معذبني غرامك ( قصة جريئة)

02

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 2

مغنية حدرات راسها و زادت في لبكا على حالها و حليمة ما سكتاتش لسانها كيطلق غير بالسم : كتنخصي يا لعيفة دلبنات كتنخصصي... نهار نهار و نتي كتزوقي بتخبية عليا و تهبطي لجنان نتي وديك العودة لمسرجة زعما عييتي ما دوري بالعربي خوها و واااالو يا لهبيلة ما طاحش ليك الفيلاج كااامل جاب خبارك تا حد ما بقا باغيك لدارو و لديوانو يا لهيشة قالك لعكر قال نوضي نوضي جمعي راسك و جمعي عليا خناينك ... و دوزي هبطي لكوزينة ديري شي حاجة فحياتك

لاحت ليها هاد الهضرة كيف السم كطعن.. و خرجات و خلاتها مقهورة محرمة عليها العيشة خانقا فيها النفس كلسات في الأرض ما بيدها حيلة غير كتبكي على الزهر لي ما عندهاش...

تعاشات لعشية و طاح الضلام تجمعو دار القايد على الطبلة دالماكلة واقفا عليهم حليمة كتخدمهم... كان ابراهيم كياكل تا كيتفكرها ما بانتش ليه كتعاون معا وخالقاها معاهم و حن حن و شاف فحليمة و نطق : حليمة فين هي مغنية ..

حليمة بلقات فيه عينيها كدور فيهم و تبلع ريقها: راها غضبانة فلبيت اسي ابراهيم

ابراهيم عقد حجبانو :و علاش

حليمة مصمصات الحامض بين شفايفها و نطقات : لقيت عندها عرام لقجاقل ها لعكورة ها لكحولات و هي باقي صغيرة على داك الشي

ابراهيم خنزر فيها : ما بغاش يهديك ربي على ديك البنت احليمة ؟

حليمة: ولكن اسيدي ..

ابراهيم قاطعها بحدة : مكاين لا سيدي لا هادي لا هاديك.. ديك شي انا كنجيب ليها منو و تا الحاجة و جهان كيعطيوها... و ما كدير تا حاجة غلط بنت فسنها طبيعي خاص يكون عندها ديك شي ..

حليمة حدرات راسها كتصرط فالبيض و نطقات : و ديك شي اسيدي كيديروه غير لملقطات

الحاجة علات فيها حاجبها : يااااك احليمة و هي انا و بنتي ملقطات ياك لي كنجيبو ليها ديك شي

حليمة عضات على لسانها من زلاتو و نطقات متذاركة لموضوع: لا حاااشة ا لالة لحاجة اللسان ما فيه عضم

الحاجة نطقات بشيء من الحدة : اوا مين ما فيهم عضم ولطيه بين سنانك و سيري غبري من قدامي ..

مشات حليمة كتعتر في جلايلها ... و ناض ابراهيم لعند مغنية .. ما طاب عليه عشا وهو عارف ليتيمة مقهورة و بايتا بلاعشا كيحسبها بحال وحدة من خوتو كبرات مع خواتاتو مات باها و خوتها و هي صغيرة و من تماك و هي و معا فرد من العائلة..

دق باب بيتها هي مها : مغنية انا عزيزك نقدر ندخل

مغنية كانت متكيا فوق الناموسية وجها منفوخ بلبكا ما سكتاتش من قبيلا لدرجة داها النعاس و هي كتبكي و فاقت و رجعات كتبكي... تقادات في الكلسة كتمسح في دموعها و التخصصية كتطلع ليها : دخل اعزيزي دخل

دخل كيف قالت ليه كيشوف فيها عينيها منفوووخين بلبكا و الحزن مذبل ملامحها بقاات فيه بزاااف : مغنية...

مغنية نطقات بصوت ضعيف كتهبط فالبيجامة ديالها : نعام اعزيزي

كلس حداها و نطق: حبسي من لبكا لله يرضي عليك و نوضي وجدي دوزانك دالحمام باش تمشي مع العروسة لحمام كي مبروكرامية و انا غدا بيدي غنهبط لمدينة و نوصي ليك جهان تاخدو و نجيبو ليك

مغنية تبسمات بحزن وسط دموعها و نطقات: بلاش اعزيزي ما تعدبش راسك راه مي غير غتلقاه غتخصرو كي دارت ليا ل لاخر

ابراهيم حرك راسو بلا و طبطب على كثفها : مك ضربيها على حسابي لا ولات قهراتك و لا هضرات معاك غيكون حسابها معايا يالله نوضي المرضية داب التعشاي العرس ما بقا ليه والو و شحال و نتي كتوجدي ليه مع منانة يالله نوضي

مغنية تبسمات و حركات راسها بواخا و ناضت كتمسح في دموعها و خرجات معاه تعشات و مها كتحزر فيها و تقرب ليها لماكلة واخا قاسية عليها ولكن ما عندهاش العين لي تغيرها...

نهار جديد ... و هاد المرة في حمام لعروسة... كلسا مغنية متحك لمنانة في السخون و لبنات لعزبات دايرين بيها مرة يعشقو مرة يطبلو و يغنيو تا سالاو حمام لعروس خرجو تقريبا كلهم بقات غير منانة مع مغنية كتعاونها تا هي

منانة كتحك ليها ضهرها : اجي غتجي ليوم للحنة

مغنية تنهدات : لاااا خلاتني حليمة اساطة راك عارفاها

منانة : ولله تا نقول ل ابراهيم يصفطك زطااااطة عليها

مغنية دارت لعندها و نطقات بحماس : تا هادا نضار نيت راه عزيزي هو لي كيخرج فيها ... اجي و العربي غيكون بعدا

منانة حركات راسها بالإجاب : ضروووري يا ختي غيكون غا اجي و جي مقاادة و مصاااوبة باش انا نمشي نبلاصيك فدار لقايد و نتي بلاصبني فدارنا

نغنية تنهدات مغمضا عنيها و كتبسم: من فمو لسيدي ربي و يشوف فيا العربي شويا ... لفيلاج كامل عارفيني كحماق عليه غا هو لي ما عارفش

منانة كتمشط ليها شعرها كدير ليها لفال: هانتي انا كنمشط ليك هادا غا بوحديتو فاااال يا ختي ... كيفما عاونتيني نميل براهيم و نطيحو فيااااا تا انا ما غنمشي تا نزوجك لخويا و ندردك فعرسك

مغنية عضات على شفايفها و قلبها كيدق لين ضروعها : مصاااب ياختي مصاااب ولكن عزيزي براهيم ماشي بحال العربي .. العربي صعييييب تعقلي فاش كان كيشدنا كتعكرو في الجنان ياك كان يسلخنا بجوووج

منانة : هاديك راه غا دمو حامي و مغيار...

تنهدات نغنية كتحس بقلبها كيفرررفررر بالفرحة و هي كتفكر فيه كتسطا عليه من لي كانت صغييييرة لفيلاج كامل عارف مغنية كتبغي لعربي و هو ما مسوقش ليها ... و هي هادشي لي كيقـ.. ـتلها ولكن هي دايراه فبالها كي طيحال منانة ابراهيم القاااايد مول الأراضي و الفيرمات و المطحانات و الديور فلمدينة تا هي غطيح العربي و تزوج بيه ...