معذبني غرامك ( قصة جريئة)

20

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 20

دازت ديك الليلة .. قصرات منانة فيها مع باها و خوها .. تا جا براهيم وراها ردها ...

و صباح العيد ... صبح قلبها مقبووووط عليها و هي شادا طيليفونها بين يديها .. رجعات غير ساهيا و كتفكر فيه .. حرفيا دا ليها لعقل ديالها.. كتنهد تنهيدات طواااال حاسا بالحجر معرم ليها فوق صدرها ...

ما صيفط ما عيط ما بارك العيد .. ياكما دارت ليه شي حاجة قلقاتو نهار الخطبة .. ياكما دارت شي حاجة ما كانش خاص تدار و خلاتو ينفر و ما يتفكرهاش تا بميساج.. كانت عايشا حرب داااخلية بين طرفين .. طرف كان كيعطيه الف عذر و عذر ..لا راه خدام راه كيقيل فتمارة كيف كتقول ليها منانة .. لا يقدر يكون غير نسا ..ولا يقدر يكون من النوع لي ما عندوش مع الهضرة بزاف .. و قس على ذلك من الأعذار المنطقية و الغير منطقية ..

و الطرف الثاني و لي كان جلادها ..و كيرد ليها اللومة كلها .. و كيقولها راه نتي لي درتي شي حاجة ما هياش نهار الخطوبة .. مع العلم انها ما تحركات ما تململات داك النهار ...
و لومة ما رجعاتهاش ليه نهائيا حبها ليه مخليه نقدس فقلبها معصوم من الغلط..

زفرات بجهد سمعات حس مها فالبيت ..نفضات دوك الأفكار و خرجات معاها يحضرو على الضحية...

ذ.. بحو الناس و سلخو .. و ريحة بولفاف كيتشوا عطات و الدخاخن طالعا من كاع الديور ..

مانع العربي و بن عيسى الراس فالراس.. قدامهم السقيطة د الحولي مسلوخة و معلقة بلحبل فواحد الغصن كبير دواحد الزيتونة..

و مزندين المجمر ديالهم و العربي كيصوط عليه بواحد لوحة.. لابس غير تيشورت صميطات كولو ملطوخ بالد..م ...

بن عيسى هاز كاس د أتاي فيديه و نطق : إاايه فينك امنانة مولات اتاي لمبرع ..

العربي ضحك و شاف فباه و نطق :و مالو هاداك ابا كي جاك..

بن عيسى : حااار اوليدي كثرتي فيه حبوب اتاي ...

العربي هز الشواية من فوق المجمر فاش وجدات : و قبل على ما وجد الوليد ..

بن عيسى مد يدو هذا قطيب ديال بولفاف كيشهي و هو كيضحك : قابلين اوليدي.. العيد الجاي تكون مرتك مغنية معانا هي تصاوب لينا اتاي و تعاونك .. راك تْمْرّْتِي اوليدي هاد العام .. دب.. حتي وحدك سلختي وحدك ... الله يسمح لينا من شقاك ..

العربي تبسم ابتسامة خفيفة و نطق بصوت رجولي هادي : بالصحة و الراحة ابا .. نت في رتاح راحنا قد تمارة ..

و تعاشات لعشية على هاد الحال و كان ابراهيم و منانة عند بن عيسى فدار جاو يباركو ليه العيد..

كانت جالسة منانة بكااامل أناقتها لابسا جلابة جديييدة بيها بالشال ديالها دايرا ذهبها و حاطا قدامها صاكها .. جا معاها الزواج و بانت عليها دار القايد و خيرو...

حن حن ابراهيم و نطق : و هو هادا اسي بن عيسى .. خلينا ليكم الراحة .. لعشا عندي فالدار جي نت و العربي تاكلو التقلية ...

بن عيسى : زيدو اوليدي شويا ماشي مجيتكم هادي ..

ابراهيم كيلبس فصباطو: باقي عندي شلا ما يتقضا اسي بن عيسى راك عارف ... هاهي منانة معاكم تا تجيو لعشا ..

بن عيسى حرك راسو بواخا و نطق : و الله يعاونك اولدي ..

منانة ناضت : انا نوض معاك لباب ا براهيم ..

ابراهيم حرك راسو بإمتناع: لا غي خليك العربي راه تماك كيدوي فالتيليفون ...

و ديك الشي لي كان خرج لقا العربي باقي داوي فالطيلفون ...سلم عليك و اكد عليه يجي مع بن عيسى و منانة عاد مشا ...

فدار القايد...

#يتبعععع 🔥🔥 خلي ڤوط و تعليق باش نكمل بكم ❌