معذبني غرامك ( قصة جريئة)

03

مْــــعَذْبْنيِ غْــــرَامْكْ

" باش يفيد البوح الا كان المقصود بوح ... "

بقلم : I.Imy

Part : 3

داز الوقت و كانو لبنات دوار مجموعين في الحنة دمنانة كاملات معاهم تا مغنية هازين لبنادر و كيطبلو و يشطحو...
منانة كانت لابسا قفيطينها دجوهرة فلبلونكاسي و الذهبي جايها كيفتن طالقا شعرها الذهبي و دارين ليها زيف على راسها و وجها...

و مغنية واقفا عليها و مقابلاها مرة تمشي لكوزينة تشوف فين وصل لعشرة... و ترجع تشطح شويا تخلي لبنات غير حالين فمهم في شطيحها ... لابسا تا هي قفيطين دجوهرة في الشيبي بحزيم ديالو و جامعا شعرعا لفوق و دايرا مكياج خفيف جايا كتفتن...

سالات منانة النقش... و هوما يتجمعو عليها لبنات كيتصورو معاها و شادين النوبة تا هوما بنقشو يديرو الفال...

منانة شافت فمغنية و نغزاتها: نوضي نتي لولا تنقشي اساطة

مغنية حركات راسها بواخا : اه واخا ولكن لعربي راك عارفاه ما كيحملش الحنة ما بغيتش نديرها

منانة خرجات فيها عينيها : اويلي نوضي ديري لفال اصاحبتي اشمن لعربي تكعدي

مغنية : صافي صافي اصلا راه غيكون نافر من دار كولها حيت فيها الحنة

منانة: اوا نوضي..

و شافت في النقاشة و كملات : سعاد ديري لمغنية يديها بجوج و كتبي ليها حرف A

النقاشة: كوني هانيا الالة لعروسة غندير ليها حنة غزالة

بقاو لبنات كيتغامزو عرفو ديك ل A على قبل العربي و نطقات وحدة فيهم : ههههه يا ختي باااقي تابعا مول ل A و هو معفر عليك مممم

مغنية طلعات فيها حاجبها :ياك اسليعفانة لمسلوتة تحل ليك الفم

لوخرا خرجات فيها عنيها ما رضاتش : اوا هاد المسلوتة لي قدامك هي لي غتحقق ديك الحلم لي نتي غااا كتحلمي بيه... حيت مول دعوتك فاش جيت داخلا بقا غير كيشوف فيا محيدش عينو من عليا ههههه وجدي قفطانك تجي تحضري لعرسووو

مغنية بحالا تكب عليها سطل دلما بااارد و الون هرب من وجها لسانها تربط و و لوخرا نطقات كتهز ليها فحاجبها كتقلب ليها السم : اوا مالك سكتي مممم

منانة عيات ما صابرا و هي تنطق: حبيبة خويا ما يديش وحدة كتخرج فنصاص الليل تلاقا بصاحبها ولد لمدينة مور النوادر د دار القايد مكتخلي ما كدير معاه ديك نهار ما حصلتكش كتمصيه ليه هاه ...

سكتات مميلة شفايفها بحركة مستفزة كدير ليها نفس الشي لي دارت فمغنية : و في التالي فاش شبع فيك تعناق و بوسان و تزلاق من فوق السليب مل منك و رماك... ادوي اشريفة العفيفة دوي...

هاديك البنت اللون هرب ليها من وجها و بلعات ريقها و كتسمع فلبنات بداو يوشوشو و دوك صحاباتها كلهم و كيشوفو فيها شوفات ناقصين ... شافت في فمنانة لقاتها مبتاسما لإستفزاز و نطقات : ديري الحنة ديري لفال

ديك البنت خنزرات فمنانة و هزات جلايلها و خرجات كتجري ما غتتحملش شوفاتحو كلام دوك لبنات غير خرجات منانة نطقت: لما و الشطابة بالله البنات زغرتو ...

و ديك الشي لي كان كلشي بدا كي كيزغرت و هزو تاني لبنادر شخضو الطرح ولكن مغنية دخلات معاها الهضرة ديال ديك البنت... كتشوف فديك النفاشة كتكتب ليها حرف A فيديها و هو اصلا مكتوب في قلبها من لي عقلات على راسها ... تنهدات فاش سالات ليها : شكرا كتحمق...

النقاشة : بالصحة و الراحة

مشات كلسات حدا منانة كتدوي معاها و تربط ليها لخميسة: شوفي اساطة عنداك تهزي الهضرة ديال ديك لمحكوكة من الأرض خويا اصلا اخواني مكيشوفش فلعيالات و ما كيسلمش عليهم و خويا غيتزوج بيك نتي خليني غير نقاد اموري مع عزيزك و غنفاتح با ف الموضوع

مغنية تبسمات فرحانة و دارت عنقااتها محاولا على حنينتها لا تخصرها ليها: لهلا يخطيك عليا اساطة

منانة تا هي عنقاتها: و عليا ادبدوبتي

داز الوقت و تدفع لعشا و زادو طريح اخر بلبنادر مغنية و منانة دخلو لوسط شبعووو شطيح خلاو لبنات غا حالين فمهم منانة حلفات هاد الليلة تبرد غدايدها في الشطيح و مغنية اكثر ...

سالات الحفلة و كاع لبنات رجعو لديورهم ناقشين و فرحانين... بقات غير مغنية و منانة كي لحلاقم كيهضرو و يتعشاو
منانة: نوضي باراك عليك اويلي تعشيتي جوج مرات هادي هي باغيا تضعافي
مغنية كدوي و فمها عامر: خليني اختي الدجاج جا بنيييين اصلا طايتي عاجباني واجا معنفجة مهبرة كاين لسيد العربي فين يشد

طلقوها بضحكة بجوج بيهم في السماااا تا وحلات لمنانة و بدات تكح : نوضي جيبي ليا لما عتقيني غنموت عروسة

مغنية هزات الغراف لكبير خاوي: انمشي نجيب ليك من لكوزينة هنا واالو ...

خرجات من الصالون شادا فيديها الكاس و كتشوف فديك a و تتنهد واش يقدر شي نهار ربي يجمعها بهاد الراجل ... و دورة لي غدور باش دخل لكولوار لي كيدي لكوزينة كتحس راسها ضربات فشي حد قدامها تا رجعات بلور غطيح و الكاس لي فيدها طاح تهرس ...