معذبني غرامك ( قصة جريئة)

01

مْــــعَذْبْنيِ غْــــرَامْكْ

" باش يفيد البوح الا كان المقصود بوح ... "

بقلم : I.Imy

Part : 1

ريحة الحرت عاد محروت عاطيا فنهار زوين دافي من بعد شتا باااارد... واقف على شغلو بلباس لخدمة داير ترازة و فوق راسو و هاز فيدو صابة كيقاد فلحواض و يدير لما مين يدوز عندهم لكوت اكوت ولكن هو مشات فيه بلية السقا بالصابة...

يدو رشة مزغبة و قاصحة عروقها بارزين و مسمرة بالشمس مزير على اليد دالصابا و هو كيشوفهم جايين ...
جايا كضحك و تمختر ما هامها حد هازا سلة ديال لفطور في يدها و كتهضر و تضحك مع باها عنين لخدامة قربو يطيرو و يجيو عليها ...

حطات السلة تحت واحد الكرمة كبييرة كتولد من جدورها فوقتها جايا بين واحد البير كبير و غاارق و عمر ما نشف ... و فرشات اللحاف لي جايبا و بدات كتعيط عليه بالجهد: وااا لعربي العربي اجي تفطر

باها كان كيشوف في الخدامة والأرض و فولدو كيفاش واقف على شغلو تنهد برتياح كيشم لهوا نقي تا وقف عليهم العربي مدرق الشمس عاقد حجبانو مخنزر و نطق بصوت رجولي صلب : السلام عليكم ابا...

وشاف فيها مخنز و كمل : نتي شحالمن مرة كنقول اصليت مك منعاودش نشوفك كتدوري في لبلاد و الخدامة كاينين...

ضحكات كتكب القهوة و الحليب: تااا نت اخاي العربي راه ما بقا ليا قدما فات ونمشي لدار راجلي يعني ما فيها باس غير دير عين ميكة

العربي غسل يديه في الساقية و كلس: بقاي تستري ما دام مزالا على دمتنا و طلعي ماحيد ليك حد

ضحكات بالجهد كتشالي بسالفها : ها نت اخويا شوف الشعورات شوف السوالف خليني نطلقهم يطيرهم الريح و يتنفسو شي شويا مالك

ضحك باهم على هبالها عارف العربي ما عندوش مع ديك الملاغة و هي من النوع القلااااي لي واحد كلشي ضحك : خليها اولدي غنتوحشو حماقها

العربي تنهد و حرك راسو بإحترام و نطق : ابا بيناتنا ماكاين نت مشكل ولكن قدام الخدامة لا

الأب بن عيسى: و غا ساعف اولدي داب توحش هبالها

تبسم العربي و شاف فيها كيفاش كضحك طاايرا بالفرحة حيت عرسها بقات ليه سيمانة كبرات غير لبارح و هو كيسلخها فاش كيلقاها قابطا العكار كتعكر بالتخبية هي و صاحبتها في جنانات... حرك راسو يمين و شمال و بدا كيفطو و ندامج معاهم في الهضرة ...

فبلاصة خرى ... دار القايد
دار القايد لي كانو فيها الأشغال على قدم و ساق تخمال و الحكان و لفريك كيوجدو لعروسة الجديدة ...

دخلات كتتسلت لبيتها قابطا فكريناتها لمضفورين الطوال.. سدات موراها لباب و مشات دبغيكتومون لبلاكارها حلاتو بانت ليها لقرعة دالشكلاط لي جاب ليها عزيزها... تبسمات بحماااس و حلاتها و بدات كتاكل منها منشوياااا عندها لحلاوة و الشكلاط بالأخص بحال شي دغوك ...

سدات القرعة فاش خدات جرعتها الكاافية و رجعاتها لبلاصتها : اححح لله سير يا عزيزي لهلا يخطيك علينا ...

دارش شافت راسها في لمراية حناكها حووومر بالشقا و عرقااانة مطمطات شفايفها و حلات لمجر لي فيه لعكورة ديالها لي دايراهم بالتخبية على مها .. كانت مهوووسة بلعكورة و الماكياج كولو : ندير شويا دلكلوص بعدا تا لا جات شي خرجة على غفلة

حلات لادخوس ديالها و هي تصدم كتلقا ماكياجها كولو مخرب لعكورة كلهم مهرسين و لكحل مكبوب تما لموهيم ما بقات تا حاجة فيه تما صالحة... عنيها دغيا عمرو بالدموع و حسات بقلبها كيتقطع شحال و هي كتجمع فيه بالتخبية على مها كتوجدو تا هي باش مين تزوج تلقاه... طاحت ليها لاتخوس من يديها و هي طاحت جلسات حداها فشلااات و حسات بالحكرة عرفات مها مولاتها ...

مها لي محرما عليها العيشة خايفا لا تجيب ليها شي فضيحة و تتشوه وسط الدوار .... بقات كتبكي بحرقة و تمنات كون باها و خوتها كانو عايشين كانو مفششينها غير خطاوها مها من قوة لخوف عليها خنقاتها و ضغطات عليها .... نطقات بصوت خافت و حزين: علاش امي كديري فيا هاكدا حرام عليك امي عرام عليك

بقات كتبكي تقهرات ديال بالصح شويا و هي دخل مها محزمة بالفواطة و كتقلب عليها قارنا جواجبها من منضرها كانت باينا من النوع د النسا لي صعابات بزاف فطبعهم : مغنية مغنية .. يا ديك بنت لحرام فينك لله يعطيك غبارة و نتهنا منك شكا ديري تماك

شافت فيها وجها حمررر و منفوخ بالبكا و زادت عندها: اشنو كاين لاش كتبكي

وقفات مغنية هازا ديك لاتخوس فيديها هاكداك كلها مخربة و نطقات بصوت باكي : علاش كديري ليا هاكدا علاش ... علاش خصرتي ليا ماكياجي كامل علاش

طلعاتها و نزلاتها مها بنضرة " حْليمة " كلها استنقاص و تحقير و نطقات ببرود : اه هرست مو كولو و من بعد... نخليه ليك باش نلقات كتجلخي بيه فديك الكمارة و تهبطي لجنانات تبداي تتصايدي و نتي و زلايلية هاه ...