معذبني غرامك ( قصة جريئة)

102

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

‏ Part : 102

وقع الصمت لثواني .. و مغنية كتحاول تستوعب كلام مها .. و الصدمة كتبان على ملامحها : كيفاش!!!

منانة بلعات ريقها و عاد طلع معاها اش قالت ليها .. وعات على راسها انو فجراتها ليها فوجها .. بلعات ريقها مرة اخرى و نطقات : يعضك ربي ابنتي .. ربي كبير ..

مغنية بلعات ريقها بمرارة و حدرات عينيها لكرشها و نطقات بهمس : كنت حاملة ..

منانة بقات غير ساكتا و كتشوف فيها و عينيها كيفيضو بالدموع .. و هي مدات يدها كتترعد مغروس فيها السيروم.. و حطاتها على كرشها كتتحسسها ببطء و غمضات عينيها بألم و نطقات بنبرة كتلخص كل قهرها و حزنها : كنت حاملة .. علاش يا ربي علاش .. علاش انا علاش ..

حليمة قربات لعدها بحالا معنقها و نطقات بصوت متقطع : حرام ابنتي حرام .. غتعرفي حسن من سيدي ربي .. اصلا ما يستاهلش لولاد ابنتي ما يستاهلهمش..

مغنية بقا غير كتبكي بحرقة و قلبها كيتقطع.. ربي لي عالم بحالها حسات بالدنيا كلها ضدها .. تنهدات بحرقة كتسمع المواسات مها لي كانت كتزيد تكمل عليها و تتغرس فقلبها بحال شي خنجر : ما بغاكش ابنتي من النهار اللول ما بغاكش .. ما كبرش بيك .. كنت كنشوف كلشي بعينيا ابنتي و سكت .. خليتك عرفتك كتبغيه.. ولكن هو ما كانش كيبغيك..

سكتات كتطبطب عليها تسمع لصوت بكاها و رجعات كملات : بكي ابنتي بكي و فشي قلبك .. نهار كنتو عند لعدول نتي فرحانة علين طيري و هو داير داك الشي فوق النفس .. كنت كنشوف كلشي و سكت ابنتي نويت ليك على لغدر سمحي ليا ... سمحي ليا ابنتي .. سمحي ليا ...

و نهار العقد ماشي غير حليمة لي لاحضات انو العربي ما كان حامل هاد الزواج ما كان قابلو ... شي لمغنية الحب و العشق ديالها ليه كان عامي ليها العينين..

بقات كتبكي بقهر و تفكيرها منحصر فحملها لي ضاع .. حملها لي ايام و ليالي و هي كتطلب سيدي ربي عليه .. طاح ليها بلاما تسيق ليه لخبار انو كاين ..

دازت ليلة كحلة .. ما بغات لا تاكل ولا تشرب غير كبكي نسات حتى لوجع لي عندها فكرشها من آثار الإجهاض و العصى لي كلات.. و العربي غاب عن تفكيرها بمرا ..

و فالجهة المقابلة حتى هو دازت عندو ليلة طويلة .. ليلة الندم فيها حرفيا كياكل فيه و يضمرو.. عينيه حمااارو و نامو بلعيا و الإجهاد النفسي ولكن النعاس هرب منهم .. غير كيتفكر انو هو السبب تا جهضات كيحقد على راسو ..

تنهد تنهيدة طويلة و طلعات معاه ريحة ما غريباش عليه ريحة ديال شقيفات.. دار كيلقا وحد الدراري مشدودين معاه كيتناوبو على واحد السبسي بالتخبيا واحد يحضي و واحد يتكيف و هي غديا ..

شافوه كيشوف فيهم و هو ينطق واحد فيهم ماد ليه السبسي: الخاوة هاك تكيف باين فيك رجولة ..

العربي مع انو حتى هو كيشقف مرة مرة ولكن ما كانتش عندو الكانة : غير تكيف العزيز ما عنديش ليه الخاطر ..

هاداك خونا مدو لواحد فصحابو و نطق : و علا خاطرك العزيز ..

✨

ڤوط + تعليق على اي فقرة عجباتكم 🩷🩷✨