معذبني غرامك ( قصة جريئة)

50

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 50

مغنية تبسمات بخجل: الله يبارك فيك اعمي .. انا دابا شويا انحط لفطور..

بن عيسى : واخا ابنتي ..

و زاد خرج هو للبورنية.. و هي رجعات تكمل شغلها ..

حطات لفطور من فوق الطبلة .. حرشة باقي سخونة مع براد د أتاي منعنع.. و حاطا الزيتون و الزبت و الزبدة البلدية و لعسل .. طبيلة متييولة.. باين لمسة مرا فيها .. دخل بن عيسى بقا غير كيضحك كان كتوقع لحداكة و التاويل من مغنية ...

بدا كيفطر هو وياها و يتهاودو متفاهمين ..

مغنية : عمي واش نقاد ليك طلع لفطور للعربي ولا عيهبط يفطر هنا ..

بن عيسى كيدوي و فكو عامر : تلاقيتو فلفجر ابنتي قال ليا غيهبط.. بلاما تعذبي تا يجي و حطي ليه ..

مغنية حركات راسها بواخا : اهاه واخا اعمي صافي ..

بقاو كيفطو حتى سالاو و ناضت هي جمعات الطبلة .. و جمعات البيت فين كلاو .. و رجع بن عيسى دخل ليه و شعل التلفارة يتونس بيها ...

و هي مشات الكوزينة بدات كتقاد فلغدا... كانت بحال شي نحلة نشيطة وسط ديك الكوزينة .. شغلها سريع بزااف .. دغيا جمعاتها و دارت فيها كتقلب على كل حاجة فين بلاصتها ...و كتستف لماعن لي جاوها فالكادويات فبلايصهم ..

تنهدات كتشوف فواحد الرف فين ستفات دوك لميعنات الزوينين د الضياف حالها من حال اي مرا مغربية كتبغي تكبر بضيوفها و نطقات : باااقي خاصني بزاااف لهاد الكوزينة ..

تنهدات و بقات واقفا على لغدا تا نصباتو و حطاتو .. و دازت لماعن كتغسل فيهم ..

على برا .. ضربات ديك العشرة ديال الصباح .. و تم داخل مع لباب د الدار .. تارازتو فوق راسو حامياه من الشمس .. بحوايجهم د الخدمة بوطو عااامر بالحمري ...

داز سلم على باه هو لول هاد قصد الكوزينة ... دخل مع الباب كتبان ليه ليه عاطياه بالضهر كتغسل فلكاعن و كتغني واحد اغنية بصوت لين و زوين ما عرفتش فأشمن لغة بالضبط ..

حنحن بخشوونة و نطق : السلام عليكم ..

مغنية دار عندو قافزة و سرعنما بتاسمات فوجهو بكل حب حنيكاتها موردين و نطقات برقة : العربي على سلامتك .. جلس انا نحط ليك دابا لفطور ديالك ...

العربي حرك راسو بالإجاب و نطق بهداوة : واخا .. انغيل يديا ..

و جا لحداها ل لافابو حل ليها يديها بجوج بساطهم حورش و مدمغين بتمارة و نطق : كبي شويا د أوني.. " ليكيد باش كتغسل لماعن"

مغنية شداتو كبات ليه منو على يديه كترمقو بنضرات كلها حب .. عينيها كيلمعو ... و مشات بدات كتقاد ليه فلفطور ديالو .. داك الشي متول على حقو و طريقو حطاتو ليه فواحد الطبيلة صغيرة د لخشب ..

جلس هو يفطر كيعطي لماكلة حقها .. و هي كملات شغلها .. و مرة مرة تخطف منو شوفة .. ما كانتش متيقة انو هي مراتو دابا و هو راجلها ..

واقف العربي فاش سالا .. قرب ل لافابو تاني كيغسل فيديه .. و هي تنطق كتشوف فيه : غتمشي صافي ..

العربي حرك راسو بهداوة : اه ..

مغنية بلعات ريقها كتقرب منو و نطقات برقة : ما قلتيش ليا كيف حالتك الحرشة.. درتها على قبلك عارفاها كتعجبك ..

العربي دار كيمسح فيديه و جاوب على سألها : مزيانة .. الله يعطيك الصحة ..

مغنية وساعت ابتسامتها كثر و خدودها توردو و نطقات : و لغدا واش غتجي ليه ندير بحسابك ..

العربي شاف فيها ببرودة ما عزيزش عليه كثرة الأسئلة و نطق : غنسالي غنجي ما ديريش بحسابي .. عطي ليا يتغدا فالوقت باش يشرب دواه ..

قال هادشي و تخطاها غادي خارج لخدمتو مغليها متبعاه بعينيها .. كتبلع فريقها .. ردة فعلو كانت شيء من الحدة وااضح فيها ..

#يتبعععع