معذبني غرامك ( قصة جريئة)

112

..
مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

‏ Part : 112

ابراهيم قرب منو و شدو من دراعو موقفو حيت بان ليه غادي طافج كي التور : تهدن العربي .. تهدن اصاحبي ...

العربي نتر دراعو بالجهد مبعد منو و نطق و الغضب مغلف نبرة صوتو الرجولية : اش غنتهدن اش .. واش باغين تفرقوني على مرتي ..

ابراهيم تنهد و دوز يدو على وجهو ندم لاش كاع قالها ليه بهاد الطريقة : ما غيفرقك على مرتك حد اصاحبي غي تهدن و حضر معايا عقلك ..

العربي زفر بجهد مخنزر و كولو كيغزل : ما مهدنش ابراهيم غنمشي دابا نجيب مرتي من تماك .. والله ما نطلقها اقسم برب الكعبة ما نطلقها ..

ابراهيم حرك راسو و نطق : غترجعها العربي ولكن غير بلعقل غير بلعقل .. سير هبط ليك دابا ..خود دوش فطر و جيب عمي بن عيسى هاد الليلة ترجعها حليمة ضربها على حسابي ..

العربي عض على شفتو التحتانية مبرد فيها هاد لغدايد كيزفر نفس سخوونة من مناخرو كان ناوي يمشي يقلب على حليمة الدنيا و يجيب مرتو و يجي و هو غيعرف كيفاش يدير يراضيها ...

ابراهيم : يالله ما تقصحش راسك انا معاك اصاحبي ..

العربي شاف فيه مطولا و زفر بجهد محرك راسو يالإجاب : واخا ...واخا ..

ابراهيم ضبضب ليه على رقبتو و نطق : يالله سير دابا و بيناتنا الطيليفون ...

العربي حرك راسو و بالإجاب و كل واحد فين زاد .. العربي هبط لدار و ابراهيم طلع لطوموبيلتو ..

داز الوقت و اليل طاح وورا الصلاة ديال التراويح ...

فدار القايد ...
كانت حليمة جالسة فالصالون مع الحاجة و منانة ... و هازا شوكتها و غير كتنكر : دابا لاش جاي لعندي يانا هاه لاش جاي ..

الحاجة نطقات بهداوة : رجوع الله احليمة جايين لدار القايد .. خلي وكان يوصلو نشوفو اش عندهم و اش بغاو و داك الساع يكون خير ..

حليمة زيراات على فكها و نطقات : انا لي ما نسوا ما نصلاح انا لي عاطيا بنتي لولد لخميميس لحواز ..

الحاجة شهقات و خرجات فيها عينيها و نطقات بحدة كتشير ليها براسها لمنانة : يعطيك الدل نوضي غبري من قدامي نوضي احليمة علمي لبنت تكعدي ..