معذبني غرامك ( قصة جريئة)

80

         مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

                                 Part : 80

مغنية خبطاتها لراسها بلطف و نطقات : اشمن محبة ولا مرض لمحبة من عند ربي .. حيدي عليا انا صافي حطيت حمـ.. اري مع العربي حالة ميؤوس منها..

منانة تنهدات كتشوف الحزن فعنين صحيبتها .. جراتها لعندها عنقاتها و بدات كطبطب عليها و تشجعها تحاول كثر ..

طاح الليل و جا العربي ورا مغنية رجعها ...دخلات وجدات لعشا .. تعشاو و كلها ناض لبلاصتو .. تكات مغنية فبلاصتها راميا لعين لتليفون العربي .. كيبان ليها كيتفرج ف فيديو على واحد الطوموبيل طيوطة كبيرة فلاحية ... شافتو كيفاش كيوقف الفيديو و يزومي عليها ..

زادت قربات لعندو كثر و نطقات بنعومة : واش عجباتك هاد الطوموبيل ..

العربي شاف فيها بهداوة و حرك راسو بالإجاب و بقا ساكت .. و هي كملات : واش باغي تاخدها ..

العربي حرك راسو مرة اخرى بالإجاب و نطق: لا بغا الله علاش لا كنجمع ليها فلوسها ..

مغنية قربات عندو كثر بفضول و متعمدة نيت توريه خيرها : و شحال ساوية...

العربي زاغو عينيه ديريكت لصدرها لي محطوط قدامو بيض كيشقشق و مزينينو عروقا زرقين رقاق و علامات التمدد مع الجناب .. و ريحتها خلاص كتسكن عقلو .. رجع هز عينيه فيها لقاها كتشوف فديك الطوموبيل و نطق : جديدة ساويا الثمن.. كازوين واحد 10 دلمليون ...
مغنية شافت فيه موسعة عينيها و نطقات : وساوية الثمن ..  ولكن تستاهل ...

رجعات تاني شافت فيها و حطات صبعها على الشاشة رجعات طلقات الفيديو و نطقات : و دابا نت شحال جامع من فلوسها ...

العربي هز فيها حاجبو و نطق بخشونة : ولاش كتسولي

مغنية شافت فيه و نطقات : و غير سولت و صافي لا كنتي جامع شويا نزيدك انا راني جامعة شي براكة دلفلوس من لي كتعطيني ... و عندي الذهب لي جبتي ليا و لي عطاتني مي و الحاجة ..

العربي بقا كيشوف فيها كيفاش كترمش فعويناتها و تعض على شفايفها و نطق : ما يحتاجش خلي دهبك عندك انا قاد براسي ...

مغنية حركات راسها كضحك و نطقات : راجل و سيد الرجال انا غير قتارحت عليك و صافي نت تعرف ...

العربي بقا كيشوف فيها و عينيه نايمين فشفايفها هي كلها على بعضها كتجيه على الكانة سيغتو فلفراش لقا فيها داك الشي لي باغي ..

و دازت ليلتهم على خير و جا نهار جديد ..

فاقت مغنية معطلة ما لقاتوش عرفاتو مشا يخدم .. خدات دوش بالما بارد عكزات تسخن ..توضات و خرجات ديريكت لزريبة تحلب و تباشرها نهارها ..

صبح بن عيسى مريض بزاف .. ما قدرش ينوض من فراشو .. عتنات بيه فطراتو و عطاتو دواه .. و رجعات لشغلها...

كملات شقاها كامل .. و قادات لغدا.. عطات لبن عيسى هو الأول يتغدى .. و عطاتو الدوا ديالو .. و خلاتو يرتاح..

و دخلات تاني للكوزينة .. ضربات على الساعة لقاتها شي الربعة ..عرفات العربي غيكون سالا الخدمة و كيدوش فلبلاد.. تبسمات بحماس .. و قادات لغدا فسلة لي موالف بن عيسى كيدي ليه فيها الماكلة .. قادات فيها على حساب جوج د الناس باش تتغدا معاه...

لبسات عليها حوايج مستورين و غطات راسها ... و هزات ديك السليلة و تمات غاديا.. كانت اول مرة غتعتب باب الدار بلا شوارو غادا و كدرق فوجها و طلب سيدي ربي ما تلاقا بحد و ما تلقا معاه حد و الا غيق. ودها معاها ..

وصلات لنص طريق كيبان ليها العربي واقف .. و كيدوي مع شي حد .. بقات جايا مخيبا بين الشجر و كتحاول تشوف مع من ..تا بدات الصورة كتوضاح قدامها و ما حدها كتقرب لعندهم و هي كتزيد توضاح كثر..

كيبان ليها العربي واقف مع بنت الشرادي و هي هازا فيديها شي حاجة مغطية .. و كدوي معاه و تفرنس..و هو حادر راسو و عاطيها مسافة الأحترام ..

ما قدراتش تسمع حديثهم حيت كانت بنت الشرادي مدات للعربي الطبسيل.. و تمات راجعة.. و غير قشعات مغنية قاصداهم و هي تتبسم بخبث و تقلات مشيتها كتتمختر على مهلها متعمدة تشعل مغنية و تعصبها..

وصلات على كودها و هي تتبسم ليها بإسنفزاز و نطقات : مغنية لاباس..

مغنية خنزرات فيها و تخطاتها و كأنها ما كايناش.. مكملة طريقها لعندو.. هو لي شاف الديكور خنزر .. وصلات لعندو مغنية و هو يقرب لعندها بالزربة و نطق مزير على فكو : اش جايا كديري هنا هاه .. اش مخرجك من دارك ...

مغنية هزات فيه عينيها و لأول مرة طلعاتو و نزلاتو بشوفة ناقصة و نطقات: جبت ليك ما تاكل عزيتي عليا .. ساعا لقيت مالين الحسنات سبقوني ..

و هبطات عينيها لطبسيل لي هازو فيدو و نترات من عليه السربيتة باش كان مستور و تبسمات بإستهزاء و هزات فيه راسها و نطقات : هاي هاي لحقو يقادو السلو ما عندك ما تسالهم ...

ردات السربيتة على الطبسيل ورجعات شافت فيه هو لي غير مخنزر فيها و نطقات : اوا بالصحة و الراحة اراجل ..

و حطات ليه ديك السلة فالأرض و دارت راجعة بحالاتها و حاسا بواحد الغصة قااصحة واحلا ليها فلقها .. خلاتو كيعيط وراها و ما داتهاش فيه زادت راجعا لدار و قلبها حرفيا علين يخرج من بلاصتو ...

✨

حد هنا حبايبي نتلاقاو فالأجزاء الجايين.. و عافاكم خليو ليا تعليق على كل فقرة اشنو عجبكم فالأحداث اشنو ما عجبكمش.. وخليو فوط على كل جزء قريتوه باش حتى انا تحمسوني و تبقا نحط ليكم بشكل مستمر فالقصة 🔥🔥