معذبني غرامك ( قصة جريئة)

107

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

‏                                 Part : 107

دار نهار آخر فالشهر الفضيل ...
كان العربي جالس فلمراح هو و باه مجموعين على لفطور ..  فجو كئيب ... تنهد بن عيسى و هو كيشوف فالعربي غير ساهي و تحت عينيه رجع كحل عارف النعاس ما كيزورش عينو .. عرفو حازن على لي ضاع منو و كان هو سبابو..

بن عيسى : كول اولدي كول .. و غدا انشا الله غنمشيو نردو لبنت .. نرغبو مها ..

العربي شاف فيه مطولا و نطق : هضرت مع براهيم قاليا صبر علاما تهدن حليمة شويا و هو يهضر معاها .. و يعلمني نمشيو نرجعوها..

بن عيسى طبطب ليه على كثفو و نطق : انشاء الله اولدي ..

و سكت شويا و رجع كمل : شتي اولدي سخونية الراس كيفاش كتوجع بلبرودة كون حضرتي عقلك و ما مديتيش عليها يدك.. كون راه باقين مجموعين ..

العربي زفر بضيق و شاف فباه و نطق : ما شعرتش براسي ابا .. راها عرضي و الشرف ديالي ..

بن عيسى : واخا هاكداك اولدي هي ما دارت لا بيديها لا بالعود .. لي صورها هو لي خاصو يتعاقب...

العربي حرك راسو بالإجاب و سكت ..كان لحد الآن باقي مرفوع و ما عارف ما يدير ..

داز نهار آخر ..

وهاد المرة فبين مغنية و حليمة مها ..كانت كيف العادة متكيا فوق لفراش و مضلما عليها البيت .. و بين نعاس و فياق .. مرة هاهي فايقا و كتفكر تا راسها كيبغي يطرطق .. و تنوض تبكي تا كتديها عينها و هي على ديك الحال .... حالتهي كتشفي لعدا

حاسا براسها على حافة الإنهيار خسرات كلشي .. سمعتها .. حملها و حتى زواجها ..

و وسط دوامة افكارها السوداوية .. تفتحات الباب و دخلات حليمة .. فالضلام و شعلات الضو: ويلي مالك مضلماها على راسك يا هاد البنت..

زادت دخلات طلعات الريدو د الصرجم خلات الضو د النهار يدخل.. و طفات الضو د البيت .. و تمات غاديا لعند مغنية : مغنية .. وااا مغنية و شويا د الهم لي عطاني ربي .. نوصل ابنتي نوضي واش اتبقاي هاكدا شاركا الليل مع النهار .. نوضي كولي ليك غير شي حاحة

نطقات بغنية بزز: مي ما فياش باغا نبقا غير بوحدي ما نشوف حد ..

حليمة : نوضي من لفشوش الزايد .. امتى غترفعي الدعوة د الطلاق .. ولا ناويا ترجعي ليه تاني ..

مغنية غيو سمعات ديك الكلمة د الطلاق و هو قلبها يتقبط .. ناضت تقادات فالجلسة بلاما تحس .. و شافت فمها .. و من وجها باين لونها تخطوف ..

حليمة قربات عندها جلسات حداها و نطقات : انا غنوقف معاك ابنتي تا تاخدي منو طلاقك .. اصلا لقانون معاك و عندنا الدليل انو ضربك و طيح ليك بنادم .. يطلقك و خنافرو فلأرض .. ما عاش لي يضرب ليا بنتي و يقرها..

بقات مغنية سااكتة و سااهية كتخمم فهاد الهضرة .. تا نطقات تاني حليمة : شتك سكتي ياكما ناويا ترجعي ليه ..

مغنية شافت فيها و نطقات ببرودة : ديري لي يخرك امي .. غير خرجي بغيت نبقا بوحدي ..

مصمصات حليمة الحامض بين شفايفها و ناضت : هاهي خارجة .. انا نشوف عزيزك يشد لينا محامي .. يالله ...

دارت مغنية تكات عطياها بالضهر .. و حتى حليمة ما كتراتش الهضرة خرجات ديك الساعة من البيت .. و خلات مغنية فلي عطاها ربي ... 

✨

تذكير : ڤوط و تعليق على اي فقرة عجباتكم فضلا وليس أمراً