93

1K 68 9

بواسطة Swispicy

بقلم Swispicy

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 93

نهار جديد ..

كانت وقفا فالكوزينة ... كتزوق البسطيلة باللوز .. كانت كتخدم بكل حب .. تبسمات و هي كتشوف فآش خرجات من يديها ..

هزاتها غاديا بيها للبيت حطاتها ليهم لعشا.. و رجعات خدات الموناضا بالكيسان ديالها .. و الشلاضة خفيفة ضريفة د البصلة و مطيشة ..

دخل العربي لقا الطبلة منورة بحال هاكداك البسطيلة فالوسط و مع جنابها طبيسلات د شلاضة و طباصل خاويين فين غدير .. و هز فيها عينيه .. نقية فحالتها و لابسا غي ما بدي الريح..
جلس و عينو ما مفارقاهاش كيشوف كيفاش شادا الخاطر مع باه .. قطعات ليه طريف ديالو و قرباتو ليه و عطاتو الفوشيطة و هو راشقا ليه غير كيضحك و ياكل و يتبنن : الله على بسطيلة عطاك الله الصحة ابنتي ..

مغنية ضحكات برقة و نطقات بصوت رنان : بصحتك اعمي مين عجباتك هاديك الدنيا و ما فيها ..

هزات عويناتها فالعربي كترمش برموشها الطوال و نطقات : نقطع ليك طريف العربي ..

العربي حرك راسو بالإجاب و مد ليها الطبسيل ديالو ..
شداتو من عندو و قطعات ليه طرف كبييير .. و مداتو ليها : هاك بالصحة ..

العربي حرك ليها غير راسو و شدها من عندها الطبسيل حطو قدامو و طاح فيه عمى.. من عادتو كيسكت فاش كيكون كياكل باش يعقل على الماكلة ..

سالا طبسيلو و نطق بخشونة : الحمد الله ..

ما علقش نهائيا على كيفاش جاتو الماكلة .. ولكن غير الطبسيل لي لحسو كان كافي يعطيها لخبار .. ضحات و نطقات محاولة تحبس الضحكها : العربي نكب ليك الموناضة ..

العربي حرك راسو بواخا : كبي ..

كبات ليه كوكا حيت كتعجبو... مدات الكاس و سرعنما نساجم هو و باه كيتهاودو.. و هي كتاكل و مرة مرة تلوح كليمة او ضحك ..

كانت عارفة انو الطبق المفضل عند العربي هو البسطيلة خصوصا ديال الدجاج ..و ختارت تقادها ليه ليوم بالضبط لهدف معلوم ..

و حتى هو مينكرش يدها فالطياب بنينة و بسطيلتها ماشي اول مرة يذوقها و تعجبو .. و لي كيزيد يجدبو ليها و يعجبو فيها هو النقا ديالها .. كانت نقية لواحد الدرجة ما كيعيفهاش نهااائيا .. راها يوصل معاها فين يوصل .. تايق انها نقية ..

حسات بيهم صافي سالاو و هي تهز الطبلة د لعشا..دات لماعن غير حطاتهم فلافابو فزكاتهم... و مشات كتجري لبيتها.. ضرباتها بميكاب خطييير و عطرات حالتها مزيان .. و مشات لواحد لاشوميز دونوي منمرة عندها من داك النوع لي كيجي ليفازي لبساتها ... و دارت فوقها بينوارها كحل و خلاتو مفتوح ..

و طلقات شعرها كانت مدوزة عليه بليسور... و جلسات فوق الناموسية كتتسناه يدخل ...

ما دازش بزاف .. حتى كيتم العربي داخل .. و مع الدخلة فباب البيت ضرباتو ريحتها و تغلغلات فجيوبو الأنفية .. مخليا عينو مباشرة تعصاه و تقلب عليها وسط داك البيت .. حتى كتجي عليها و هي وسط داك السرير كتناضرو بعويناتها الواسعين...

✨

خليو تعليق على كل فقرة عجباتكم .. و خليو نجمة « ڤوط » ⭐️ على اي بارت قريتوه.. فضلا و ليس امرا 🥺🩷