معذبني غرامك ( قصة جريئة)

79

         مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

                                 Part : 79

الليلة الموالية ... كان واقف قدام لمراية كيقاد لحيتو و يرش من العطر ديالو ... و عينو مرة  مرة كتمشي لهاديك لي وراه جالسة و الحزن و الحزن مخيم على ملامح وجها ..  عنيها منفرخين باينا فيها بكات و بردات ..

دار عندها كيرمقها بنضرات هاديين و نطق بخشونة : نوضي لبسي عليك نديك لعند مك يالله ..

مغنية هزات فيه عينيها مغرغين بالدموع وونطقات : لاء ما بقيتش بغيت ..

العربي زفر بجهد و نطق بصرامة :  تهزي باراكا من قصوحية الراس ..

مغنية هزات عليه كثفهى و قلبات وجها كتمسح فدموعها و نطقات:  ما بغيتش خرجات من خاطري ..

العربي دوز يديه على وجهو و نطق بنفاد صبر : صبر ايوب يا رب ..صبر ايوب .. تكعدي يا هاد لمرا ...

بقات ساكتة و تا هو سكت .. حدو هز جلابتها حطها ليها فحجرها و نطق قبلما يخرج : كنتسناك برا .. طلقي راسك ...

مغنية طولات فيه الشوفة و قلبها مغير ديال بصح ... علاش زعما فاش رغباتو يديها قبيلا قال ليها لا و قمعها و بكاها و دابا تا رشقات ليه و عاد جاتو على الكانة عاد قبل يديها ...

شافت حتى عيات و ناضت على سعدها و وعدها لبسات عليها و قادات زيفها ... و حمرات حنيكاتها و شفايفها بتينت خفيف .. و رموشها اصلا ما كتحتاجش ليهم مسكارة حيت طواال..

رشات من عطرها و هزات صويك خفيف فيديها و بليغة فرجيلاتها و خرجات .. ما كانتش راضية توري لشي حد اسرار بيت زوجيتها .. كانت قادرة تجمع شتاتها و قدام الناس تمثل انها عايشة مع العربي الحياة المثالية .. لي ناس كيحسدوها عليها ..

خرجات لعندوهم لبرا .. لقاتهم راكبين فالطوموبيل.. العربي غير شم ريحتها و هو يهز عينيه فيها .. كانت كيف العادة مقادة راسها و مرتبة حالتها لي شافها ما يقولش هادي لي لعشية كلها و هي كتبكي و مقهورة..

تنهد و ديمارا فاش ركبات و قلع غادي يحطها هي فدار القايد .. عاد يترفقو هوما وبراهيم يمشيو لصدقة ..
دازو ليام ... و منانة دخلات فشهرها .. كرشها تنفخات بزاااف و هبطات .. كانت جالسة هي و الحاجة فالصالون ... كيتهاودو ..

الحاجة : عرفتي يا بنتي لا تصاب نيشان عندك ولد.. غناك الله ..

منانة ضحكات كتدوز بيدها على كرشها : و راه ولد اخالتي راه شفناها عند الطبيب..