معذبني غرامك ( قصة جريئة)

09

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 9

دازت يام الله و بالضبط داز شهر علا زواج منانة و ابراهيم... و سيرة الزواج ما بقاش ذكرها بن عيسى للعربي حيت تلها لعربي مع لبلاد رجع كيجي مهدود بتمارة ... كياكل و يطيح ينعس.. كيمشي قبل لفجر و يرجع ورا المغرب ..

كان جالس هاد الأخير فبيت د لكلاس مع باه ... شاد فيديه واحد الربطة دلفلوس ... و قدامو دفتار و طيليفون كيطلع ليشارج ديال الشهر : غدا فاش يدوز لحنافي يدي لغلم عطيه عركو " فلوسو" ابا ... ما تعطلهاش عليه ...

بن عيسى ساهي مع التلفازة كيتفرج فالسبوعا و نمورا ما ردش عليه كاع ...

شاف فيه العرب و شير ليه بيديه : و سبحان الله ابن عيسى ...

بن عيسى شاف فيه خارج من سهوه : نعام اولدي قلتي شي حاجة ...

العربي حرك راسو بلا حولة و نطق : فلوس لحنافي هاهي ...

و مد ليه ربعلاف ريال : غدا فاش يدوز لغلم عطيه ... و وصيه يشبعهم مزيان راه المرعى عطا الله و العيد ما بقاتش ليه تا 3 شهور صحيحة ...

بن عيسى شدها من عندو دارها فجيب دخلاني دجاكيطو... و نطق : صافي كون هاني ... مول لحليب راه جاب ليا لفلوس ديال هاد الشهر ...

العربي حرك راسو بالإيجاب: صافي مزيانة...

سكت بن عيسى شويا و رجع شاف فولدو و نطق : غدا ختك عارضا علينا لعشا ...

العربي نطق بهداوة : الله يكثر خيرها سير نت انا ما فياش...

بن عيسى هز فيه حاجبو : كيفاش ما فيكش اولدي من امتى رجعتي قليل الصواب هاكا...

العربي محافض علا نفس الهداوة فنبرة صوتو : حاشا ابا .. غا ما فيا لي يجمع ..

بن عيسى : غنمشيو نعطيو لناس صوابهم .. باشما يقولوش هادو جاو روحو لينا لبنت و ما رجعيش سولو فيها ...

العربي بقا في ساكت ما قال والو و بن عيسى كمل كلامو بجدية : غتشد ليا شي 3 دلفرارج بلديين كبار .. و شي كرطونة د السكار .. ما غندخلوش بيدينا خاويين...

العربي حرك راسو بآه واخا عارف ما عندها معنى يدخلو علا دار القايد هادشي حيت دار القايد بخيرهم.. ولكن الأصول و العادات هاكدا كتقول...

بن عيسى : فالحقيقة راه حنى لي خاص نديرو لنسابنا عراضة... ولكن ما عندها عيالات لي يطيبو قوام هاد لعراضة.. حيت سيهم العربي ما عينو فزواج..

العربي تنهد تنهيدة طويلة و وقف كيجمع فدوك لفلوس و نطق : تاني هاد السيرة ابا.. ياك قلنا ليك ختار اسيدي و لي عليا نمشي معاك ..

بن عيسى هز كثافو و نطق : لعروسة كاينا اولدي.. علا مزيناتها عندها غي لعمر لي تعطيه ليك ولكن نت معفر عليها و ما باغيهاش..

العربي دوز يدو هلا وجهو بجهالة سيرتها كتنرفزووو كثر من لقياس : با .. ختار من بنات الزوار من طرف انا قابل .. الا هاديك .. هاديك ما هي خبزي ما انا طعامها ..

بن عيسى : اوا انا اولدي من غير ديك بنت الناس ماخاطبش ليك و ها السخط ها الرضى .. يالله توكل علا الله حيد من قدامي ...

#يتبع ...