معذبني غرامك ( قصة جريئة)

31

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 31

دخلات مغنية هي لولا طلعوها لبيت خاص بلاسير.. كانت غير كدور فعينيها جلسات فوق راك الباياص حاسا بالغرابة فوق لقياس... حشمات تحيد حوايجها قدام السيدة لي غدير ليها لاسير ..

تا نطقات هي كاسرا الصمت و محاولا تخلق جو زوين معاها و تحيد منها الحشمة : غير حيدي حوايجك احبيبة ديالي .. ما تحشميش مني .. لي عندي عندك .. انتهلا فيك الفنة ..

مغنية بشاشت السيدة خلاتها ترخا شي شويا و ضحكات بتوتر و نطقات : اول مرة ايحيد ليا شي حد الزغب ما مولفاش..

السيدة خدامة كتوجد فلاسير كتطيسطي ليها الحرارة باشما تحرقش مغنية : غير تهناي احبيبة ديالي يدي حنييينة ما غتقصحيش بزاف ..

و ديك الشي لي كان حيدات مغنية حرايجها بقات غير بسليب و ديباردور .. و تجيدات فوق داك الباياص.. و بدات السيدة كتأبليكي ليها واحد السبراي كيبنج شويا باش لألم يخفاف و من وراه البوربو.. عاد بدات كتأبليكي ليها الحلاوة ...

و غير جبدات الجبدة لولا و هي مغنية تشهق حاطت يديها على فمها كاتما صرختها ...
خلات ديك السيدة كضحك عليها .. كان باين من تصرفاتها و حشمتها و لكنتها انها بنت لعروبية ... ولكن كانت كدخل لخاطر و اجتماعية دغيا بدات كتهاود هي وياها ...

لتحت عند لبنات ..خواتات براهيم بجوج جهان و حنان... و منانة ..كانت منانة عاطيا وجها لميكاب ارتيست كتقاد ليها تا هي الميكاب و خواتات ابراهيم كيقادو ضفرانههم..

تا نطقات حنان خت ابراهيم لكبيرة : تبارك الله شعرك زوين ا منانة اشنو كديري ليه ...

منانة شافت فيها من لمراية و نطقات: والو غا شي خلطات د السدر و الحنة مرة مرة ..

جهان : تا مغنية تبارك الله شعرها طويييل.. هي لي سوليها راها كتقيل كدير ليه فالوصفات ... قبل ما نتزوج هي لي قابلات ليا شعري الوصفة لي ديرها تدير ليا منها تا رجع شعري غزال ...

منانة : اه شوفي مغنية تعطيك شي وصفة من قاع الخابية .. راه هي مولاتهم ...

حنان ضحكات : وباينين عليها .. تبارك الله عليها مهليا فراسها .. انا شعري كولو طاح كون ما 6d كون راه عيبي بان ..

جهان : وا ختي نتي هلكتيه من بروشينك لبروشينك..

حنان هزات كثافها :وا ختي سيدي أحمد عينو خضرة خاص ديما نبقا معمراها ليه لا طير ليا بيه شي وحدة من بنات اليوم... بحال منانة يا ختي ياك براهيم كان خاطب غا تا فسخ شويا مشا خطيها...

وقع الصمت ورا هاد الهضرة لي قالتها .. خرجات فيها جهان عينيها بمعنى اش كتقولي .. و هي كرات ليها كثفها بلا مبالات .. و منانة يبسات فبلاصتها لسانها تربط..
فالحقيقة حنان ما كانت قاصدا والو بهضرتها غير جابتها فالسياق الكلام ضاربا بيها المثل .. اما هي ما كانتش حاملة تا شي ضغينة فقلبها من جهة منانة ... غير هي من النوع لي ما كيوزنش...

عم الصمت التوتر فالجو تا كسراتو مغنية و هي هابطا عندهم حنيكاتها مزنكين.. و غير كضحك فرحاااانة فنهارها .. شافو فيها كاااملين و بداو يعشقوو و يصليو على النبي ..

#يتبعععع غدا الفنات ديالي سمحو ليا فيا ما يكمل الفنات يديا راكليني علو لكتابة ولكن المشقوف علين يطفا و الكابل حلف لا شارحا ليا خديتو غا السيمانة لي دازت صحابات لأيفون غيعرفو لكابل علاياش داويا اويلي تقول شريتو بفلوس ليتاما يا لطيف .. المهم نتلاقا. غدا مع الحنة د مغنية لي غتكون حاضرة فيها حتى بنت الشرادي يا ختااااي ..