معذبني غرامك ( قصة جريئة)

103

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

‏ Part : 103

صبح الصباح و على برا من الكوميساريا... وقف بطوموبيلتو.. و هو يبان ليه بن عيسى جاس فالدروج ديال ديك الكوميساريا والمرض و لعيا كان واضح على ملامح وجهو و هيئتو..

تنهد بقا فيه بزاف راجل كبير و تكرفص ما حيلتو لعروستو لي فالسبيطار ولا ولدو لي مشدود .. موالف رمضان كولو كيقضيه فالجامع يختم القرآن جوج د المرات .. و دابا شوف فين تلات بيه..

تنهد و نزل لعندو : سي بن عيسى .. يالله بحالك من هنا ..

بن عيسى هز فيه راسو و نطق : غير خليني اولدي ... راهم غيخرجو يديوه لوكيل الملك نشوفو اولدي عاد نمشي ..

ابراهيم جلس حداها : غير نوض اسي بن عيسى راه دويت مع المحامي قلت ليه زيد عطل شويا علاما تخرج مغنية و نرغبوها تدير ليه التنازل ..

بن عيسى شاف فيه و نطق : بصح اولدي و مغنية تبغي تنازل ليه ..

ابراهيم حرك راسو بالإجاب : اه ا سي بن عيسى غير نوض يالله معايا .. رتاح ليك شويا وتاخد الدوا ديالك ..

بن عيسى تنهد و ناض معاه : يا ربي مغنية تنازل ليه يا ربي ..

ابراهيم ديمارا الطوموبيل و شاف فيه : ما ديرش فبالك اسي بن عيسى دابا كلشي يتحل..

بن عيسى تنهد و حط رجع راسو لور و نطق بحزن : اوا لا بتلاء من عند الله مرحبا بيك لا من عندك العبد الله ياخد الحق ..

ابراهيم غادي مركز مع الطريق : هادي دقت العبد اودي اسي بن عيسى ولكن ما غنمشي تا نعرف شكون مولاها ..

مسافة الطريق و وصلو لدار القايد لي كانت على شكل فيرما كبيرا وسطها فيلا بالطراز المغربي الأصيل .. بالزليج الفاسي و نقش على الجبص و الخشب ..

تم داخل العربي شاد ف بن عيسى دخل هو وياه لصالون لي كانت جالسا فيه الحاجة و التسبيح فيدها ... غير شافت بن عيسى و هي تنوض: سي بن عيسى مرحبا بيك .. كي بقيتي شويا ..

بن عيسى حرك راسو حادرو بإحترام و نطق : الحمد الله الحاجة ..

الحاجة :زيدو اولدي جلسو انا نمشي نقول لبنات يوجدو لسي بن عيسى بيت يرتاح فيه ...

و ديك الشي لي كان .. غير خرجات الحاجة و هي دخل منانة لعندهم .. عنقات باها و بقات كتبكي بحرقة و حتى هو بادلها العناق كيطبطب عليها ..

✨

ڤوط + تعليق على اي فقرة حبيتوها ✨🩷