دار العربي هو الأول لمصدر الصوت و هو يشوفها فديك الحالة كيشوف صنع يدو .. تا كتبان ليه نهارت كليا و طاحت فالأرض مغمى عليها ...
التخنزيرة بدات كتلاشا فملامحو باش تجي فبلاصتها الصدمة.. بلع ريقو و نطق و هو كيقرب منها و حرفيا يديه كيترعدو من فرط الادرينالين لي تدفق مع عروقو : مغنية ...
داز الوقت .. فالسبيطار ..
كان وقف فالكولوار ديال السبيطار.. مرجع راسو لور حاطو على الحيط و مرفوع... حرفيا كان مرفوع... باقي للأن ما مصدقش هاد السيل الجارف دالأحداث لي وقعو هاد الليلة .... كيفاش من الشوهة لمصيبة اكبر صنعها هو بيديه .. كيتمنى غير ما يكونش داك الشي لي جا فبالو وقع..
كان انفاص ليه بن عيسى جالس و الدمعة فعينيه ما عارف هادشي مين طاح عليه .. حط يديه بجوج على راسو و نطق بحرقة و عتاب : علاش اولدي علاش .. علاش ... اش تكون كاع دارت ليك هاد بنت الناس ..
سؤال كانت عندو اجابة و ديك الإجابة مقنعة و هي الشرفة و عرضو الممثل فيها لي تدنس... ولكن تا ديك الإجابة كانت مكفسة ... تنهد العربي بضيق حاس بلحجر فوقمن صدرو .. كيجلد فذاتو و يلوم فراسو الف مرة .. لومو لنفسو .. فاق لومو ليها ... ما كرهش يرجع الزمان بلور و ما يخليهاش تمشي لديك لبلاصة اصلا ...
كانو ملامحو جامدين باردين ..ما باديين عليه لا ملامح حزن ولا والو .. عكس الداخل ديالو .. كان ربي لي عالم بيه .. العافية شاعلا فقلبو ...
ماخرجو من حالت سهوه غير صوت حليمة ... و هي جايا كتغوت و تندب.. و قاصداه : اش درتي فبنتي اعدو الله اش درتي ليا فينتي ...
شداتو من التيشورت ديالو كتدي فيه و تجيب و الشرارة د الغضب خارجة من عينيها .. و دموعها كينزلو : اش درتي ليا فينتي يا العدوووو.. اش درتي ليا فينتي ..
كان على باقي محافض البرود ملامحو و منزل راسو احتراما لها ما باغيش يحط عينو فعينها حيت عارف راسو غالط.. و غلطو كبير لا يغتفر...
و هي علين تحماق و تسطا على بنتها كتبكي بحرقة : اش دارت ليك تا تمد عليها يديك .. اش دارت ليك .. يتيمة و حكرتيها و تعدي عليها الله ياخد فيك الحق الله ياخد فيك الحق ..
نهار عليه على صدرو كضربو فقبضتها و تبكي بحرقة .. مخلياه يبلغ ريقو .. تدخل ابراهيم بعدها عليه .. فاكها منو... و هي كتنتر منو .. تا كيبان ليهم لباب د المستعجلات تحلات و خرج لعندهم الذكتور كيزول لكمامة على وجهو .. العربي غير شافو مشا عندو كيجري : ذكتور ..؟
الذكتور طلعو و نزلو عرفو هو لي ضربهاو نطق : للأسف طاح ليها الجنين .. من العن.. ف لي تعرضات ليه .. ولكن حاليا حالها مستقرة .. قدرنا نوقفو النزيف.. و غتبقا هاد الليلة فالعناية المركزة...
و شاف فحليمة و نطق : غنديكلاري لبليس بالعنف لي تعرضات ليه ..
