معذبني غرامك ( قصة جريئة)

19

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 19

دخل لدار حااالتو حااالة عرقااان و حاس بفادو طايحين بتمارة ... شاف فالساعة و كانت ديك لعشرة دالليل ...

قلب على باه فالدار ما لقاهش عرفو غيكون خارج ... تنهد و دخل عمر برمة كبييييرة بالما و دارها فوق الفورنو تسخن ... باقي يالله جالس كيرد النفس .. تا كيسمع صوت باه مخلط بصوت حتو منانة ... تبسم بهداوة كيسمع لتجعويقها و صوتها العالي ... تا دخلات عليه للكوزينة

هي .. دخلات مع الباب د الكوزينة كتشوف غا الفوق ما بانش ليها تا حدرات عينيها لقاتو جالس فالأرض و كيشوف فيها تبسمات كطرطق فالمسكة و نطقات : سي لعريييييس من لي دفنوه ما زاروه تقول ما عندك خت تسول فيها تدير لينا لهيبة و العز ...

العربي طلعها و نزلها لابسا و مقادا الحالة و نطق : جايا بعجاجتك الله بحضر السلامة .. حدري صوتك المجعويقة ...

منانة مصمصات الحامض كتقلب فعينيها و نطقات : خضر الله يحضر السلامة ... لاباس عليك بعدا ...

العربي حرك راسو بالإجاب : الحامدين الشاكرين .. و نتي لاباس عليك ..

منانة هبطات سلمات عليه من لوجه واخا عرفان : انا لاباس اخيي الحمد الله ... عرقاااان حالتك ...

و مشات حطات القفة لي جايبا فيديها فوق البوطاجي و نطقات : هاهو عشاك اخيي نت و با ...

العربي : لاش عذبتي راسك ...

منانة حركات راسها بلا كضحك : انا غا مسخرة اولد با .. مرتك لي تفكراتك قاداتو بيديداتها ... صيفطاتو ليك .. عارفاك كتقيل فتمارة د لسواق.. و با ميسيكين صحتو قليلة ....

العربي حرك راسو ببرودة ما عطاش للموضوع اهمية نهائيا حدو نطق : الله يخلف ...

منانة بقات ساكتا كتشوف فيه و الهضرة واكلاها ف فمها خاص تقولها : اوا اسيد لعريس.. امتى ناوي تصيفط لسيدة ميساج تتعرفو على بعضياتكم هاه ...

العربي هز فيها راسو عينيه جاو نيشان فعينيها .. شاف فيها واحد الشوفة خلاتها تبلع ريقها و بالزربة تحدر عينيها منو و ندمات كاع لاش خرجات ديك الهضرة من فمها ..

حنحنات و نطقات بالزربة : اوا نخليك...

و خرجات من تماك كتعتر فجلايلها و هو متبعها بعينيه لي حماااارو بقوة لغدايد ..ناض واقف من تماك معصب ضاااع ليه المود فمرة : الله ينعل الشيطان لحرامي .. و الله ينعل سيرت لعيالات.. تفووو ..

مشا دخل لبيتو معصب .. كانت هي و باها فالبيت فين كيجلسو تا قفزو بجوج فاش سمعو لباب دبيت العربي تزدح ديك الزدحة..

شاف بن عيسى فينتو و نطق مضيف فيها عينيه بشك : اش درتي ليه تاني يا هاد البنت هاه ..

منانة بلعات ريقها و نطقات كدور فعينيها : و ما قلت ليه عيب ابا .. قلت ليه صيفط لبنت دويو فالتيليفون .. كي داير هاد الزواج و هو ما كيسولش فيها ...

بن عيسى تنهد و بقا ساااكت و هي شافت فيه و نطقات بتسأل: ابا واش العربي ما باغيش مغنية ؟

بن عيسى تنهد و حرك راسو بآه و نطق : ولكن غيبغيها ورا الزواج ابنتي .. غيبغيها ..

منانة تنهدات بأسى: و با عنداك تكون ضلمتي البنت بهاد التزويجة ..

بن عيسى بلع ريقو و بقا ساااكت شحااال كيفكر لا العربي بقا مقصح راسو و ضلم ديك بنت الناس هو فين غيدير وجهو منها : و نطلبو ربي يلين القلوب ابنتي .. انا بغيت نزوجو نشوف وليداتو .. انا كبرت و هرمت ابنتي عايش غي بالدوايات .. غدا ولا بعدو يدي مول الأمانة أمانتو .. بغيت نشوفو داير مرتو و ولادو .. وديك بنت الناس .. اصل حلو .. باها و خوتها الله يرحمهم ما صرفو فيا غي الخير .. و تا هي مسيكينة ما شت منها عيب .. عارفها كتبغي العربي داك الشي علاش بغيتها ليه ...

منانة تنهدات كتشوف الدمعة فعين باها .. و عنقاتو كطبطب على ضهرو و نطقات: باقي عمرك طوييييل ابا انشاء الله .. تشوف ولادي و ولاد العربي انشاء الله .. و مغنية تعمر ليك الدنيا بجاغط..

بن عيسى طب كطب على ضهرها حاط راسو على كثفها و كيدرف دموع الضعف : انشاء الله ابنتي انشاء الله ...