معذبني غرامك ( قصة جريئة)

70

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 70

كان فلبلاد.. واقف على الخدامة كيجنيو الخرشق و البسباس.. و كيعمرو فالصنادق.. كان فرحان بغلتو الوفيييرة .. و لي زاد فرحو كثر انو سمع السومة د السوق طالعة هادشي كيعني هو غيربح كثر ..

كانو يديهم قرمانبن بالبرد ولكن هادي هي الخدمة لي بغا يدجيب طرف د الخبر بلحلال..

كان حاني تا هو على الجنيان د الخرشف بالموس ديالو .. كان سابقهم بقوة الصحة و الجهد لي شاد.. تا كيوقف على صوت أنوثي كينادي بسميتو ..

وقف كيشوف شكون و هو يقطب حجبانو فاش بانت ليه واقفا من جهة البير و كتشير ليه بيديها ..
خشا موسو فجيلو دالسروال و دار شاف فالخدامة لقاتهم تا هوما غاديين مع الفيلم .. خنزر فيهم تا رجعو حناو على خدمتهم و هو تم غادي لعند هاديك لي كتسناه قدام البير ..

قرب عندها مخلي مسافة احترام بيناتهم حادر عينيه منها و نطق بخشونة : حسناء لاباس .. شجابك ؟

حسناء سبلات عويناتها بحزن و نطقات : جيت غير نشكرك اخويا العربي على لوقفة ديالك معانا فهاد المحنة .. كونما ديك القفة لي كدخل علينا كون راه مت.. تا بالجوع .. حيت با حجزو ليه على كاع ملاكاتو

العربي حرك راسو ناطق بنفس الخشونة : ما يحتاحش كندير الواجب علال ما صرفش فيا قليل ..

حسناء سكتات شويا كتحرك فراسها و نطقات : و سمح ليا اخويا العربي داك النهار فاش جيتكم فنص الليل و مشيت قبلما تجي .. ما لخاطريش..

نطاقاتها و تسكتات مقاطعينها دموعها لي نزلو و نطقات بقهر: ما لخاطريش اخويا العربي .. مغنية تقلقات فاش جيت العندك نت ... فاش مشيتي دخلات عمي بن عيسى ينعس .. و شداتني داتني لبيت شبعات فيها عصى .. و جرات عليا

العربي زاد عقد حواجبو مصدوم من اش كيسمع : كيفاش ..

رجعات كملات كلامها و هي كتبكي بحرقة : والله اخويا العربي ما قلت ليها شي حاجة شداتني ضرباتني و قالت ليا ما تعاوديش دوري براجلي ولا نشوهك مع الدوار كولو تقولهم كدوري ليا لراجلي .. و انا والله اخويا لعربي لا حاطا عليك الراس غير حيت عارفاك ولد الناس و ما فيكش تحراميات..

العربي حرك راسو كيعض على باين فمو عززو بلغدايد و نطق : صافي سير لداركم دابا و مسحيها فيا ..

حسناء حركات راسها بالإجاب كتلاحض علامات العصبية و الغضب لي تملكو واضح عليه و نطقات : و الله يعاون اخويا العربي .. سلم على عمي بن عيسى...

العربي هز براسو و نطق : مبلغ ..

زادت مع الطريق كتتمختر و تتبسم بخبث الشر باين من عينيها : والله يا مغنية يا البوطة د لمياتين حتى ندمك على النهار لي مديتي يديك عليا فيه ..