معذبني غرامك ( قصة جريئة)

74

            مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

                                 Part : 74

دبلات ضحكتها و بقاو غير الدموع من عينيها كينزلو .. بكاات بكاات تا فاجات على قبلها و حسات على الأقل بشويا ديال الراحة.. وحسات براسها ثقااال عليها بزااف ..

شاف فمنانة و نطقات لعياء: عرفتي شنو بغيت غير نعس .. نعس ما نرجعش كاااع نفيق والله قلبي كيحرقني بزاااف ..

منانة تنهدات بأسى على حال صديقتها المكسور و نطقات و هي كطبطب عليها بحنان : نوضي ادبدوبتي نديك لبيتك تنعسي هاد الليلة ... و يصبح و يفتح .. رتااحي و انا معاك دابا واحد اليومين عاد غنمشي .. انصوني لبراهيم نرغبو يخليني ..

مغنية تنهدات و حدها حركات راسها بآه و ناضت مشات لبيتها و منانة معاها غطاتها كتبطب عليها بحالا هي مها  .. لا طلما كانت منانة اكبر من مغنية بالسن ب 4  سنين ..و اول مرة تلاقاو هي فلجنازة ديال بابات مغنية و خوتها .. كانت مغنية ما فاهمة والو و ما عارفة تا معنى المو.. ت اش هي ما كانتش فاهماه..

تا وقفات عليها منانة لي كانت فضوولية ديك الساعة و كانت اكبر منها .. شداتها من يدها و خرجاتها يلعبو برا و بدات كتفسر ليها ما معنى المو.. ت لي براسها كانت فاهماه غلط .. كبرو بجوج .. كي لخواتات.. مغنية كانت كتهرب من جبروت مها لحضن منانة لي كانت ديما كتحن فيها و تبغيها كيفما هي و عمر تنمرات عليها على وزنها الزائد بالعكس ديما كانت كتعزز ليها ثقتها بنفسها .. صحبتهم كان الدوار كولو عارفها ... و شاهد عليها .. عمر منانة تآدي مغنية و عمر مغنية تآدي منانة ..

خرجات من عندها و مشات للكوزينة كريشتها قدامها كتدبب بيها كانت فشهرها الخامس من الحمل... كملات داك الشي لي كانت مغنية كتقادو .. وداتو ليهم .. سولوها على مغنية فين .. قالت ليهم عيانة و نعسات ..

ما علقوش.. كانو متفهمين وضعها حيت لا لعربي لا بن عيسى كانو عارفين حالتها...

و بقا الحال على ما هو عليه تا دازت حوالي.. جوج سيمانات .. جوج  سيمانات فيهم مغنية كانت كتداوي راسها براسها كيف كل مرة.. كتطلطب على نفسها و تلملم شتاتها قطعة بقطعة .. كان قلبها كيقول حاجة و عقلها كيتاافق عليها .. و هي وسطهم تابعاهم ..

فاقت فالصباح حنيكاتها مزنكين بالسخونية د دلمانط باش مغطية .. ما لقاتوش حداها .. لقات غير 200 درهم عند راسها .. هزاتها عرفاتو هو لي كيخليها ليها .. مع انها ما كتختاجهاش حيت هو ما مخصصها من حتى حاجة..