115

1K 46 2

بواسطة Swispicy

بقلم Swispicy

..
مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

‏ Part : 115

فدار القايد .. نزلات من بيتها لابسا عليها و ملبسا لولدها محمد .. و مشات عند الحاجة نيشان .. باست ليها يدها و نطقات : نهارك مبروك اخالتي ..

الحاجة كطلع فيها و تنزل : الله يبارك فيك ابنتي .. لاين بيها ...

منانة : با مريض بزاف اخالتي و بغا يشوفني و قلبي مقبوووط عليا بزاف .. عافاك عيطي لبراهيم نتي و رغبيه يجي يدينا عافاك ...

الحاجة حركات تراسها : واخا ابنتي ..

و سدات طيليفونها و مداتو ليها : دوزي ليا نمرتي ابنتي ..

شدات عليها منانة الطيليفون و دوزاتها ليها بحكم هي ما قارياش.. حطات الطيليفون على ودنها .. تا تفتح الخط وسمعات صوت ابراهيم : الو الحاجة ..

الحاجة : الو ولدي .. كي قيال كلشي بيخير ..

ابراهيم واقف على الخدامة فالفيرمة دلعنب و ملامحو كلها جدية و صرامة : الحمد الله الحاجة .. والو باس غا عيطتي ؟

الحاجة : لا اولدي .. جي الله يرضي عليك دينا نشوفو نسيبك اسي بن عيسى راه مريييض شاد لفراش و بغا يشوف بنتو ..

ابراهيم : واخا وجدو واسكم هانا دابا غنكون عندكم ..

الحاجة : صافي اولدي الله يكون منك ...

قطعات معاه و شافت فمنانة لي دبالت و ما بقاتش داياها فراسها .. وجها عمر بلحبوب.. و لكلف دلحمالة رجع بان ليها فوجها حيت ما كملاتش ليه تريتمون.. : بنتي منانة ..شوفي الله يرضي عليك .. رجعي ديها فحالتك شويا و حيدي عليا هاد الحزن شويا .. شوفي حالتك كيف ولات ..

منانة تنهدات بعمق و شاف فيها و نطقات بحزن : لمن غنتزوق اخالتي .. ياك غا الراجل وهجر بيتو و هجر فراشي .. عزل عليا كاع ...

الحاجة : دابا يرطاب ابنتي و يرجع لحجرك دابا تشوفي .. هاكا كان باه الله يرحمو .. على قلة من هي مسألة ينوض يقطع لغايا و يهجر فراشي .. كنخليه على خاطرو .. ليوم غدا ليوم غدا تا كيرطاب راسو فاس كياكلو و يجي لعندي ..

ضحكات منانة فوق نفسها و نطقات : اوا مصاب الحاجة مصاب ..

الحاجة : و يكون خير .. يكون خير ..

بقاو مهاودين .. تا دخل عليهم ابراهيم .. كيف العادة .. ما شافش تا لجهة منانة .. و حتى ولدو فاش كيشوفها هي شاداه ما كيقربش ليه .. عاطيها النخال و كأنها ما كايناش .. مخليها كتتحرق و تتعذب من هجرو ليها ..

وصلهم لدار بن عيسى .. دخل هو سلم عليه و على العربي .. و شافو كيف بقا .. و خرج رجع لدار.. مخلي الحاجة و منانة معاهم ..

دخل ديريكت لبيتو .. ما حدها ما كايناش ..خدا دوش خفا زربا و خرج لبس عليه ..وقف قدام لمراية كيقاد فالكول و الصضايف د لاشوميز ديالو .. و هو يضق عينيه كيدقق فإنعكاس لوسادة دالجهة فين كينعس فلمراية ..

اثار انتباهو.. واحد الطرف ديال الورق فشي شكل طال من واحد القنت صغيور .. قطب حواجبو و فضولو داه لداك الشي يشوف اش هو ..

حل السنسلة و جبدو .. كيدورو بين يديه هاكداك ورقة بحالا قديمة و معقودة بحبل.. ورقة عرفها مزياااان اول ما هزها بين يديه قبل كاعما يفتحها... زيييير عليها فقبضة يدو مزيييير على فكو و نطق بغيض: وصلنا السحور كاع ابنت الجنانات...

#يتبعععع ..✨