معذبني غرامك ( قصة جريئة)

21

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 21

فدار القايد...

كانت كيف العادة ما سايعاها فرحة .. علاش ما تفرحش و هو خطيبها جاي ضيف عندهم .. وصلاتها ليها منانة سخووونة ...

مشات كتجي بدلات عليها و تعطرات مزيان و ضرباتها بتكحيلة بلدية غرغرااات عينيها مزيااان و دوزات على شفايفها فعكر ... طلقات شعرها كتمشط فيه و كتشوف انعكاسها فلمراية ...

مرة تنهد .. مرة ضحك مرة تجمعها مرة تعقد غوباشتها .. هادشي كلو دارو فيها حب العربي .. خلاها بلا عقل .. سيغتو دابا فاش ولات محسوبة عليه زادت طاحت فيه كثر من لقياس

هبطات لتحت لكوزينة روايح النقا كتعطعط ... واقفا على ديك التفلية بيديها هي لي طيباتها كدوق واش هي هاديك ...

و هزات شويا فطبيسيل صغيور و داتو لمها : مي هاكي دوقي واش جات مزيانة ..

حليمة شدات ما عندها ديك الطبسيل و ضحكاااات كطلع فيها و تنزل : هاي هاي هاي على النقا و التاويل و لحداكة .. انا لي والدا ..

مغنية تزنكااات و الإبتسامة رفعات حنيكاتها لموردين.. قليل فاش مها كتشكرها ديما كتنكر عليها و تنقص منها .. فاش كتشكرها فكتجيها قدااااش ..

ذاقت حليمة من التقلية و شاف فيها و علامات الرضى على وجها : التقلية دبنتي لا يعلى عليها ..

مغنية طلع ليها المورال كثر من لقياس قليل فاش مها كتشكر شي حاجة ديالها : بصحتك امي ..

و هوما مازال كيهضرو تا دخلات عليهم منانة الكوزينة كتعيط : مغنية .. خالتي حليمة ...

مغنية غير سمعات صوت منانة و هو قلبها يبدا يضرب بالجهد ..قربات عندهم منانة سلامات عليهم و نطقات بهمس فودن مغنية : جا خطيبك يا ختاااي ...

مغنية زمات شفايفها كضحك و التزنيكة طلعات ليها على وجها كااامل .. و الفيلم كامل داز على عين حليمة .. ناضت وقفات: اول نمشي نسلم على راجل بنتي و ندير الصواب ...

منانة : سيري اخالتي الله يكبر بيك ..

حليمة : حنى وياك ابنتي ..

و خرجات و خلاتهم بجوج .. مغنية غي حضات مها مشات و هي التباتة كلها طير .. شدات فمنانة و نطقات : جا الحبيب ديالي.. جا زوجييي

منانة طلعاتها و نزلاتها هازا حاجبها : ويلي با الثباتة و الرزانة طارت... ااايه جاااا يا لالة .. هاد الليلة غيدويو على الأمور د العرس و يحددو امتى بالضبط...

مغنية خرجات فيها عينيها : حلفي بالله اصحيبتي...

منانة حركات راسها كتأكد هضرتها : اقسم بالله .. قالها ليا با قبيلا .. وراه جاب ليك حقك من لحولي كتفة قدها قداش...

مغنية تبسمات قلبها قيدردك بالفرحة : لهلا يخطيه مسكين .. انديرو فوق راسي فاش نتزوجو انا و العربي ...

#يتبعععع