معذبني غرامك ( قصة جريئة)

62

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 62

ناضت كتحاول اي دمعة هبطات من عينها تزوب عليها تمسحها.. و تنش على وجها باش يبرد و يخفاف احمرار عينيها .. خرجات لطومبيل..ركبات حدا بن عيسى .. و قلع العربي غاديين ...

دازو خداو كرطونة ديال السكار يدخلوها فيديهم و كملو طريقهم ما وقفو تا لعند باب دار القايد...

حل ليهم العساس الباب زادو دخلو لداخل.. مع وقفو حدا الباب د الدار و هوما يبانو ليهم مستينينهم بالصواني د التمر و لحليب و كيعشقو و يزغرتو...

هبطات مغنية هي لولا مبتاسمة ليهم ابتسامة زوينة .. واخا قلبها كان مغير .. و تقدمات هي سابقا العربي و بن عيسى .. سلمات على لي كانو مستقبلينها .. اولهم منانة و مها و الحاجة و ابراهيم عزيزها ...

لحق عليها العربي تا هو و بن عيسى و سلمو عليهم .. و هي تمد الهم الطبسيل د التمر معمر بمعجون النوا " عجينة اللون و الكراكاع و الكاجو" .. و نطقات ببشاشة : خود تميرة اوليدي مرحبا بيك ..

العربي تبسم برجولية و نطق ماد يدو لطبسيل : الله يكبر بيك الالة حليمة ..

خدا تمرة كلاها .. و مدات ليه منانة الكاس دلحليب : هاك شرب لحليب اخويا ..

العربي تبسم ليها و خدا كاس شرب منو .. و زادو دخلو لداخل لصالون يجلسو.. كانت مغنية غير ساكتة و علامات لحيا و الحشمة باينين من حنيكاتها لموردين .. كتجاوب غير على قد السؤال .. عاطيا الصواب

هادا كان طبعها فلمجامع.. بعيدا على انها مقلقة .. حيت كانت كتقدر تخبي حزنها مزيان و تا حد ما كيلاحضها فيها واخا تكون مضروبة فيها لجدر ..

جلسو شويا و هي تجرها منانة طلعو لبيتها و سدو عليهم و جلسو يتعاودو يحيدو الشوق من بعضياتهم ..

منانة ضيقات عينبه فعينين مغنية و نطقات :. عنيك ماشي خوت اشعيبية... واش باكيا..

مغنية بلعات ريقها مهربا عينيها و نطقات محركا راسها بالنفي : لا غي لكحل درتو لبارح و ضرني فعينيا مرضهم ليا ..

منانة حركات راسها ببطء و نطقات باقي مضيقا عينيها بشك : مممم غا لكحل .. اوا الله يجعلني نتيق ..

مغنية سكتات ما جاوباتش و هي تنطق مغيرة الموضوع عارفة مغنية لا تكتمات على شي حاجة اذن ضاراها :اوا عاودي ليا .. كي جاتك الزواج .. كي جاتك العيشة مع حبيبك العربي ...

مغنية تبسمات ابتسامة طفيفة و شافت فيها و نطقات : بعد المرات كنقول هنا نبات و هادي هي السعادة ..

و سكتات مقاطعاها واحد التنهيدة طويييلة و رجعات كملات مستانفات كلامها : و بعد المرات ...

سكتات ما كملاتش كلامها .. مقاطعاها واحد الغصة د القهرة وحلات فحلقها و نطقات بهمس : العربي صعيب بزاااف .. ما كيقبلش الغلط ...

منانة بلعات ريقها مراقباها بعينيها و تا كتشوف الدمعة هبطات سارحة على خدها و تبعوها دموع اخرين .. قربات منها بصمت جاراها لحضنها كتطبطب عليها و نطقات بحنان : ما تبكيش ادبدوبتي.. العربي راه هاكداك فزعي و خضر .. راه ما سايرش ليه فلعيالات ولف غا مع الفلاحة عند بالو كلشي قاسح بحالو ... ولكن راه خاص نتي ترطبيه و تعرفي كيفاش ديري ليه راه الرابح من لمرا و الخاسر من لمرا ..

مغنية نطقات بنبرة باكية : و كي غندير ليه ..

منانة وقفات كتشوف فيها و نطقات : ياك ممتعاش ففراشو.. كي كيتعامل معاك بعدا فلفراش.. ؟

مغنية هزات كثفها : كي كيتعاملو كاع الرجال .. لبوسان و تلماس و كنقضيو غاراض...

منانة ضيقات فيها عينيها : و نتي باش كتحسي ..

مغنية طلعات ليها التزنيكة داك الساع على وجها فاش تفكرات و نطقات : احساس زوين واخا بعد المرات كيكون لحريق غااااالب بزااف ..

منانة حركات راسها و نطقات : اوا صافي الراجل راه من فراشو تشديه و شوفي هادي خوديها من عندي .. مسألة وقت و العربي غيرجع يه.. ودي و سلم بين يديك ...

مغنية تنهدات كتمسح فدموعها و نطقات : و زعما ما يبقاش قاصح بحال هاكدا ...

منانة حركات راسها بتأكيد : معلووووم .. علاش شكون يا ختي ما يطيحش فهاد الزين مو طحيشة ...

#يتبعععع ...