الحلقة العاشرة
#ايهم يحكي
حليت عينيا على صوت امي تصيح .. مفهمتش شفما اول مرة نسمع امي تصيح و تعيط بالطريقة هاذي .. هزيت روحي فيسع لبست مريولي و هبطت نجري نحب نعرف شصاير .. هبطت في الدروج نرى في امي واقفة على عصابها و تصيح و تحكي بيداها و معاها مرا و طفلة عاطيني بظهرهم معرافتهمش شكون .. كملت هبطت وقفني صوت امي " جايين تتبلاو على ولدي .. واحدة الله اعلم منين جاية تحب تلصق عملتها في ولدي "
حسيت روحي جمدت و الدم نشح في عروقي ملي سمعتو .. زعمة هي جات؟ زعمة عرفتني و تفكرتني ؟.. زعمة لحكاية بش تتفضح ؟
فقت من سرحتي على صوت امي الي غزرتلي و تتكلم " هاو ايهم جاء .. ايجا يا بابا شوف هالمصيبة الي جاتنا عالصباح "
على كلمتها تلفتولي الزوز فرد وقت .. حليت عينيا و بلعت ريقي الي حسيتو هبط شوك في حلقي حسيت راسي رزن، بدنى رعش من غزرتها ليا .. مانعرفش قداه تعدا وقت واحنا نغزرو لبعضنا كانو الوقت وقف في الحظة هذيكا.. اللحظة الي رجعتني للجمعة لتالي وفكرتني ف عملتي .. زدت حليت عينيا و بقيت نثبت فيها.. كانت واقفة وراء لمرا الي معاها متحامية بيها كانت كيف القطوسة الصغيرة ترعش.. عيناها تلمع بالدموع.. الخوف باين على وجهها كانت شادة روحها واقفة بسيف .. هزت راسها و بقات تغزرلي.. غزرة كانت تلوم فيا بيها .. بعدت من حذا المرا و بقات تقدم ناحيتي .. كل ما هيا تقدم كل ما قلبي صوت دقاتو تقوى .. حسيت ساقيا بش يخونوني و نطيح في القاعة ..ريحتها وصلتني قبل ماتوصلني هيا .. نفس الريحة الي مانسيتهاش ريحة بنينة عششت في خشمي.. وصلت حذايا و هزت راسها معايا دورت عيناها على وجهي .. نفسهم العينين الشهل الي مانسيتهمش عينين كلهم براءة و خوف .. عديت بعينيا على وجهها نغزر لضربات الي على خدها و جبينها .. لتراس الي بقاو في رقبتها و شفيفها .. رغم تعدا الوقت اما بقاو ماتنحوش .. بقاو بش يفكروني فعملتي الي ماتتغفرش .. بقاو بش تواجهني باهم و تقولي شوف انت شعملت .. شوف بصمتك الي بقات مطبوعة فيا..
غمضت عينيا على صوت شهقتها الي ماشية و تعلى.. دموعها الهابطين كانو كافين بش يفشلوني اكثر ..
ميلت راسها و ذبلت عينيها تكلمت بصوت يرعش " علاه ؟ علاه عملت فيا هكا ؟؟ "
كبست عالبونية متاعي و غمضت عينيا و رجعت حليتهم حسيت روحي عاجز بش نتكلم و نحكي .. سؤالها ماعنديش ليه إجابة .. عملتي ماعندهاش مبرر
فقت من سرحتي كيف زادت قربتلي و شدتني من مريولي تخض فيا و تصيح
" علاااااه ؟ علاه دمرتوني هكا .. شعملتلكم تكلم .. انت انت سبب في الي عايشتو تو.. علاه قتلتوني هكا.. علااااه تكلم "
بقات تصيح و تعيط و انا واقف حركة لا بقيت كان نغزر لعيناها غزرتها الي كانت كيف السكينة في قلبي .. طاحت على ركايبها تصيح و تعيط .. حاولت نشدها و نوقفها اما منعتني المرا الي معاها .. وقفتها و وقفت معاها غزرتلي في عينيا تتكلم " ريت عملتك وين وصلت الطفلة .. والله ما نحاسبك على كل دمعة هبطتها بنتي .. ما نخليك تطلب مني الرحمة وما تلقاهاش يا ايهم .. ما نخليك تتمنى الموت انت و الي عمل معاك العملة هاذي "
عطاوني بظهرهم و مشاو وين امي .. امي الي بقات تغزرلي و تستنى ف أي ردة فعل مني تستنى فيا نكذبهم و نبرأ روحي من الكلام الي سمعتو .. اما انا كنت حاس روحي ف دنيا أخرى رغم قوتي حسيت روحي ضعفت حسيت بالخوف مكني .. حسيت بدموعي لأول مرة بش يخونوني و يهبطو
هزيت راسي على صوت امي " ولدي خاطيه .. برا ارمي بلاك علي عمل العملة هاذي .. جاية تسيب في وسخك علينا "
قربت منها لمرا و هزت صبعها في وجهها تتكلم " رد بالك تزيد كلمة أخرى على بنتي .. بنتي اشرف منكم و من ولدك لمسخ .. ولدك هو مولا العملة .. وصدقني مانخليه يتحاسب"
ضحكت امي تتكلم " هههه شكونك انت بش تهددني اه ؟ شكونك واحدة جاية مالشارع ماتسوى شي .. تعرف قادم شكون واقفة بكلمة مني ندمرك انت و بنتك .."
