معذبني غرامك ( قصة جريئة)

69

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 69

توضى و خرج سرح زوبيتو عاطي وجهو للقبلة مستقيم فالوقفة بقدو و قامتو الطويلة و صلابة عودو .. قام الصلاة بالجهر بصوتو الرجولي الخشن ...

كان عاطيها بالضهر و هي ناعسة على جنبها فوق ديك الناموسية حاطا يدها تحت خدها و عويناتها عليه مبتسمة بهيااام كتتنهد و صوتو الرجولي الخشن و هو كيجود فصورة الفاتحة .. ختارق مسامعها مدخل على قلبها السكينة و الراحة ..

مراقبا حركاتو الرجولية فالركوع و السجود .. و صوتو كيتردد فالبيت كولو .. كثافو عراض كيف كيقولو غير ديال شي سلهام مغربي بيض..

بقات مراقباه حتى سالا صلاتو سلم و هز كفوفو لسما كيدعي فصمت ..
و وقف كيستغفر .. جامع ديك الزربية د الصلاة كيطويها بين يديه .. جات عينو فعينها كتناضرو بيهم و اللمعان مزينهم ..

حط ديك الزربية فبلاصتها و زاد جلس عند رجليها فالناموسية كيلبس كبوطو و هي تنطق بفضول : العربي اشمن مونتيف دار الشرادي و ولدو تا هزوهم الجادارمية ..

العربي نطق و هو كيحزم خيوط سبرديلتو : لحشيش ..

مغنية نطقات بدهشة : اويلي .. واش لقاوه فالدار ..

العربي حرك راسو بلا و نطق : لقاوهم زارعينو فالفيرمة...

مغنية هزات حاجبها كتحلل و تناقش فراسها : عليها محوطينها بصور عاالي و دايرين لكلاب و العسة بالليل و بالنهار ...

العربي وقف خارج و نطق : و نعسي روحي يالله ..

مغنية : واخا اسيدي العربي سيد الله يعاونك ...

خرج من عندها قاصد خدمتو .. واخا عيان و ما ناعسش ولكن ما عندو ما يدير ...

صبح الصباح .. باب الفيرمة ديال الشرادي تشمع على يد الجوندارم.. و لخبار داعت بين الناس د الدوار .. كلهم ساقو لخبار انو الجوندارم قرقبو على الشرادي و ولدو .. و فقضية لعشبة "لحشيش" لي كيزرع فالفيومة ديالو خزنة تفرشات..

و الهضرة كثرات ها لي بقا فيه و قال .. قلنا ليه يبعد لحرام راه غيحصل يحصل.. و كاين لي لخبار طاحت ليه كيف التلجة فوق قلبو برداتو ليه و تشفاا فالشرادي...

كان بن عيسى و مغنية كيفطرو كيف العادة و يتهاودو .. كيعاود ليها و تعاود ليه و منسامجمين بحال شي اب مع بنتو ...

بن عيسى : و يييه ابنتي حبل لحرام راشي .. و الشرادي من زمان قاطع يدو من يد الخالق ..

مغنية حركات راسها و نطقات : و راها خارجا ليه اعمي فولادو... ولادو كلهم خرجو ليه من جنب.. ها لي حرق مشا ما رجع .. ها لي خارج لبلية و لحباسات..

بن عيسى تنهد : اوا الواحد هو لي يصفي ابنتي ..،

مغنية حركات راسها بالإجاب .. و ناضت كتجمع فالطبلة فاش سالات .. و بن عيسى بقا كيتفرج فوثائقي على التبوريدة ..

مغنية مشات للكوزينة تقاد لغدا دايرا بزايد حيت اليوم النوبة ديال لفقيه فدار بن عيسى ..

و مشاو يامات على نفس الروتين .. و دخل شهر واحد و عام جديد .. و البرررد و الشتا خيط من السما و ربي عاطي خيرو .. كانت على برا فالبورنية تحت واحد الشجرة .. حاتية على البستينية و الفراكة ديالها و كتفرك فلحوايج ..

ما سالات تا حرفيا صبعانها دماو بقوة لفريك و يديها عطاوها الصداع ... تنهدات بعياااء عرقااانة بالشقا .. تهدات ..

#يتبعععع ..