معذبني غرامك ( قصة جريئة)

90

   مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

                                 Part : 90

خرج خلاها مبهوضة..  كترمش بعويناتها...  ناضت لبسات عليها تا هي محتاجة تخرج .. لبسات عليها عباية بيها بشالها .. و لاحت داك الشال فوق راسها بإهمال شعرها كولو بقا كيبان.. لبسات صنيضيلتها و تمات خارجة لعندو ... لقاتو راكب فالطوموبيل و مديماريها.. جات معاه و وتاتو...

ركبات حتى هي حداه جاتها الركبة هماوية... عالية و مبدلة على البيكوب... زاد ديماراها حال الزاج بالعاني مخلي لهوا يضرب فيها ... الدوار كان خااوي و مضلام لا طيرا يطير ولا بشر يسير ..

شافت فيه و نطقات : فين غنمشيو فهاد الليل شو الدنيا كي خاوية...

العربي شاف فيها بهداوة و رجع شاف فالطريق و نطق: غطي شعرك ...

مغنية تنهدات و قادات الشال ديالها و بقات غير كتشوف بعويناتها.. مع بداو كيخرجو من الدوار و يدخلو لمدينة و هو يبدا يبان ليها الرواج و بنادم كولو برا مع كان الصيف لمطاعم و لقهاوي كلهم كانو عامرين و الطوموبيلات غاديين جايين : وايلي شو هنا بنادم ما كينعسش بكري لحضاش هادي و هوما باقيين برا ...

العربي حرك راسو و نطق بنفس الهداوة : لمدينة ما شي هي الدوار...

مغنية حركات راسها ... و هو بقا غادي سايق ضارب بيها دورة كبييييرة على لمدينة منها هو يجرب الطوموبيل و يعتاد عليها منها هي تفوج...
كان مرة مرة كيرمي ليها العين كيلقاها متكية على الكرسي و كتشوف بعوناتها فالضواو و الغادي و الجاي... مع صداع لمدينة و رواجها ...

شي ساعة هاكداك... تا حبس قدام واحد الشواية.. ريسطو خاصة بالمشاوي و اللحوم اشكال انواع... طلع الزاج لي من جهتها... و خرج مخليها تماك قصد ديك الشواية ...

العربي نطق بخشونة: الله يعاون... شي جوج كيلو ل المفتة..

الدراري لي خدامين تماك غير شافوه جاو سلمو عليه ... و دارو ليه اش طلب .. جوج كيلو ل المفتة مغ الخبز و موناضة... وبقا واقف تماك كيتهاود معاهم بحكم معريفة ديالو حيت شحال من مرة باع ليهم عجولا شاروليين ... علاما وجدو ليه لكومونض ديالو .. هزها و خلص...

و تم راجع لعندها كتبان ليه من الزاج كتضحك بحال شي درية صغيرة شرا ليها باها شي سقاطة ...

ركب و حط ليها داك الشي فوق حجرها .. و هي كتشمشم و تتنهد عندها لعمر فالكفتة : الله على ريحة كتشهي ...