معذبني غرامك ( قصة جريئة)

04

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 4

شهقات بالجهد مخلوعة و هزات فيه راسها كتبلع ف ريقها غير طلعات معاها ريحتو عرفاتو .. و زاد كمل فاش شافت تخنزيرتو و هو كينفض راسو بالجهالة حيت قاستو بيديها فيهم الحنة : مكتشوفيش قدامك عورة ولا مال اصل مك

لسانها عواج بقات غير كتشوف فيه بعويناتها و الرجفة شداتها: س س سمحليا

شاف فيها مخنزر كيطلعها و يهبط و نطق بلكنة لاذعة : حيدي من قدامي سيري غسلي يديك من ديك لعفن

حركات راسها بواخا و هزات شتاتها و مشات كتزطم في جلايلها لكوزينة و هو زاد خرج ليوم غيبات فليت دلبلاد نفر من الدار...

دازت الليلة و جا نهار جديد... نهار لعرس...
كيتسمع صوت الموسيقى من بعيد...و لعروسة و لعريس بارزين... و الناس كتشطح في الوسط... دازت ليلة زوينة بكل المقاييس كانت مغنية لابسا تكشيطة فنة فالشيبي و طالقا شعرها و مصاوباه و دايرا ماكياج زوين بارز ملامحها حيت مشات مع لعروسةعند لكواف هي لي صايبات ليهم...

كتدور كي شي فراشة و تتسخر لنكافة و لعروسة لا حتاجو شي حاجة.. تا سالا العرس على اتم وجه...

وقفات منانة كتسلم على باها و على العربي و كتبكي ماشي ساهلا تجي رايحا من داركم لي تربيتي فيها و عشتي لحلوة و المرة فيها ...
بن عيسى كيمسح دموعو : صافي ابنتي من لبكا سيري مع راجلك راك قريبة لينا مغنعزوش رجلنا عليك و ولد القايد راه ديما غيجيبك عندنا...

منانة باست ليه يدو: لهلا يخطيك ابا لحبيب

دارت عاطياهم بالضهر خارجا من دار باها بالزغاريت و الصلى على النبي... و معاها مغنية هازا البوكي دالورد لي لاحت منانة فالكسوة لبيضة...

ركبو كلهم في طموبيلات باش جاو راجعين لدار القايد منوضين الحيحة بلكلامسون... تا وصلو لدار ...
طلعات الحاجة مامات العريس و مغنية مع منانة لبيتها فين غتكون هي ابراهيم ...
دخلات ليه حلات فمها بيت قدو قد صالونهم و مفرش مزيااان و مقاد ...

الحاجة نطقات كتزيد توريها الحمام لي لداخل في لبيت ما تحلفي عليها غا دار فلمدينة: هانتي ابنتي بيتك غتلقاي فيه كولشي لي فتحتاجي لحمام راهو فيناتي لا بغيتي دوشي ترخفي عضيماتك و ما تخافي من والو انشاء لله كلشي غيدوز بيخير ولدي راه قاري و فاهم

ختمات كلامها بغمزة خفيفة و شافت فمغنية: مغنية عاوني صاحبتك تبدل

مغنية حركات راسها بالزربة : واخا الحاجة

خرجات الحاجة خلاتهم غير بجوج منانة كانت كترجف باين عليها الخوف و مغنية كثر: شوفي يا صاحبتي كي كنرجف تقول انا لي غنهزو هاد الليلة

منانة شيرات عليها بمخيدة صغيرة: اوا سيري لله يعطيك العداب كتزيدي غتكملي عليا اجي عاونيني نفك شعري و مسحي ليا لماااكياج

مغنية: اويلي عزيزي داب و هو دخل

منانة : لاء عزيزك عاد حلات ليهم لقصارة غيتعطل
مغنية : اوا صافي منها نيت خودي دوش يلقاك عزيزي كي لحمامة.. يا لحمامة

ضحكات منانة و عنقاتها: يخليك ليلي ادبدوبتي

بعدات عليها كتضحك و بدات كتفك ليها لمشطة و مسحات ليها لماكياج و دخلات هي وياها لحمام منانة دوش و لوخرا كتعاونها خرجو دهنات صحتها كولها ب بدي لوشن ريحتو كتحمق و لبسات شوميز بياض قصيرة ولكن بينوارها طويل بحال دالأميرات ... سرحات شعرها مخلياه على راحتو و جلسات فوق السرير كيساينو بجوج تا سمعو الدقات في لباب و صوت ابراهيم كيناديهم بجوج عارفهم كي لحلاقم ما كيتفارقوش...

مغنية كتقاد فيها بالزربة و دوي: هاني مشيت .. " كتأكد عليها " هاانتي عاودي ليا غدا بالتفاااااصيل اش وقع و هانتي رخييي راسك باشما توعتيش

منانة شاداها الرعدة د الخوف و الضحك : كتدوي بحالا مجربة اساطة

مغنية ضحكات بخفة : اااي لا را غا كنسمع لعيالات كيقولوها.. يالله قو.. دي عليا راه عزيزي غيدخل يجرني من شعري يلوحني برااا

خرجات بالزربة شافت ابراهيم واقف كيتسنا تبسمات ليه و حدرات راسها منو حشمانة ومشات كتجري خلاتو يدخل لعند عروستو حمامتو يدخل بيها ...

مغنية ...

حطات راسها على لوسادة صحتها مهدووودة و فيها لموت دالنعاس ... ما نساتش تتفكرو هو وتختم بيه ليلتها كيف العادة و تتفكر كل تفاصيلو و كيفاش كان كيتعامل في العرس تنهدات تنهيدة طويلة و نطقات مغلوب على امرها: يا ربي راك عارف بلاما نحتاج نعاودها يا ربي حققها يا ربي

غمضات عنيها مبتاسمة تا دااااتها عينها و مشات فنوم عمييييق بحال شي درية صغيرة بجسد مرة ناضجة ...