معذبني غرامك ( قصة جريئة)

07

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 7

العربي حرك راسو بالنفي نافر من سيرتها : لا ابا .. غي شوف غيرها عطا الله لعيالات .. هاديك ما عندي ماندير بيها ...

بن عيسى تنهد و نطق مقلق : وولدي انا هاديك لي دفات ليها خاطري و تقت نزوجها ليك و ندخلها لداري .. غيرها اولدي انا ما خاطبش ..

زاد خلفة مع الطريق بعكازو خلاه واقف مخنزر و كيشوف .. مغنية كبرات قدام عينو ولكن عمر فكر فيها من هاد الناحية و ما كندخلش ليه لخاطرو كتجيه خفيفة و هي لي كانت كتزيغ ختو و تخرجها الطريق حيت ما لقاتش لباين و لخوت لي يحكموها ...

ضرب داك الصندوق قدامو بركلة بعدو سيرتها عصباتو و عكرات ليه المود : استغفر الله .. نتزوج انا بهاديك السايبة بربي تا نصفيها ليها ...

تعاشات لعشية و الشمس بدات كتغيب ...و الشتا باقي كترش رشيشات خفاف... دايرا القفة تحت باطها ساتراها من الشتا باش ما تفركش الماكلا لي ... و دايرا علا راسها ترازة ... من دار لقايد لدار بن عيسى شداتها الشتا فالطريق سرسطاتها...

وصلات لقدام لباب دقات يديها كيترعدو بالبرد ... سمعات صوت بن عيسى كيناديها من ورا لباب : شكون ..

مغنية تبسمات بتوتر قلبها كيخرج من بلاصتو و نطقات بصوت رقيق : انا اعمي بن عيسى مغنية...

حل عليها لباب و نطق طالق بشرتو : مرحبا ب بنتي مغنية مرحبا زارتنا البراكة ..دخلي ابنتي دخلي ...

مغنية باس بيه علا يدو و دخلات : الله بكبر بيك اعمي بن عيسى ...

زاد بن عيسى دخل معاها لداخل : دخلي زيدي ابنتي مرحبا .. كي دايرا مع الصحيحة .. كي دايرا مك .. وكي دايرا منانة...

مغنية عينيها كيدورو وسط راسها كتقلب عليه و قلبها كيدردك وسط صدرها و الفراشات كيلعبو وسط كرشها : الحمد الله اعمي بن عيسى كلشي بيخير منانة كتسلم عليك .. و هي لي صيفطاتني ...

بن عيسى : مرحبا بيك ابنتي و مرحبا ب سلامها ..

و اشر ليها بيدو جهة باب بين لكلاس : زيدي ابنتي دخلي دخلي ...

زادت معاه دخلات ... مع هزات راسها بان ليها العربي مجبد فاق السداري قد السخط واخد راحتو و شاد طيليفونو .. غير جات عينها عليه وهي تتزنك حنيكاتها توردو .. و تبسمات ابتسامة كتفتح النفس ...

هو كان ساهي كيقرا فواحد المقال كتطلع معاه ريحتها مجهدا و هو يهز عينو بانت ليه و هو يقابل ابتسامتها بواحد التخنزيرة خلاتها تبلع ريقها و قلب وجهو كيتسغفر تحت نيفو ...

بن عيسى شاف لبلان و هو ينطق كيحاول يلطف الجو : زيدي ابنتي ما تحشميش .. اش جايبا لينا معاك ...

منانة تلفات نسات تا لقفة لي ثقيلة .. حنحنات.. و حطاتها فوق الطبلة و نطقات : عشيوة ديالكم منانة قالت ليا ما كتعرفوش طيبو ..

و حطات ليهم الخبز 3 دالخبزات د الدار شغل يديها .. و حطات ليهم الكوكوط فيها دجاجة باقي سخووونة من فوق لبوطة لقفة ... و شي سوبيرات فيهم البقولة جامدة و تكتوكة جامدة و نطقات و هي كتفتف : و هادو اعمي لبقولة و تكتوكة غير جبد سخنهم و كولوهم ...

بن عيسى : الله ريحة كتشهي الله يكثر خيرك ابنتي و الله يرضي عليك ..

مغنية تبسمات : امين اعمي ..

و رمات لعين للعربي لقاتو شاد طيليفونو و باقيعلا تخنزيرتو... تنهدات و نطقات : خليت ليكم اراحة اعمي بن عيسى

بن عيسى وقف مانعها : لاواه ابنتي لاواه ... جلسي نديرو شي كويس د آتاي ...

يالله جات مغنية تنطق و هو يقاطعها العربي بحدة : خليها ابا تمشي بحالها السايبات بنات الجنانات هوما لي كيخرجو فهاد لوقيتا...

مغنية تصمرات قبلاصتها و الدموع تجمعو فعينيها و تحجزو و الريق حسات بيه مر فحلقها ... حدرات راسها كتحاول ما تبين والو و لبسات صباطها و نطقات و هي خارجة بالزربة:خليت ليكم الراحة ...