معذبني غرامك ( قصة جريئة)

47

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 47

فتح لباب دخل لقاهم متكيين بجوج و كيكركروو بالضحوكات.. غير شافوه و هوما يجمعو الكُور و ناضت منانة : خويا باغي تنعس...

العربي تبسم ابتسامة صغيرة على رد فعلها و نطق : لا بغا الله ..

منانة كتقاد فبيجامتها : الله يا ودي المحال محالك ..

و دارت عند مغنية كتغمز فيها : تباتي فراحة الله اصحيبتي ..

و دارت خارجة وصلات على كود العربي و نطقات : تصبح على خير تا نت اخويا ..

العربي ضحك : تصبحي بيخير ..

خرجات و سدات الباب وراها ... و هو شاف فهاديك لي سهات فيه و فضحكتو و قلبها كيضرب تا فيقها من سهوتها فاش شاف فيها بديك الهداوة و الجمود لي فعينيه و هو كيطلع فيها و ينزل يديك لبيجامة د الصميطات لي لابسا و درعانها عريانين بيضون كيشعلو.. و ضفيرتها طويلة هابطا ليها على صدرها ..

حدرات عينها من عينيه بالزوبة و الحرارة طلعات معاها تاني و الرجفة شداتها و وجها كولو تزنك ... حشمانة منو بلا قياس ..

هو قرب طلع فوق الناموسية.. كيقاد عليه فلغطا و نطق : درتي داك الدوا لي جبت ليك ..

مغنية بلعات ريقها و كاع الوان الطيف دازو ليها فوجها من قوة الحشمة و نطقات : اه وراتني منانة كي ندير ليه ..

العربي حرك راسو بهداوة وشاف فيها كيفاش حادرة راسها و نطق بصوتو الرجولي : مزيان دراميه هاد اليومين علاما ترجعي مزيانة ..

مغنية كتفات بتحريك راسها بالإجاب .. و هو تكا فبلاصتو و طفا الضو من قدامو.. و حط يدو تحت راسو و غمض عينيه ...

خلاها هي غير كتبلق فعويناتها وسط الضلام و تبلع فريقها ... حاسا احساس الغرابة مسيطر عليها .. باقي ما تعودات نهائيا على وضعها الجديد .. لي جاها فشي شكل ..
على تالي حتى هي تكات ... و جرات ليزار على رجليها و تكات على جنبها كتشوف لجهتو و نطقات برقة : تصبح على خير ..

العربي جاوبها بصوت رجولي و هو مغمض عينيه : معرضة خير ..

و من لعيا ديال العرس بجوج بيهم مشاااو .. نعسووو العربي تا من لفجر من قوة التعب ما فاقش ليه ..

و دازو.. 7 ايام على نفس الحال .. نفس الروتين العربي ما قربش لمغنية على وديت الدوا لي خدا ليها .. تا وصل هاد النهار و بالضبط نهار لحزام ..

كانت دار بن عيسى عاامرة بالضيوف .. عائلة منانة جاو يحزموها باش اخيرا تخرج من بيتها و تبدا تمارس حياتها الزوجية عادي ..

كانت وسط بيتها لابسا تكشيطتها ديال العرس .. مقادا حالتها و مها حليمة و الحاجة معاها فالبيت ..

تا دخلات عليهم منانة و فيدها وتد .. مداتو للحاجة و نطقات : هاهو اخالتي لوتد د اكثر بقرة ولادة عندنا ..

الحاجة شداتو من عندها : اريه ابنتي ..

مداتو لحليمة و نطقات : مغنية يالله ابنتي نوضي ..

ناضت مغنية وقفات و هوما يجيبو شال بيض .. دارو فيه خبزة الزرع زييينة و قالب د السكار و شي حلاوي معاه .. و داك لوتد .. و حملوه ليها فوق ضهرها بحالا محملين ليها شي دري صغيور .. و بداو كيصليو على النبي و يزغرتو... مخرجينهم من بينها .. بابنادر كيغنيو " دخلوها بوتيدها خرجوها بوليدها دخلوها بوتيدها خرجوها بوليدها "

التحزام و طقس من طقوس ما بعد العرس .. كيكون عبارة عن فال للعروس بالحمل فأقرب وقت و خصوبة حرمها .. من بعد هاد الطقس يالضبط لعروسة كدخل اول مرة لكزينة دارها و تطيب اول وجبة ليها فدار راجلها ..

و داك الشي لي وقع .. وقفات مغنية فالكوزينة داك الليلة على لعشا طيبات اول مرة طياب يديها .. مفتاتحة حياتها الزوجية بالعادات و التقاليد المغربية و داك الشي على أصوله ..

#يتبعععع