معذبني غرامك ( قصة جريئة)

26

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 26

بعد مرور يومين ..

و بالضبط نهار العقد ... نهار بالنسبة لمغنية كان ماشي عادي .. كانت فقمة توترها و قلبها مقبوووووط عليها لأقصى درجة .. حاسا بالحجر محطوط فوق صدرها .. عيااات ما تنفض فهاد الإحساس و وااالو ..

كانت واقفا قدام لمراية بجليلبها البيضة ديال لعرايسات... بالشال ديالها مذهب غير لايحاه هاكدا فوق شعرها لي مقاداه .. دايرا ماكياجها البلدي المعهود.. و لابسة بليغة فالدعبي فرجيلاتها .. مقومة قوامة لعروسة .. هزات خاتمها دالزواج تا هو لبساتو و هزات الصويك ديالها فيديها فيه لاكارط و المسائل ديالها و تنهدات التنهيدة الألف هادي و هي كتحااااول تزيح داك الضيق ما صدرها و وااالو عيااات ... خدات نفس عميييق و نطقات : يا ربي لحبيب وسعها عليا يا ربي لحبيب و كمل عليا بالخير انا و داك ولد الناس يااا ربي لحبيب ...

سمعات الباب تحلات و معاها سمعات صوت منانة كتهبط مسميتها : مغنية .. وااامغنية وا صاحبتي زيدي خلاااص..

مغنية دارت لعندها : هانا اصاحبتي .. قولي ليا كيف جيت ..

منانة تبسمات كطلع فيها و تهبط جات كتفتن بالزين : جيتي فنة يا ختي و طاح عليك السر ماشاء الله تبارك الله ...

مغنية خدات نفس عميق مرة اخرى و من ملامحها كان باين عدم ارتياحها و نطقات : حاسا بيلا غتوقع شي حاجة خايبة اصاحبتي .. قلبي مقبوط عليا من لبارح.. و هاد الصباح كثررر ...

منانة شدات فيديها و زيرات عليها كتحاول تنقل ليها شويا من طاقتها الإجابية و تحاول تحسسها بالأمان و نطقات : عادي اصاحبتي هاديك غير الخلعة راه تا انا كانت شاداني نهار العقد .. نتي غتعقدي و هي غتمشي .. اويلي مالك دايرا هاد الحالة راه في العقد باااقي الدخلة ماشي دابا ..

مغنية غمضات عينيها و حلاتهم كتحاول تطرد ديك الغصة لي عكرات فرحتها : ما عرفتش اصاحبتي .. يا ربي يدوز هادشي على خير ..

منانة : زيدي اصاحبتي ما عندو ما بوقع .. العربي و با راهم سبقونا.. و براهيم من قبيلا و هو كيتسنا .. زيدي نهبطو راه خالتي حليمة غتسفل عليا انا وياك زيدي ...

و جراتها هبطو بجوج .. و هي كتتغزل فجمالها و تمدحها فمحاولةمنها أنها تخرجها من داك الحالة الخايبة لي شداتها ..
هبطو ركبو مع ابراهيم .. و زاد بيهم لمدينة عند مكتب لعدول لي دفعو عندو الطلب و لوراق ...

مسافة الطريق و كانو تماك .. لقاو البيكوب د العربي واقفا فالسطاسيون لي تماك .. كان هو بن عيسى وصلو بشي دقايق قبل و جلسو كيتسناو ...

مغنية فلحضة يديها فشلو عليها بقوة الخوف و الخلعة و كلشي تخلط عليها .. بقات كتقرا ديك مكتب لعدول و الرعدة كطلع معاها .. كانت زوبعة من الأحاسيس اللاذعة لي دغدغات قلبها و خلاتو يدق بدا حساب .. حساتو غيخرج من بلاصتو .. كانت فرحة مخلطة ليها بخوف .. بغصة.. بالحب ديالها لكبير للعربي.. بالتوتر لي كان سيد الموقف فهاد اللحضة لدرجة يديها ما قدراتش تتحكم فيهم ...

دخلو للمكتب دلعدول و حليمة شادا فيها و كتقرا فالقرآن كانت حتى هي فقمة توترها و قلبها مقبوووط عليها و كتقول عادي راه الزواج هادا ... لقاو بن عيسى و العربي كيتسناو فيهم تماك ..

هزات مغنية عينيها فالعربي كان بعيد عليها .. بدات كتستوق فيه النضر و هو لابس و متأنق بهاد المناسبة .. لابس سروال كحل و شوميز بيضا و صباط موكاسان باقي جديييد.. و ريحتو الرجولية سابقاه و مقاد اللحية و التحسينية لموهيم داير بحالتو والله ما تقولي غا ولد لمدينة زيادة و خلوق ...

سلمو على بعضياتهم فجو عائلي زوين .. بن عيسى ما كانتش قاداه الأرض من كثرة الفرحة .. نهار كبييير عندو هادا لي غيتزوج فيه ولدو .. غادي يزوجو و يتهنا عليه.. غيزوجو ب بنت الناس لي فعلا تستاهلو و كتبغيه ..

دخلو لبيرو دلعدول.. جلسات مغنية و العربي انفاص مع بعضياتهم... و هي حادرة راسها و حنيكاتها موردين بقوة الحشمة و التوتر كان بادي عليها .. شي لاحضو حتى العربي و هاد المرة حقق فيها مزيان و لاحض كيفاش جات زوينة ..

ما عطاش للموضوع اهمية .. حيت كان من ديما كيشوفها كتصاوب و تقاد فحالتها بمناسبة و بدون مناسبة ..

تنهد تنهيدة طويلة كيسمع لكلام لعدول لي كان موجه لمغنية .. سولها واش خدات صداقها جاوباتو بآه .. و سولها على الشروط ديالها لي مكتوبين فالعقد لي كانو شروط عاديين مافيهمش شي جديد.. جوباتو غير بآه .. و مد ليها العقد تقراه باش يسينيو عليه ..

شداتو من عندو يديها كيترعدو من توترها غير دارت راسها قراتو .. و هي كاعما قرات منو تاشي حرف ..

العدول نطق : الا قريتيه سني ابنتي هنا ..

وراها فين ... و سنات فين وراها و الستيلو حرفيا ما كانش زاكي فيديها بقوة ما كيترعدو..

و خدا من عندها الكتاب فاش سنات و مدو لعربي : سني هنا اولدي ...

و وراه تا هو فين يسني .. و داك الشي لي كان .. سنا العربي بعد تردد طفييف و هنا رجعو زوج و زوجة بشكل رسمي ...

#يتبعععع غدا انشاااء الله 🤤