معذبني غرامك ( قصة جريئة)

89

         مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

                                 Part : 89

تجمعو ديك الليلة علا عشا زوين من يديدات مغنية..  تعشاو و ناض ابراهيم و منامة و ولدهم محمد رجعو بحالهم ...

و بقات غير مغنية جمعات ديك الطبلة و غسلات لماعن و تمات غاديا لبيتها... كانو كثافها طايحين عليها و مورالها تحت الصفر ... كتستغفر و تعاود باش دوزها ديك الحالة و والو .. كانت قنطااانة بلا قياس محبطة بزاااف و الإحباط كان واضح على ملامحها ...

دخل جاري معاها كيفاش جالسة و دبلانة ماشي كيف عادتها.. قرب كينصل جويجو بقا غير بسروال خفيف و نطق و هو كيناضرها بحدة عيونو:  مالك ...

مغنية تنهدات و شافت فيه و نطقات : قنطانة و مخنوقة...

العربي زاد قرب لعندها كثر و نطق : فك الحيضة ؟

مغنية حركات راسها بلا و هو نطق : و مالك ...

مغنية جاها بحالا مطلعها عليها شافت فيه فيه بخيبة امل و نطقات مبعدة منو حيت لا قاسها غطير عليه : ما مالي والو صافي نعس ...

و دارت تكات عاطياه بالضهر مخلياه غير كيشوف و ما فاهم والو... تنهد و قرب منها حط يدو على كثفها و هي تنتر منو... سخطاااتو ديال بصح بديك الحركة.. جمع يدو عندو مخنزر و طفا الضو و تكا حتى هو فبلاصتو ... عصباتو... بقا شويا ساقر كيتسنا النعاس يزورو.. تا بدا كيسمع شهيقاتها ..

عقد حجبانو و زفر بالجهد و دار شعل الضو و رجع دار عندها طل عليها لقاها كتبكي : علاش لبكا دابا ..

نطقات بصوت باكي : بعد مني ...

تنهد تنهيدة طويلة الخاطر دالنسا ما عندوش و هاد لفشوش ديالهم : دابا مالك علاش كتبكي

مغنية دارت لعندو عويناتها مغرغرين و منيخرها حمر : قنطت قلبي غيطرطق..

العربي دوز يديه على وجهو بنرفزة نطق : استغفر الله ...

و شاف فيها : علاش ..

مغنية رجعات عطاتو بالضهر: ما عرفتش..

العربي زييير على فكو مغدد: و شكون غيعرف انا ..

رجعات تاني دارت العندو و هاد المرة طرطقات فوجهو : الدوار كولو ولا كيهزني و يحطني بالعاقرة.. كلشي كيقول غير مغنية العاقرة...

العربي بلع ريقو هو براسو سمع هضرة بحال هادي فالدوار و ما دا ما جاب فيها حيت كتقال فضهرو : و هاهوما تا قالوها نتي عاقرة ؟

مغنية هزات كثفها: و شكون عرف ..

العربي زفر بسخط و نطق : هي اش دابا .. غتبقاي كتبكي...

مغنية ما جاوباتوش بقات غير كتبكي .. مخلياه ما فاهم والو... جاهل انها أنثى رقيقة خصها غير شد ليها بخاطرها يخسر عليها غير خضن و غتسكت...

تنهد و ناض وقف و نطق بخشونة: لبسي عليك لمستور و غطي راسك و تبعيني كنتسناك برا...

مغنبة هزات فيه عويناتها  بذهول و نطقات : فين انمشيو..

العربي شاف فيها كيلبس عليه و نطق : طلقي راسك ...

✨

خليو تعليق على كل فقرة عجباتكم .. و خليو نجمة ⭐️ على اي بارت قريتوه