الحلقة الثالثة :
قمر تحكي
حليت عينيا في بلاصة فارغة و ظلمة .. حاولت نقوم و نتحرك اما ما نجمتش وجيعة حاستها في حزامي تموت فيا .. اما وجيعة قلبي كانت أقوى منها.
لحظتها كل شي جاء قدام عينيا .. تفكرت فرحتي نهار كامل الي في لحظة تقلبت لمأساة....
تفكرت يحيى و امي، تفكرت حياتي الي تدمرت .. تفكرت الزوز الي نهشولي بدني و لحمي و خلوني ملوحة، تفكرت كلامهم الي يقزز .. تفكرت شنية عملو فيا و كيفاه قتلوني بالحياة ..
غمضت عينيا بالقوي و حاولت نقوم نستر روحي اما ما نجمتش بدني خاني، راسي رزين و عينيا نار شاعلة فيها .. أصلا نتمنى اني ما نقومش .. علاش بش نقوم و كيفاه !! كيفاه بش نواجه يحيى كيفاه بش نغزر في عينيه و نحكيلو شصار و شعملو في قميرتو .. كيفاه بش نواجه امي كيفاه بش تتحمل الي عملوه في بنتها وحيدتها!!!!! كيفاه انا بش نغزر لروحي في المراية و بصمتهم بش تبقى في بدني حياتي الكل ..
ياريت الوقت يرجع بساعة كهو.. ساعة برك قادرة انها تمحي هذا الكل و نرجع 'قمر' الطفلة الي كان كل همها انها ترى حبيبها 'يحيى' بعد غياب اشهرة ..
فقت من سرحتي على صوت مرا قاعدة تقربلي
" شبي بنتي .. شصارلك!! يا شومي شعملو فيك!! شنية هالدم هذا !!
على كلمتها لخرا هبطت دمعة من عيني حرقتلي قلبي قبل ما تحرق خدي .. تفكرت الدم الي خلوه عليا بعد ما خذاو أغلى حاجة فيا .. ما نجمتش نجاوبها و غمضت عينيا و مافقت بشي .. و في لحظتها تمنيت اني نكون مت و وفى كل شي قبل ما يبدأ
حسيت بيد حنينة تلعب بشعري .. زعمة انا مازلت راقدة و امي تفيق فيا تمسح على شعري كالعادة .. زعمة الي عشتو الكل كان مجرد كابوس و مشى على روحو .. اما كيفاه كابوس و انا نحس في لمستهم لتو على لحمي لتو ريحتهم في خشمي صوتهم وكلامهم لتو نسمع فيه .. خيالهم لتو بين عينيا .. حسيت عينيا رزنو و مانجمتش نحلهم حتى دموعي وحلو بين شفراتي و ماهبطوش زادو خنقوني .. نسمع في صوت حنين يتلكم فكرني فصوت حسنة
" سملة على بنتي .. يهلكلم ربي "
حليت عينيا بسيف نلقاها تغزرلي بعينين مدمعمة و غزرة كلها شفقة خلتني نسخف على روحي .. حبيت نتلكم اما نلقى صوتي خاني .. سبقتني هيا و تكلمت
" انا خالتك رفيقة .. لقيتك لبارح و جبتك لسبيطار .. ماتخافش انا معاك احسبني كيف امك .. ارقد تو ارتاح هاني بجنبك "
" يـ يـح يحيى وينو " خرجت اسمو و حاسيت روحي خرجت معاه و انا نتخيل فيه تو يرا فيا في الحالة هاذي
" ما تخمم في شي تو ارتاح و تو داركم يجيو و يحيى زادة "
حسيت بدمعة هبطت مني و تكلمت بسيف " خـ خايفة ، نـ نحب نموت "
مسحتلي دمعتي و هبطت دمعة من عيناها هي تلكم فيا بصوت حنين ذوبلي قلبي " اشششش ما تقولش هكا .. مش انت الي لازم تموت الي عمل هكا لازم يموت .. انت لازمك تكون قوية و تاقف تأخذ حقك .. انا معاك مهما يصير بش ناقف مع بنتي "
غمضت عينيا على كلامها الي رتحني شوي .. جاء يحيى في بالي راو وصل تو راو روح اما مالقانيش .. امي راي خايفة عليا .. ياريتني سمعت كلام يحيى و ما مشيتش .. ما نعرفش قداه تعدا و قت و انا بين نومين نحب نرقد اما مانجمتش كل مل نغمض عينيا نراهم و خوفي يكبر ..
" مادموازال لباس شنية تحس في روحك "
حليت عينيا نلقي طبيبة بجنبي و معاها خالتي رفيقة .. ما جوبتهاش أصلا ما لقيت ما نجاوب .. لاباس ؟؟؟ كيفاه لباس و انا هكا و انا ملوحة شوليقة بعيدة على عايلتي .. كيفاه لباس و انا وحدة مغتصبة نهشو لحمها رماوها ومشاو
" مادموازال .. لازم تتكلم لازم تحكي لشرطة الي صارلك الكل "
على كلمتها لخرا هزيت راسي مربوثة نتكلم "لا لا لا مانحبش نحب على يحيى نحب على امي امان امان مانحب حد اخر "
عنقتني خالتي رفيقة تتكلم " باهي باهي ماتخافش .. قلي وين داركم .. عندك نومرو يحيى و لا امك ؟؟"
" نسكن في الحومة الي وين المرشي الكبير .. أي حافظة النومرو اما .."
" اما شنية ؟؟؟"
" خايفة .. كيفاه بش نواجهم ؟؟؟ خايفة ياربي خايفة .. مستحيل يسامحوني مستحيل . اه ياربي هزني " و ليت نصيح و نضرب في وجهي مالخوف الي حسيتو .. اللحظة الي خايفة منها جات و يحيى بش يعرف كل شي ..
خالتي رفيقة و الطبيبة يهديو فيا و انا مش حاسة بشي قدام عينيا كان تصويرة يحيى..
VOUS LISEZ
#ليس_ذنبي ❤️🔥
Dragoste" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