" نعرف .. نعرف بلقدا انا قدام شكون واقفة .. قدام عيلة ظالمة اما صدقني مانيش خايفة منكم و حق بنتي بش نخرجو من عينيكم "
تكلمت امي بصوت يرعش ماالغش " كان عند ريح .. جايتني تحبني نصدقك .. ههه ولدي مستحيل يعمل هكا مش بش يغزر لطفلة كيف بنتك .. و تو كان كملت كلامك اخرج و وجهك انت و بنتك مانحبش نراهم"
" هانا ماشين و بيناتنا المحاكم .. اه و حقها اسأل ولدك عالشركة متاعو ويني ظاهرلي ضيعها "
على كلمتها لخرى طحت قعدة في الدروج و هبطت راسي بين ركايبي مصدقتش الي سمعتو .. عندي مدة وانا نلوج علاها الشركة في بالي نسيتها ف أمريكيا .. ما تصورتش روحي نكون طيحتها غادي .. لحظتها حسيت روحي تدمرت و كل شي وفا ..
سمعت كان صوت الباب تسكر و امي الي قربتلي هزتلي راسي و دورت عينيها على وجهي تسال فيا بيهم .. طبست قعدت قدامي و حطت يداها على وجهي تتكلم " الي سمعتو كذب مش هكا؟؟ انت خطيك "
بقيت نغزرلها مش عارف شبش نتكلم .. تهزيت و تحطيت على صوتها الي علا " حل فمك تكلم .. انت مستحيل تكون عملت هكا .. مستحيل تكون اغتصبت الطفلة "
هبطت دمعة من عيني تجري هاذي اول مرة نبكي فيها من وقت طويل تكلمت بصوت مخنوق
" سـ سامحني امي "
هزت يداها و عطاتني كف على قوت جهدها شدتلي وجهي بالقوي تتلكم " شعملت .. انت شعملت .. كيفاه تعمل هكا كيفاه .. ما خممتش فينا ما خممتش في شنوة ينجم يصير من وراء عملتك اه .. ماخممتش في بوك شبش يعمل فيك كان يسمع"
قعدت جنبي و هبطت راسها تحكي بالغصة " كيفاه بش نخرجو مالمصيبة هاذي .. كان يسمع بوك ما يقتلك يا ايهم .. كان الحكاية توصل للمحاكم و نتفضحو .. كيفاه بش نقابلو العباد .. و زيد في يديهم الشركة متاعك يابهيم .. دليل كافي بش يورطوك بيه .. "
قحرتلي تتلكم " وقتاه صارت الحكاية وو ين ؟"
غمضت عينيا.. على قد ما حبيت نفسخ النهار هذاكا و نكمل كانو ماصار شي .. نلقى روحي رجعت ليه بكامل تفاصيلو .. حاولت نجمع الحروف و نتكلم " ا ا اول ن نهار روحت فييه .. ا انا و ورريان "
حلت عيناها فيا و تكلمت " ريان معاك ؟؟؟؟؟؟ هو معاك في الحكااية.. يا والله مصيبة .. يا والله مصيبة"
حسيت الدنيا ظلامت في عينيا صحت نتكلم "أي انا وياه الي عملنا هكاك .. أي احنا اغتصبنا الطفلة.. الي قالوه صحيح " قمت من الدروج بقيت نمشي و نجي كالمهبول عديت يديا على وجي و خذيت نفس نتكلم " ما لازمش لحكاية تخرج .. لازمهم يسكتو .. لازمهم يسكتو " طبست على ركايبي قدام امي و طرشقت بالبكا نبكي و نحكي " عاوني امي امان .. راني خايف .. عاوني امان .. القا حل .. سكتهم باي طريقة عاوني امان ما تخليني وحدي "
حطت يداها على راسي تمسح عليا " باهي اسكت .. مانيش بش نخليك وحدك بالطبيعة .. اكيد فما حل.. اما بوك ما لازموش يسمع .. لازمنا نحلو لحكاية هاذي قبل ما يرجع مالسفر "
هزيت عينيا فيها نحكي " شنوة بش نعملو؟؟ "
خذات نفس و غزرتلي تحكي " بش نكلم ليث نقولو يجي .. لازم نلقاو حل بينات بعضنا و ليث تو ياقف معانا تعرفو يعوض بوك في كل شي .. انا و ليث تو نتصرفو .. انت انسى تو و خلي كل لحكاية هاذي عليا انا"
حطيت راسي على حجر امي عدات يديها تمسح على شعري تهدي فيا .. غمضت عينيا تعدا قدامي خيالها و هي تصيح .. عارف انو الحكاية ما وقفتش هنا و الي جاي اصعب.. عارف انو تحلت قدامي حرب.. حرب خايف لانطلع منها خاسر .. خايف لا قوتي المرة هاذي ما تكونش كافية قدام الي بش نواجه.
VOUS LISEZ
#ليس_ذنبي ❤️🔥
Romance" #ليس_ذنبي" ❤️🔥 أنتمي لك، في كل مرة تحاول الحياة هزيمتي و اختبار صبري ألجأ إليك أحتمي بك و أعرف بأن لا شيء هنا قادر على احتواء كل هذا الخوف غيرك أثق بك كما لم أفعل في حياتي يومًا و كلي يقين بأنك الوحيد الذي لن يخذلني، أحبني معك لأنك أنا وما دون ذ...
