذي الليلة .. مانحب شي يفسد عليااا خطتي .. الليلة نحبك تكلمني و تقلي الي كل شي وفااا "
رجعت علقت عليه و خدمت الكرهبة .. ثنية كاملة و انا نخمم في الخبر الي انجم نسمعو الليلة .. عمري لا تمنيت نوصل لهنااا .. اما هذا الي لازم يصير .. بش الواحد يربح لازم يضحي .. و أهم حاجة لازمو يقلع قلبو و يحط في بلاصتو حجرة .. لازمو يدفن اي احساس يراودو .. و انا هكااا عملت .. الي بش يصير الليلة خليه يصير ..
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
