معذبني غرامك ( قصة جريئة)

34

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

                                 Part : 34

كان جالس هو و العربي و بن عيسى و شي رجال اخرين فطبلة وحدة .. دفعو ليهم لعشا تعشاو و قراو ما تيسر من القرآن.. و بداو الرجال شويا كيتفرقو...

بقا العربي و براهيم كيتهاودو تا قرب منو ابراهيم و همس ليه فودنو : نوض اصاحبي طلع لدار شوف مراتك ..

العربي عقد حجبانو و جابو بنفس الهمس : خليها ياك غدا غنجيبها لعندي ..

ابراهيم هز تيليفون كيصوني لمنانة و نطق : نوض اصاحبي شوفها غا كي جات داك الزواق كامل لمن مديور اسي لعريس تكعد..

جاوباتو منانة قبل ما ينطق العربي : الو منانة .. ها العربي طلع .. علمي منانة تخر عندو .. يالله .. لباب الساحة

قطع معاها و شاف فالعربي و نطق نطلعها : شو الراجل كي تزنك .. احياني عليك الفقيه ..

العربي تبسم ابتسامة خفيفة و تنهد و ناض فين قال ليه ما باغي يبين والو قدامهم .. كيحضر بين عينيه باه و كلمتو لي عاطي..

خرج من لخزانة طلع من الجهة ديال الدار قدام الباب لي غيخرج لجردة و وقف كيتسناها..

لداخل .. كانت مغنية جالسة بقفيطين  خفيف ديال جوهرة محزمة عليه بحزام من نفس توبو ... و فكات لمشيطة ديالها وجمعان شعرها بقاو غير شي خصيلات صغار من لقصيصة هابطين ليها على وجها ..

جلسات حداها منانة قريبة منها و نغزاتها و همسات فودنها : نوضي عريسك كيتسناك باغي بشوفك..

مغنية خرجات عينيها بدهشة و شافت فيها و نطقات : حلفي بالله ..

منانة : اقسم بالله صونا ليا براهيم قال ليا العربي باغي يشوف مغنية ...

مغنية عضات على شفايفها و حرفيا الفشلة شداتها و الخلعة و قلبها ضرب بالتسعين : و فينو دابا ..

منانة : نوضي راه حدا الباب د الجردة..نوضي تكعدي ما تخليهش يا ختي كيتسنا ...

مغنية بلعات ريقها و شافت فيها و نطقات : كي كنبان واش زوينة .. شعري مقاد لماكياج باقي مقاد ..

منانة حركات راسها بالإجاب و نطقات : اه مزيانة مزيانة ... غير نوضي خلاااص .. راه كيتسناك قدام باب الساحة ..

جمعات مغنية الوقفة .. و خرجات كتزرب غادا قاصدا الباب فين كيتسناها.. قلبها كيترعد بحال يديها .. حاسا بالفرحة و الرهبة و الخووووف فنفس الوقت .. كلشي مخلط عليها...

ما وصلات لديك الباب تا عرقات و نشفات كيبان ليها واقف بطولتو و تجربدتو و كثافو عرااض كان عودو شديد ... عاطي بالضهر ويديه وراه شادين فبعضياتهم..
عضات على شفايفها و حاولات تبتاسم و التوتر دااير فيها ما بغا..
قربات منو و حطات يدها على كثفو و فنفس اللحضة نطقات برقة : العربي..

العربي دار العندها مبعد شويا عاقد حجبانو...  هز عينو من الأرض مطلعها مسكانيها من رجليها حتى لراسها و عينيه استقرو على وجها .. كيتراقصو بين ملامحها  و هي عينيها ما رصاوش فيه نهائيا من قوة التوتر.. غير تتهز فيه عينيها ترجع تحدرهم تا نطق هو بصوت رجولي خشن : لاباس عليك ..

مغنية تبسمات شافت فيه و رجعات حدرات عينيها و نطقات بنفس الرقة :  انا لاباس .. و نت بيخير .. و عمي بن عيسى ..؟

العربي حرك راسو بالإجاب و نطق بنفس الخشونة حتى هو : الحمد الله .. 

عم الصمت لثواني و الجو كان مشحون بالتوتر .. توترها من نضراتو و هو عاقد حجبانو .. تا كسرو هو ناطق : على خارجا بلا زيف ..

مغنية بلعات ريقها و هزات فيه عويناتها كيفثنو و نطقات : نسيتو.. فاش قالت ليا منانة بغيتي تشوفني خرجت مزروبة و نسيتو  ...

العربي حرك راسو بالإجاب و نطق : يالله دخلي بحالك ..

مغنية تبسمات و نطقات : واخا .. يالله تصبح على خير سلم ليا على عمي بن عيسى ..

العربي حرك راسو و نطق  : يوصل انشاء الله ..

تبسمات ليه ولقات عليه آخر نضرة قلبها كيدق بإسمو.. ودخلات بحالها و هو بقا متبعها بعينو ..  ينكر و يقول ما جاتش زوينة غيكون كذاب ..  تنهد تنهيدة طوييييلة .. و زاد بحالو رجع لخزانة عند الناس ..

و هي دخلات عليييين تفرررفررر بالفرحة.. ما طالبا منو والو طالبا غير شوفة منو .. و هاهي دابا رجعات مراتو .. و غدا غيرجع جامعهم سقف واحد ...

#يتبعععع