معذبني غرامك ( قصة جريئة)

55

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 55

كان لفجر يالله أذن .. ناض صلاه هو و باه .. و خلا باه رجع لبيتو يسبح علاما يبان ضو الصباح.. هو طلع لبلادو .. يتأكد واش كلشي هو هاداك ..

هاد هبط لقا بن عيسى داتو عينو و التسابيح فيدو .. تنهد و عز عليه يفيقو .. مشا دخل لبيتو يهز شي فلوس.. بانت ليه ناااعسة بلاشوميز ديالها و ماكياجها.. فالليل تعطل مقصر مع باه جا لقاها نعساات..

هز لفلوس لي خاصو و خرج من تماك .. مشا فيق باه.. و خرج هو وياه... سد عليها الباب هي بالساروت ..

و زاد هو و باه لبيكوب... مسافة الطريق و وصلو لسوق.. كان سوق كبيييير شعبي اسبوعي كيكون كل خميس .. فيه ما لد وطاب من الخيرات .. ها الهضرة ها الديسير .. و كل رحبة فداك السوق و باس خاصة .. ها الرحبة د الزرع .. الرحبة دلبهايم.. الرحبة د لخضرة و الديسير و الربيع.. الرحبة د العطرية و العاشابة و مالين تابقالت .. و الرحبة دمالين لحوايج .. بالجديد بالبال... و الرحبة د لماعن و بزااف ..

و كاين حتى لقياطن د الماكلا الواجدة اشكال و انواع.. كيبداو من ديال لفطور .. لي كيكون يا لكبدة بولفاف... يا السفنج و اتاي مشحر بالنعناع و لمسمن ..

و لقياطن دصحاب الصوندوينشات.. و الحوت .. و اخيرا لقياطن د صحاب الكفتة محبوبة الجماهير ..

تم داخل العربي هو و باه وسط السوق مشاو لرحلة دلبهايم هي لولا يشوفو السوق واش ستقر ولا هبط من بعد العيد ..

و من تماك مشاو يفطرو بالسفنج و أتاي .. جلس العربي و بن عيسى على طبلة وحدة و انفاص معاهم البياعة و الشراية خدامين على روسهم ..

حطو ليهم داك الشي لي طلبو لمسمن و اتاي و بداو كيفطرو و يتهاودو ..

بن عيسى : اولدي كون غي طونيتي ابراهيم لا كان باقي فالدار يصيفط منانة تجلس مع مغنية علاما نجيو .. اتبقا بوحديها و الدنيا ما فيها ثقة..

العربي حرك راسو بلا : ما تخافش ابا.. راه سديت لباب عليها بالساروت.. وحربش شي حد يسخن عليه راسو يدوز جهة الدار .. بربي تا نقلب بوه داك الدوار عليه ..

بن عيسى تنهد : الله ينجينا اولدي و يبعد علينا ولاد احرام ..

العربي : امين ابا .. امييين ..

كملو فطورهم ..و ناضو يتقداو .. جبد العربي الورقة لي كتبات ليه مغنية اش يجيب فيها .. ما لقاش شي حاجة سبيسيال .. غي تفاتف هاكدا لكوزينة .. ضيق عينيه فآخر حاجة قيدات ليه و خنزر و جمع الورقة فجيبو و زادو كيكملو التقدية ..

كان ما مخلي باه يهز تاشي حاجة .. لي شراوها كيهزها الراسو و فاش كيحس بيديه تضبرو.. كيخلي باه حدا شي خضار.. و يخرج هو يحط التقدية فالطوموبيل و يرجع يدخل لسوف لعند باه ..

بقاو هاكدا تا شراو كاع داك الشي لي خاص .. و مشاو كيدوزو فالجهة د البال هاكدا لا يلقاو شي همزة ..

شراو تاني شي لعيبات و دازو من حدا مالين التقاوت السقاطة..

بن عيسى وقف : اجي اولدي خود المراتك شويا ديال السقاطة و التقاوت دخلها ليها فيدك لعيالات عزيز عليهم هادشي ..

العربي شاف فداك الشي و نطق : زيد عليا ابا مالها برهوشة انشري ليها السقاطة.. راه تقدية فيها لي غتحتاج..

بن عيسى طلعو و نزلو قاطب حجبانو و نطق : فزعي و خضر الله يحضر السلامة منين ورتي هاد لقصوحة ...

و ضرب فيه و زاد هو لعند مول التقاوت و السقاطة .. عمر ليها ميكة بالنوكة و الزوبعة و الحلويات و المونادة ديال درهم .. شويا شويا من كل حاجة .. و خلص مولاهم و زاد مخلي العربي غا كيصوط..

بن عيسى : و زيد دابا دينا نتغداو يالله