معذبني غرامك ( قصة جريئة)

85

         مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

                                 Part : 85

كانت مغنية هازا لوليد الصغيور " محمد " بين يديها و ما قاداها فرحة تقول هي لي ولداتو كتشوف فيه شحال زوين و تطلب سيدي ربي تا هي يرزقها بالدرية الصالحة ..

هزات عويناتها فمنانة و نطاقات : لا ولدت بنية نزوجها بولدك..

منانة ضحاكات و حركات راسها بالإجاب تحمسات للفكرة : صافي سير على الله ولدي ليا لولدي شي بطبوطة بحالك يبقا فاش يشد...

مغنية ليعاتها من فخضها كضحك: يا السفالة حياتك دايرا غا على التعباز و الشدان..

منانة : و مالها علاش دايرا اختي حلاوة الزواج هي هادي .. اجي بعدا شتي العربي كيفاش كان غياكلك بعنيه و كيخنزر يا الصكعة..

مغنية تنهدات و نطقات : و راك ديما غا كيخزر فيها .. علاه فين عمرو ضحك ليا فوجهي..  غا خلي داك الجمل راقد.. ما عندي زهر معاه

منانة : اوا الله يدير ليك شي تاويل د الخير .. شوفي شويا غيتجمعو النسا نوضي نلبسو تكاشطنا و قادي ليا ميكاب نطرطق  لقلب ل لوسة السوسة..

مغنية :  يالله نوضي ...

ناضو بجوج متابعين... طلعو لبيت جبدو اللبيسات لي كراو.. منانة تكشيطة مخزنية فلبلون كاسي .. و مغنية قفطان فالغو بيبي ..

زربات عليها قادات ليها ميكاب زوين جا معاها .. و قدات حتى لراسها و شعرها جمعات نص و نص خلاتو مطلوق.. و شي خصيلات خرجاتهم مع الجناب جات فنة و ذهبها كولو دارتو و تا منانة ما قصراتش.. 

مغنية : خاص تا محمد نبدلو ليه.. اري لحوايج باش ادخليه على الضياف...

منانة كانت حاطاهم غير تمام مداتهم ليها : هاكي بدلي ليه نتي نيت ...

شداتهم مغنية من عندها بكل فرح ... بدات كتبدل ليه و تفرح بيه و منانة مخلياها على راحتها متعمدة تخليه ليها حيت عارفة غيبقا فيها الحال لا حيداتو ليها ...

بدلو ليه و بقاو تماك كيتسناو تا بداو العيالات كيجيو مع ديك لوقيتا د لغدا و صوت لبنادر بدا كيتسمع ... تمات هابطة منانة و مغنية مع الدروج هازاين جلايلهم و مغنية كتصلي  على النبي و تزغرت..

دخلو لصالون بين لعيالات .. منانة دارت على الصالون كولو سلمات عليه و كاع لعيالات زورو الوليد فيديها .. وصلات حتى لعند بن الشرادي و تخطاتها بحالا ما كايناش رادا ليها صرف مغنية ..