معذبني غرامك ( قصة جريئة)

77

            مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

                                 Part : 77

مغنية تزنكات و جاتها الضحكة : لا ما قصدتش داك الشي ..قصدت نمشيو نشوفو شي طبيب .. نديرو تحاليل نعرفو فين كاين المشكل ..

العربي ضيق فيها عينيه قارن حواجبو و نطق بنوع من الحدة : كيفاش .. كيفاش مشكل ...

مغنية بلعات ريقها كانت متوقعة هاد الردة د الفعل منو ديجا عارفا طبايعو كيف دايرين : ما قصدت بيها والو العربي ما تفهمنيش غلط .. انا قلت زعما نقطعو الشك باليقين .. نت كرهتي يكونو عندنا وليدات يعمرو علينا ..

العربي بقا كيشوف فيها مطولا و نطق بخشونة : تا حد ما كره لولاد ولكن كلشي كيجي بوقتو .. نعلي الشطان و ركدي خليني معاك زوين ..

مغنية زادت قربات منو كثر مخدمة معاه هاد المرة الإغراء ونطقات بنعومة و دلع :وا العربي واش انا كندوي معاك باش تقلق .. انا باغا غير نفرحك بشي وليد ولا بنية تعمر بيهم كثافك..

العربي بقا كيشوف فيها ببرودة و نطق :دابا من لخر اش باغا ..

مغنية تبسمات عرفات خطتها نجحات : قالو ليا كاين واحد الطبيب فلمدينة .. خاص ببحال هاد المشاكل.. نمشيو عندو يعطينا دوا .. و نعرفو شكون فيه المشكل .. واش انا ولا نت..

العربي بعد عليها ناض بدات تنرفزو ديال بصحة حاس بيها كتخدش ليه فرجولتو : غنخرج نبدل ساعة بختها لا نصدق غا عاصي فيك ربي ..

خرج خلاها كتنادي وراه .. طلع لبلاد ديريكت عكرت ليه مزاجو ديال بصح .. وصل لبيت لبلاد حلو بالسوارت و دخل تماك يدوز هاد الليلة ...

نهار جديد .. صبح مورالها مزفت على لي وقع البارح و الضغط غادي و كيزيد عليها .. و كتزيد تكمل الباهية فاش كيوصلها الهضرة لي دايرا فالدوار على انها ممكن تكون عاكرة حيت 5 شهور و هي مزوجة و باقي ما حملات ..

طاحت دمعة من عينيها حاسا براسها ضايعة و ما عارفة ما دير .. قلبها كيحرقها من جهة العربي .. كتجي بين عينيها غير انو علاقتهم ما عندها مستقبل سوا ليوم سوا غدا غيطلقها لاما
ربطاتوش فيها بلولاد  ...

بينما هو ... كان موضوع لولاد آخر  همو.. هو مرتاح هاكدا نفسي عارف مدبرها حكيم و اي حاجة وقعات الا و فيها الخير.. عايش النهار بنهارو و الدنيا ما معمراش قلبو ... عارف اخرتها مو.. ت  ..

على عكسها هي لي كان التفكير الزايد منغص عليها حياتها .. كتفكر للمستقبل و تخطط ليه و خايفة منو و موسوسة بيه .. بلاما تحس كانت كتخرب حاضرها و ما كتتمتعش بيه و تعيشو كيفما هو ... صلاتها لي ما كانتش كتطيحها ... هملاتها و قطعاتها ولا شغلها الشاغل نو العربي يبغيها و تجيب منو وليدات ...

بلاما تحس لقات راسها كتبعد على سيدي ربي .. معتمدة فقط على قدرتها ناسية انو بلا سيدي ربي هي ما ساويا والو ...