معذبني غرامك ( قصة جريئة)

22

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 22

فالصالون ..

جالسة الحاجة و حليمة و ابراهيم .. مع العربي و بن عيسى ..

كان جو زوين كيسولو فبعضياتهم و يباركو لبعضياتهم و الصواب و الآداب و مني منك فالهضرة تا تنطق بن عيسى: بنتي مغنية فينها ..

حليمة تبسمات و نطقات بخجل : را هي فالكوزبنة واقفا على لعشا .. انمشي تعيط ليها ..

بن عيسى حرك راسو بالإجاب و هي مشات لكوزينة تعيط ليها ...

غير دارت مع الدورة د الصالون و هي تقفز و خرجات عينيها فيهم بجوجات مرادفات على الحيط حاطين ودنهم ..

حليمة كتنطق بهمس : اويلي طيرتوها مني خلعة يا لحلاقم..

مغنية كدير ليها اشارة بصبعها على فمها باش تسكت ما تفضحهمش .. و منانة جراتها من دراعها كتهمس ليها : شششش ويلي شوهتينا اخالتي ..

دخلوها لكوزينة عاد رفعو صوتهم و خداو راحتهم ..

طلعاتهم و نزلاتهم حليمة و نطقات : اوا الله يخليها قاعيدة فيكم ما بغاش يعفو عليكم ربي من تصنات اويلي ..

مغنية بقات ساكتة و حادرا راسها كتفكد فطنجرتها و منانة لي نطقات: و ما فيها باس اخالتي حليمة نرضيو فضولنا راه خطيبها هاداك...

حليمة : وكون خرج شي حد غيري .. كون خرج هو مثلا يلقاكم مرادفات حاطين ودنكم اش غيقول عليكم ..

منانة طرطقات ليها بالضحك فوجها و نطقات : لاه هو عاد غيلقانا .. ما مرة ما جوج حصلنا حاطين ودنا فاش جا براهيم دوا فيا و خطبتي هو و الحاجة ... و بزاااف ..

حليمة تنهدات و هزات واحد الكرسي كان تماك جاسات فوقو و نطقات : قادي حالتك و دوزي دخلي تسلمي على ناسك امغنية يالله ...

مغنية حركات راسها بواخا و نطقات : و يالله دخلي معايا تا نتي امي..

حليمة وقفات : و التقلية ..

مغنية : راه وجدات و طفيت عليها .. نسلم عليهم و نجيو نحطو ...

حليمة هزات براسها و نطقات : يالله زيدو قدامي ..

و ساقتهم قدامها غاديا منانة كقاد فمغنية و تزعم فيها تا دخلو لصالون ..

مغنية كان قلبها علين يطيح بين رجليها من قوة التوتر... يديها عراقو عليها .. هزات عينيها كتقلب عليه فينو و هو يبان ليها جالس حدا باه .. بالباسو العادي تيشورت فلكحل و سروال فنفس اللون .. لحيتو طوالت على آخر مرة شافتو .. كانت باينا فيه تسكسيفا د العيد غير من حسانتو لي باقي جديدة ...

قدرات تلمح هادشي بالتقطع و هي كتسلم على بن عيسى و تبارك ليه العيد و ترمي العين مرة مرة لهاداك لي مين دخلات ما دار تا رد فعل غير انه تقاد فالجلسة و شاف فيها ...

كملات من السلام مع بن عيسى و شافت فيه محتارة واش تمد ليه يديها يسلم عليها ولا هو ما كيسلمش.. ما فكراتش بزاف و مدات ليه يديها و نطقات برقة : مبروك عيدك ..

#يتبعععع ....