معذبني غرامك ( قصة جريئة)

137

..
                         مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

‏                                  Part : 137

صبح الصباح عليها و هي شادا المصحف بين يديها و كتقرا .. و محمد فحجرها ناااعس .. رد عليها الولف هاد الشهر واخا ما نساش مو نهائيا ديما كيبكي عليها ...

كانت بالضبط فالحزب 60 علين تختم ..حتى كيقاطعها صوت التيليفون... بلاما تحس عينها زاغت ليه .. و هي تلقا نمرة منانة .. حبسات فين كانت و خلات المصحف نفتوح بنية تكمل ...

و هزات طيليفون جاوبات : الو منانة

منانة بصوت مخنوق بلبكا : مغنية غنحماق..

مغنية قطبات حجبانها و بلانا تحس سدات المصحف و نطقات :  اويلي مالك ..

منانة بصوت باكي : غنقطع ولدي من جنابي ا مغنية باغا نشوفو .. الله يعطيك ما ناويا فخاطرك.. شوفي كي ديري و جيبيه ليا ولا نجي انا نشوفو ...

مغنية تنهدات بأسى على حالها و نطقات : واخا صافي غير سكتي من لبكا ... انا نحضي عزيزي يخرج لسوق و نعيط ليك صافي .. و جي شوفيه منها سلمي على الحاجة ...

منانة : لا خرجيه ليا من لباب د البورنية نشوفو بتخبية عافاك .. لا عرفني باغا الولد غيلوي ليا ذراعي بيه ...

مغنية تنهدات تنهيدة طويلة و نطقات : واخا صافي يالله سيري دابا .. تا نعيط ليك ..

قطعات معاها و شافت فالوليد مسيكين باقي ناااعس ... تنهدات و. رجعات فتحات المصحف على السورة فين كانت .. مكملا الختم ديالها ...

دازت شي ساعة .. و كان صحاب الدار فاقو و نجمعو على الطبلة د لفطور بما فيهم هي ..

حنحن ابراهيم كيناضرها بعينيه و نطق و هو نايض من بلاصتو : الحمد الله .. الله يخلف ..  مغنية تبعيني باغي نهضر معاك ..

مغنية بلعات ريقها و شافت مباشرة فمها لي كانت دايا لقمة لفمها و حبسات بحالا كتسنا جوابها : واخا اعزيزي...

و مدات محمد الصغيور للحاجة لي نطقات : سيري ابنتي الله يدير ليك لي فيها الخير ..

مشات تبعات ابراهيم هي .. و الحاجة شافت فحليمة لي ما هضرات ما تكلمات و نطقات :  طلقيها تسرح احليمة و خلي بنتك تقد براسها ..

حليمة شافت فيها كتمسح فيديها و نطقات ببرود : خليها راها شابها لعماتها كتموت على الدل انا ساخطا عليها ..