معذبني غرامك ( قصة جريئة)

48

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 48

الليل تناصص و هي واقفا كتسلم على مها فباب الدار من بعد الليلة د لحزام .. كتهمس ليها فودنها كتوصيها كيفاش تتعامل مع راجلها و شيخها و كيفاش تحافض على دارها ..

مشاو عائلتها و مشات معاهم حتى منانة ما خلاهاش ابراهيم تزيد اكثر دخلات هي و بن عيسى و العربي .. هازا جلايل تكشيطها و حاسا بقلبها مقبوووط عليها .. عاد طلعات معاها انها بقات بوحديتها فحياتها الجديدة .. العائلة ديالها لي كانو معمرين عليها هاد الأيام كيمشيو و يجيو صافي من دابا لفوق غيشدو رجلهم تا للمناسبات حيت ما جاتش يبقاو خيطي بيطي و هي عارفاها..

تنهدات تنهيدة طويلة .. و شافت فالعربي و بن عيسى داويين و هي تنطق بهداوة : تصبحو على خير ..

بن عيسى : معرضة خير ابنتي سيري ترتاحي ..

و ديك الشي لي كان عطاتهم بالضهر و تمات غادا لبيتها مخليا العربي متبعها بعينيه .. سدات الباب و دخلات و هو يتلفت لعند باه : شربتي دواك ابا ..

بن عيسى عض على لسانو و نطق : لا نسيييتو اولدي ..

العربي تنهد بسخط: نسيتيه ابا و طحتي عمى فاللحم هادي تنفع هادي تضر هادا هو الريجيم...

بن عيسى هز كثافو بعدم اكتراث : و ما عندي ما ندير اولدي طياب مغنية بنين تبارك الله عليها .. اللحم جا زبدة و فتي ..

العربي ضحك على حركة باه و هو كيتبنن و نطق : الله يهديك ابا .. زيد تشرب دواك ... و بعد من اللحم و بعد من لحلاوة الله يهديك .. راه شفتك فالعرس طحتي عمى فالكاطو ..

بن عيسى ضحك غادي لبيتو : اوا جات المناسبة اولدي غفلتك...

بقاو ضاحكين و دخل معاه لبيت عطاه الدوا بيدو تا خداه كولو .. و بقا معاه شويا مونسو عاد ناض خرج فاش حس بيه بدا النعاس يديه ..

طفا عليه الضو و خرج غادي لبيتو .. حل لباب لقا السقيل .. و البيت خاوي .. قطب حجبانو الكثيفين و تم داخل كيقلب عليها بعينيه تا كيسمع صوت الما فالدوش.. عاد تنهد .. و دار بدل عليه بقا غير بسروال و صدرو عريان حاس بالصهد ..

بانت ليه تعطلات و هو يتكا فوق النموسية .. ساند ضهرو على الكادر ديالها و حاط يدو ورا راسو .. و يد شاد ليها الطيليفون كيسكرولي فواحد لباج فأنسطا ديال الخيل .. عشقو الأبدي ..

مغنية ... كانت كدير روتينها فالدوش.. غسلات وجها مزيان و دارت مرطب.. و حكات سنيناتها .. و خرجات كتتمختر.. لابسا وحدة من ليشوميز دونوي .. فالغوز و لابسا بينوار ديالها ديال لحرير .. بياضها الملفت باين من ركابيها لي كانو ما بعادش بزاف على لون بشرتها و فيهم آثار ديال شي ضرابي من الصغر ...

تكوانسات فبلاصتها فاش شافتو هاكداك جالس فوق الناموسية .. بلاما تحس لقات راسها كتركز فتفاصيلو الرجولية و الحرارة كطلع معاها و حنيكاتها زادو توردو..

كيان رجولي بعود صلب .. درعانو مبودرين بحالا كيتريني و هو غير بالصابة و المحراث .. تمارة د لفلاحة خلاتو يكون مخدوم.. لاطاي ديالو كراجل مقبولة ماشي من النوع لمبوووور و ماشي من النوع لمبطز لي كرشو خارجة ..

عضات على شفايفها مبللاهم بريقها .. تا قفزات فاش شاف فيها .. خلاها بشوفاتو القاصحين تحدر راسها بالزربة و نطقات بإرتباك : العربي .. !

العربي حرك راسو بهداوة و رجع شاف فطيليفونو طفاه و عاد رجع سلط عينيه عليها و هي جايا لعندو كيطلعها و ينزلها بديك لاشوميز فالداك اللون لمشعشع لونها ثارو عليها بزااف ..

بلع ريقو حاس الحرارة ديالو كترتافع...و حاس بحجرو كيتصلب بين فخاضو.. احساس كان موالف لا جاه كينوض يستغفر ولكن دابا هي كاينا .. مراتو حلالو ..

و هي بتوترها من شوفاتو .. حلات واحد لمجد دارت براسها كتقلب على شي حاجة تا سمعات صوتو الرجولي الخشن و هو قريب منها ما عرفاتش امتى و قف لعندها .. و جرها من يدها و نطق عينو فعينيها : طفي داك الضو زيدي تركدي..

#يتبعععع غدا .. خليو ڤوط و تعليق ضروري ❌