معذبني غرامك ( قصة جريئة)

29

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 29

و رجعات بنضرها ليها .. كطلع فيها و تنزل ..كيفاش رجعات .. و تمصمص فبطانت شفايفها .. تا وقفات عليها منانة كطلع فيها و تهبط بنضارات كلها استهزاء : بنت الشرادي ..

حسناء هزات فيها حاجبها و نطقات عاطياها خو كلامها : بنت لخميمس.. لاباس عليك ..

منانة ديك لخميميس ضحكاتها من ديما كيبغيو ينقصو منها بيها : فوق السلك الحمد الله ... و نتي ..

حسناء : تا انا بيخير ..

و طلعاتها و نزلاتها كضحك بإستهزاء و نطقات : بان عليك خير دار القايد .. بياضيتي و زيانيتي .. كنتي فدار باك لخميميس زرقا كي الدنجالة..

منانة رمقاتها ببرود و نطقات : ياك بعدا .. جا معايا الزواج .. اوا العقبا ليك تا نتي .. غا هو نتي بنت الخير و دايرا كي الدنجالة و يابسة يا مك.. كولي الحلبة راه كتغلض ..

حسناء بلعات ريقها طلعات معاها ديك يابسة نيت و نطقات بشيء من الإندفاع: لاطاي ديالي عاجباني مقادا .. خليت ليكم الغلض الهركاويات..

منانة ضحكااات فاش عرفات راسها وصلااات ليها الهضرة مزيان و نطقات : ويلي مالك تقرصتي غا ضاحكين.. اختي اللهم غليضة هركاوية ولا يابسة .. ما علينا .. راك معروضة من دابا .. ل ليلة د الحنة د مغنية و العربي .. اتكون من هنا جوج سيمانات .. عندااكي ما تجيش..

حسناء تبسمات و هزات فيه حاجبها و نطقات : اوا مبروك على الالة مغنية واخا دلها جاب ليه الدوار كولو لخبار .. بعدا دارت الفايدة و داتو ..

منانة تا هي ضحكات مسايرتها : داتو. يا ختي ..و هي تا لا طيحات الدل .. داتو ..

طلعاتها و نزلاتها بنضرات كلها استهزاء هازا حاجبها و كملات : وكيت لي مطيحة الدل و قريبا تنصل سريويلها قدامو و هو منخلها كي النعجة.. اوا خليت ليك الراحة ندخل نشوف با ...

و تخطاتها و دخلات و سدات وراها الباب مخلياها علين تاكل الرية ديالها بلغدايد: الجيعااانة لوخرا الزركة تا نتي تحل ليك الفم والله لا بقات فيك ..

و زادت تمشات راجعا لدارها مكرررررهة.. لي جات قدامها كدور فيه و تبرد فيه غدايد منانة

داز داك النهار .. و جا نهار جديد .. و فدار القايد ...

كانت مغنية و منانة متاويين كي العادة حاطين الراس عند الراس .. و كيوجدو ..

كانو حالين لبالز ديال الدهاز د مغنية و كيستفو كل حاجة فبلاصتها باش يعرفو اش باقي خاصهم يديهم براهيم يشوفو ..

حلات منانة وحدة من لبالز لقاتها عاامرة بدوبياسات و ليشوميز دونوي .. هزات راسها فمغنية و نطقات شادا فيها :اش هاد لمسخخخخ ااا .. اااش هاد لمسخ يا ختااي ..

مغنية ضحكات و جرات ليها البليزة من يديها و نطقات : اري هاديك غبريها اتشوفها حليمة تخركها ليا فوق راسي ..

منانة كتجرها ليها : اري نشوف اري .. امتى يا لمسيخيطة لحقتي تجمعي هادشي كولو ..

مغنية ضحكات بخفة و نطقات : فينما كان عزيزي يديني معاه لسوق كان كيدور معايا و يطلقني ناخد راحتي .. كنمشي نشري لي خاصني و لي شاط ليا كنشري نصو سقايط و نخطف لعيبات بحال هادشي .. كووولووو لعيووون حبيبي العربييي .. نمتعوووو يا ختاااي كل ليلة وحدة ..

منانة هزات وحدة بيضا كلها مشبكة كتجي لااسقة و لاحتها عليها : والله تا تنوضي تقيسي هادي نشوف كيف غتجيك ..

مغنية حركات راسها بالرفض : لا لا هبلتي نتيا .. باغا مي غا تا تبعت معانا .. حيدي عليا خلي تا نكونو فبيتك دابا لا ...

و داك الشي لي كان شدات ديك لاشوميز طواتها و رداتها فديك لافاليز و شداتها و طرقاتها بوحديتها ... و كملو كيستفو داك الشي لي بقا .. لقاو انو صافي ما بقا خاصهم والو كلشي شراوه و وجدوه ...

منانة : و هانتي يا ختي ها دهازك كااامل مكمووول بصحت حبيييي .. اجي نسيت ما قلت ليك البارح فاش مشيت لدار عند با نطل عليه .. تلاقيت بنت الشرادي خارجا من عندهم ...

مغنية غير سمعات سيرت هاد السيدة لي ذكرات منانة و هي تحس بالضو طلع معاها .. شافت فيها و نطقات قارنا حجبانها : كيفاش وهي اش كدير عندهم ..

#يتبعععع