معذبني غرامك ( قصة جريئة)

135

..
                         مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

‏                                  Part : 135

في جهة اخرى و بعد مرور شهر ... شهر داز باش رجعات لدار باها .. كانت حالتها احسن من قبل ... مع انها خسرات كلشي ولكن رتاحت .. كل نهار كتقول هاد النهار غتوصلها ورقة طلاقها ولكن ما كيوصلها والو ..

تنهدات و هي كتستف فدهبها لي كانت قيمتو اكثر من 20 مليون د السانتيم ...و  زارت شفايفها واحد الإبتسامة ..و نطقات كدوي غير مع راسها : اوا بعدا ما خرجتش بيديا خاويين .. ذهبي كولو كوكطتو جبتو معايا .. نديرو علاش نرجع ..

سورتات السامسونيط.. لي عمراتو فيها .. و تنهدات و ديك الإبتسامة كتتلاشا من شفايفها تا نزلو الدموع من عينيها قاطرين فوق واحد لخاتم صغيور ديال الذهب ديال ولدها .. داتو لشفايفها هاكداك صغيور باستو و نطقات : توحشتك الحبيب ديالي .. سمح ليا ما جبتكش معايا .. سمح ليا الحبيب ديالي .. عارفا باك غيلوي دراعي بيك .. سمح ليا ..

نهارت كتبكي و هي معنقا البعض من حويجاتو لي جابت معاها تشم ريحتو فيهم ..  كتحطهم على نيفها تشمهم و قلبها كيتحرق .. ماشي هاكدا كانت متخيلة حياتها .. ماشي هاكدا كانت باغا تعيش .. باها مات .. راجلها تخلا عليها و زول ليها ولدها ...

من ناحيتها هي ما كانتش لاقيا تفسير لتصرفو..علاش قسى عليها بين ليلة و نهار .. ياك كانت كيبوس رجليها و يقول ليها نتي هي الروح و العمر ... واش لهاد الدرجة كان كيكدب و لا الحب كان راشي لديك الدرجة ..

حطات راسها بين ركابيها كتبكي بحرقة من جديد رجعات لنفس النوبات د الحزن لي كيجيوها .. لي كانت كتقول هاهي تخطاتهم ورجعات كيف كانت ولكن كتلقا راسها كلما هربات منهم كترجع ليهم ..
ما متقبلاش داك الحزن و ما قادراش تتعايش معاه ... جاهلة انو كتزيد تصعب الأمر غير على راسها ..

في جهة اخرى و هاد المرة فدار القايد ... كانت مفرشة زربية و جالسة فالبورنية تحت واحد الشجرة كبيييرة د الزيتون.. و محمد حداها كيلعب واااخد عقلها .. كانت معمرا بيه وقتها رجع هو محور يومها .. من نهار رجعات منانة ماماه لدار باها ..

هزاتو بالزربة جابداه لعندها فاش شافتو دار شي حاجة ف فمو زولاها ليه و لاحتها و شافت فيه و نطقات بعتاب: لا اولدي كخخخخة.. ما تحشيهاش فمك ...

شاف فيها مطولا موسع عويناتو الفنين و  قالب شفايفو شاداه البكية حيت اول مرة اتغوت عليه .. و حط راسو على صدرها كيبكي مقهووور.. خلاها حتى هي يجيها لبكا معاه .. عنقاتو لعندها ضاماه لصدرها و نطقات : صااافي الحبيب ديالي صااافي سمح ليا .. سمح ليًا الحبيب ديالي .. ما نعاودش نغوت عليك ..