معذبني غرامك ( قصة جريئة)

104

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

‏ Part : 104

و ديك الشي لي كان .. غير خرجات الحاجة و هي دخل منانة لعندهم .. عنقات باها و بقات كتبكي بحرقة و حتى هو بادلها العناق كيطبطب عليها : صافي ابنتي صافي ..

منانة مزييرة عليه و كتبكي: والله ابا ما درنا شي حاجة ..

بن عيسى طبطب عليها و الدموع فعينيه و نطق : عارف ابنتي عارف الله ياخد الحق... الله ياخد الحق ...

ناض ابراهيم وقف خرج من حداهم مخليهم بجوج يهضرو .. منها نيت منانة تقابل باها باشما يحشمش..

و داز داك النهار .. و جا نهار جديد .. و كان الطبيب كتب المغنية الإذن بالخروج... لبسات جلابتها و تمان خارجة شدا فمها ... و الذبول و العياء و المرض كانو واضحين على وجها الشاحب .. قلبها محروووق و ريقها مررر قطران..

لقات ابراهيم كيتسناهم ركبو معاه .. ركبات هي لور و حطات راسها على الزاج.. و بقات غادا .. وساااكتة .. منفاصلة على العالم .. غير الدموع كينزلو من عينيها .. جفونها تنفخو و حمارو و رجعات حالتها حالة .. مزالة كيجيوها لحضات كتغمض فيهم عينيها و كتقول راها غير كتحلم .. و اترجع تحل عينيها اتلقا راسها فحضن العربي ...

ولكن فاش كتحلهم كتلقا راسها فعلا ما كتحلمش.. فعلا تشوهات و الجنين ديالها مشا ليها قبلما كاع تعرفو واش فكرشها..

وصل بيها الألم الروحي انها ما بغات والو .. صافي بغات كلشي يحبس.. ما قادراش تكمل.. و ما قادراش ترجع لور .. و ما قادراش تا تبقا فبلاتها ... كلشي كيحرقها كلشي كيعذبها

نتافضات فاش حسات بالطوموبيل حبسات و بان ليها انهم وصلو لدار القايد .. فتح ليها ابراهيم الباب و عاونها تنزل معاملها بحال شي وحدة من خواتاتو..

دخلها لداخل و حليمة تابعاهم... غير وصلو لقاو كلشي كيتسناهم...مغنية غير شافت فنانة لي من وجها كانت باينا حالتها مكفسة بحالها.. و هوما ينزلو دموعها ..

سلمات على كلشي وصلات عند منانة و عنقاتها و بقاو كيبكيو بحرقة .. حياتهم تضمرات بين ليلة و ضحاها عاد كانو فرحانين برمضان و موجدين ليه تا لقاو راسهم فهاد المكتاب

منانة : الله يعوضك اختي الله يعوضك ..

مغنية نطقات بهمس :آمين ..

دارت لقات بن عيسى قدامها و يريتها ما شافت الدموع فعينيه و ديك القهرة لي مقهور.. زاد كمل ما بيها .. حاني راسو و حشمان منها : على سلامتك ابنتي على سلامتك .. الله يعوضك خير ..

مغنية حركات راسها و بقات ساكتة غير كتبكي و هو قرب كثر ليها و نطق : العربي راه مرمي فالحبس ابنتي ..

مغنية هزات راسها فيه وهو ينطق بتوسل: تنازلي ليه ابنتي الله يرضي عليك .. را..

نطقات حليمة مقاطعاه بنوع من الحدة : سي بن عيسى و كون حقاني شويا .. سيد موصلها المو.. ت و كتقولها تنازل ليه... لا لا لا مزال يزيد يتجرجر فلحباسات نوريه كي دايرا يمد يدو على بنتي ..

بن عيسى بقا غير ساكت و كيشوف فيها و من الوقفة لي واقف باينا فيه مريض و واقف غير بزز.. نطق هاد المرة ابراهيم متدخل : حليمة .. هاداك لي باغا تجرجري فالحبس راه راجل بنتك ..ما تعرفي هي تكون باغا تنازل ليه راه ما تعاشرورش قليل زيد حتى هوما راهم فوتيف... هوما سباب لفضيحة فالدوار ..

حليمة سكتات لا كلام فوق كلام ابراهيم كانت كتحارمو بزااف ..

شاف ابراهيم فين عيسى و وما ليه براسو زعما غير هضر معاها .. و ديك الشي لي كان .. بلع بن عيسى ريقو و نطق يتوسل و دموعو كيدوزو : الله يرضي عليك ابنتي هادي 3 يام و هو تما و ما خلاونيش نشوفو .. الله يخليك ابنتي

قرب منها كثر حتى بغا يطيح ليها على يدها يبوسها ليها كاع و نطق بصوت كولو ضعف و مرض : الله يخليك ابنتي سمحي ليه .. سمحي ليه .. ما تخليهش مليوح فالحبس ابنتي راه هو لي عندي على وجهي ابنتي انا ما صرفت فيك غي الخير ..

بقات جامدة فبلاصتها كتشوف فيه و عينيها كيدمعو .. كيدمعو د.. م ما عارفاش لأشمن حريق فداتها تتصنت و تشكي منو .. هربات يديها بززبة مستحيا راجل قد باها يطيح ليها على يديها و نطقات : ...

✨

ما تنساوش.. ڤوط + تعليق على اي فقرة حبيتوها