معذبني غرامك ( قصة جريئة)

149

..
                         مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

‏                                  Part : 149

خبار ما كانت على البال ولا على الخاطر .. صعيبة بزاف تلقا بنتك لي حاط فيها كل ثقتك .. و ربيتيها مفششها .. و كنتي كتعزها كثر من خوتها .. تغذرك بحال هاكدا و تدنس شرفك... حط يدو على صدرو حاس بلخناجر كيقطعو فقلبو مولدين الم رهيب خلا التنفس ديالو يتقطع..

طاح بكريز كيتألم ما صبرش لديك لخبار زيد عليها داك الشي لي كان واقع ..

علال شدو بين يديه مفزوع: با .. با..

ما كانش كيجاوب .. و حالتو كانت ما كتبشرش بالخير ... هزوه تماك دخلوه للمستعجلات ديريكت يحاولو يعتقوه..

و لخبار ما عرفوش كيفاش حتى وصلات و دارت بووووم فالدوار كولو .. كانت وحدة من الفرمليات لي خدامة فداك السبيطار عتعوف شي ناس فالدوار و هي وصلاتها ليهم .. و لخبار نتاشرات بحال العافية فالتبن و لي بقا ليهم من شوهة الفيديو زادهم شوهة لحمل و هي بلا زواج ..

هي كانت باقي فداك الغرفة فالسبيطار حالتها حالة كتبكي الد. م من عينيها و الندم قطعها طراف .. كيفاش حطات راسها فهاد الموقف و تشوهات هاد الشوهة هي لي حياتها كلها ما خلات ما دارت عمر حصلات و لا شي حد حل فمو عليها ..

خبطات بطنها بقسوة و نطقات بحقد : طيييح طيييح .. الله ياخد فيك الحق ..

تهد حيلها و يديها طاحو عليها و حساب بألم طفيف فأسفل بطنها ...
عاشت سوايع فالجحيم و هي بوحديها فهاد الغرفة ما عارفا لا اش طرا برا .. لا واش واليديها ساقو لخبار ..

جاهلة انو الخبار الخايبة دغيا كتوصل .. و يوم ليك و يوم عليك .. و باش قت لتي تمو ت يا ملك المو ت ...

في جهة اخرى .. فدار القايد .. كانت مجمعة حليمة و الحاجة فالصالون على براد ديال آتاي كيقادو ليه لمزاج ورا العاصر..

الحاجة تنهدات و نطقات : و فضيحة هي .. يحسن عوان مرت الشرادي ..

حليمة : خليها ... حياتها كلها و هي توصل فلخبارات و  تهضر فعرض لوليات .. ها ربي جابها ليها

الحاجة شافت فيها : حليمة ما تشفايفش..

حليمة هزات كثفها : ما كنتشفاش فيها غير كنوقلك ربي كبير .. و لي ضلم كيتضلم.. علاه انا نسا شحال دوات فمغنية .. شحال هضرت فيا انا لي مها.. ياك جابت ليا خوها مسطي ورما مات المرحوم بغات تزوجني بيه فاش قلت ليها لا تا عندي ما ندير بيه .. بدات كتقول فدوار راني خارجة الطريق و انا باب الفيرمة ما كنخطيهاش.. الله ياخد فيها الحق ..