معذبني غرامك ( قصة جريئة)

05

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 5

صباح جديد... مغنية كانت ااخر وحدة تفيق من نعاس... فاقت بنكير مها لبسات عليها بيجامة جديدة و زوينة خرجات من بيتها لقات الدار عامرة بضياف العرس.. مساينين الصبوحي د لعروسة يلعبو عليه ..

تفوهات باقي فيها النعاس و كثافها طايحين عليها بتمارة د العرس.. تا حسات بشي حد نغزها بالجهد .. عرفاتها ما تكون غا مها و فعلا ضنها ما خابش كانت هي كي العادة بنكيرها : اش هاد البيجامة عازلا ليا ليها زباطرك القوا.. دة هاه ..

مغنية تنهدات و دارت عندها و نطقات : مي ما مبدلاهاش العرس هادا و كاع لبنات مزوقات و لابسات بعدي مني ..

لاحد ليها هاد الهضرة و زادت خلاتها فتبخ الدم : تلبسي حلبس ابنت كرشي .. و لا بقات فيك وشمي ليا ..

و تبعاتها لعند لعيالات لقاتها جلسات بين لبناوت كتسفق بيديداتها حيت خرج ليهم ابراهيم السروال .. كانت عادة باقي جاري بيها العمل فداك الدوار .. و لو انو دوار متقدم و متحضر و نص فيهم قاري حد التاسعة و النص لاخر خرج برا الدوار لمدينة يكمل قرايتو... ولكن كانو ناس متشبتين بعاداتهم و محافضين ...

داز داك النهار بنشاطو و بات منانة و خوها راسهم مرفوووع بين الناس و كلشي كيشهد ليهم بتربية بنتهم تا طاح الضلام ...و كلها و دخل لبيتو ينعس ... بقات غير منانة و مغنية مجمعين فالصالون ...

مغنية : نوضي اساطة طلعي لبيتك عزيزي غيكون كيتسناك...

منانة شطحاتها لفخضها : سكتي بعدي مني نتي وياه .. فلعص ليا فخاضي ..

مغنية ضحكت كتحك ففخضها فين ضرباتها و نطقات : عزيزي فحل ..شديد ياك ... عاودي عاودي لعشيرتك ...

منانة شافت فيها شوفات سافلين و ضحكات : شوفلك السافلة باغا تعرف .. اوا لالة شغنقولك .. واخا تفلعصت ولكن داك الشي صدق كيف كيعادو عليه .. زوييييين و بنين ... كتحسي بيه دافي وسطك ...

مغنية حنيكاتها تزنكو و غير كتفرنس حشماانة : اوا شتي قلت ليك لحـ..ـوا دوا ..

منانة : و دوا نيييييت يا عششيرتي ...

بقات كتعاود ليها التفاصيل ما كتخبي عليها والو ... تا هبط عندهم ابراهيم .. حن حن و شاف فمنانة و نطق : مناوياش طلعي لبيتك ..

مغنية حدرات راسها كنحشم مع عزيزها بزاف .. نغزات منانة و نطقات بهمس : نوضي عيقتي اصاحبتي ..

منانة هزات عويناتها فإبراهيم مبتاسمة و نطقات : هاهي غادا تصبحي علا خير اعشيرتي ...

مغنية بنفس الهمس: معرضة خير ..

تبعات منانة ابراهيم لي كان سبقها و خلات مغنية جالسة فداك الصالون بوحديها متبعا ليهم العين كتسمع تكركير منانة عرفات ابراهيم شدها فالدروج..

تنهدات و هزات كفوفها لسماء و نطقات : يا ربي لحبيب .. انا ما بغيت والو .. بغيت غير العربي يا ربي .. بغيت غير العربي يكون راجلي يا ربي ما تحرمنيش منو ... نكون مراتو و يخرجني من من لعداب دمي يا ربي ...

عنيها دمعو و هي كتطلب سيدي ربي ... شويا طلعات تا هي لبيتها عند مها تنعس ...

صباح جديد ... فلبلاد عند العربي ... كان صباح بااارد و الجو مغيم و الشتا كتصب .. كان فرحان و كيحمد الله على هاد الشتيوة لي جات فوقتها تسقي ليه الزرع ..