126

2K 76 8

بواسطة Swispicy

بقلم Swispicy

..
مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

‏ Part : 126

حسناء شداتو من عندها و رماتو فالأرض على وجهو و هزات حجرة و بدات كتدق فيه بالجهد .. مخليا خولة عينيها خارجين : طيليفوني اش كديري ..

حسناء بقات مكملة كتدق فيه بالجهد تا صافي شخشخااااتو ما خلات فيه مايتجمع عاد وقفات كتنفض فحوايجها : هاهو دابا الطيليفو لي فارعا لينا كـ رنا عليه هاهو مشا بح ما بقاش ..

خولة : واش تسطيتي مين غنجيب طيليفون دابا انايا ...

حسناء هزات كثفها بلا مبالات و نطقات : و انا مالي قدي لحلوفتك و ما تعرفيني ما نعرفك..

فجئة قلبات نبرة صوتها و نضراتها لشراسة و الخبث و نطقات : وياااك ثم وياااك تبغي ديري فيها واعرة و تمشي تخرجي حرف من هادشي لي درنا ..حيت ديك الساعة نتي لي غتمشي فيها طويلة ..

خولة بلعات ريقها و بقات جامدة فبلاصتها غير كتشوف فيها و فتصرفاتها المريضة و كتشوف المشكل لي طيحات راسها فيه : ماشي هادشي لي كنتي كتقولي نهار لأول ..

ضحكات حسناء بإستهزاء هازا حاجبها و نطقات : اش بيني و بينك اختي .. سيري فحالك .. سيري تكون مك كتسناك تعجني..

لاحت ليها هاد لهضرة و دارت غاديا بحالها كتتمختر بكل ثقة و هي مرتاااحة و ضامنا انو خولة ما غتنطق بحتى حرف ..

بعد مرور عدة ايام و بالضبط داز على مو ت بن عيسى 40 يوم ..و ليوم كان الربعين ديالو ..

كانت واقفا قبالت لمراية كتقاد فالشال ديالها و كتشوف فداك الإنعكاس الباهت ديالها .. تنهدات بعمق..محاولا تهدن راسها ..

هادي اول خرجة ليها من نهار وقع داك المشكل .. دخلات حليمة كتناضرها بإستغراب و دهشة فنفس الوقت : مغنية فين غاديا ..

مغنية ما كلفاتش راسها حتى دور تشوف فيها و نطقات ببرود : لمقبرة..

حليمة قرنات حجبانها و حطات يديها بجوج على خصرها و نطقات : علاش بالسلامة ..

مغنية تخطاتها غاديا في اتجاه الباب : نزور لقبر دعمي بن عيسى ...

حليمة خرجات عينيها و تبعاتها كتجري قاطعا عليها الطريق : كيفاش ..

مغنية زفرات بالجهد ناطقا بنفس البرود: كي سمعتي امي ..زولي خليني نمشي ..

حليمة بغضب : واش تسطيتي ...

مغنية راوغاتها بخفة متخطياها : من شحال هادي ماشي عاد دابا ..

نزلات مع الدروج بخفة هاربا من مها ..و هي تابعاها فالدروج كتعيط بسميتها.. و دايرا حالة صوتها وصل حتى ل منانة لي كانت كتسناها هي و الحاجة لتحت ..

الحاجة : رجوع الله احليمة مالك ..

حليمة : هاد البنت غتخرج ليا لعقل الحاجة ..

الحاجة : مالها اش دارت ياك غاديا غير ترحم على شيخها.. اصلا غاديا هي و منانة ..

حليمة خنزرات فمغنية لي بادلاتها النضر ببرود و نطقات : ما كاين لاش .. هاهي بنتو تمشي ترحم عليه ..

الحاجة قربات من حليمة و معالم الصرامة واضحة على ملامحها : حليمة رجوع الله نتي مولات الصواب .. هاداك لي غاديين يترحمو عليه راه شيخها .. شيخها لي من لي دخلات لدارو فاش كانت عندها 4 سنين و هو كل عيد لي كيشريه لبنتو كيشريه ليها ... عمر خصو ليها الخاطر .. ما تكونيش نكارة الخير .. و تنساي شحال من مرة جبر بخاطرها فاش كانو كيعايروها بليتيمة كيمشي هو معاها يقولهم انا باها ..

الهضرة ديال الحاجة خلات حليمة تحدر راسها .. و خلات الدموع يتجمعو فعينين مغنية و هي كتفكرو.. كان فعلا الراجل لي عمر آداها ..الراجل لي من صغرها و هو حنين فيها و ما عمر شافت منو شي حاجة د العيب ..

#يتبعععع ... اااي لبارت الجااااي الصدمة يا مكم ✨🤤