139

2.6K 107 33

بواسطة Swispicy

بقلم Swispicy

..
مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

‏ Part : 139

دوز يدو على وجهو كامل مهبطها على لحيتو بحركة رجولية مع تنهيييييدة كتحكي لكثيييير ... مزال مذاق شفايفها فجوفو ... دازت ديك القبلة بحال رمشة العين مخليا جميع حواسو تنوض و تتأهب ...

دازت ديك الليلة هاكداك هي طلعات لبيتها و كانت حرفيا مخررررربقة.. ما عارفاش واش باغا ترجع معاه فعلا ولا صافي عافتو..
و هو لي رجع لدار و ياقا غير هي بين عينيه ... كون صاب ديك الليلة يخرج التور لكبيييير ديالو .. يتكيه و يعطيها صداقها لي طلبات لي كانت قيمتو جوج د المليون ... و يجيبها معاه

ودن لفجر .. و بدا ضو الصباح كيبان .. صلا صلاتو كيف العادة ... و مشا للكوزينة جبد الموس لكبيييييرة ديال الضحية و مشا البورنية بدا كيمضي فيها مزياااان ..
ما يكدبش بهراتو بذكائها ..عرف انو مورادها من تور كبير يتد ** بح .. و يتوزع على الدوار كولو ...انو الدوار كولو يقول انو العربي رجع مغنية بتور ... باش تسد عليها كاع لفام..

و ديك الشي لي كان ... عيط على شي ولاد الدوار من بينهم تا ابراهيم يعاونو...كتفو داك التور لي كان كبييييييير و سمييييين بزاااف .. تحاماو فيه شي 6 بيهم غير الشدار بسيف باش كتفوه و قبلوه.. و تعاونو فيه 8 بيهم باش شدوه للعربي...

علا ليه راسو تا بان عنقو مزيااااان .. و هو يجبد سيييف قدو قداش د الدبي ** حة .. و سما الله و جبد جوج جبدات ... و بعد .. و بداو تا الدراري كلهم كيبعدو لتيساع مخليين روحو تخرج...

و كيصليو على النبي ..

فدار القايد ..كانت فبيتها لابسا عليها جلابة جديييدة مخزانية.. و لايحا الشال من فوق راسها .. دايرا ماكياج خفيف ... و كتسنا فيه يجي يكمل الشروط ... كانت حاسا للحجر فوق من قلبها و التفكير الزايد قهرها ... تا حدخل عليها مها للبيت قاطعا حبل افكارها ..

طلعاتها و نزلاتها و نطقات بإستهزاء: الدل ما عرف مين ورتيه ... لابسا و مقادا .. عند بالك دار ليك العز هاه ..عند بالك بصداق جديد و تور غديري العز لراسك اعيفة لبنات .. سيري لله يعطيك الدل تزيدي تغرقي فيه انا ساخطا عليك .. سرك تمو.. تي عليه حيت دالك و دايرك تحت الصباط

مغنية وقفات كتشوف فيها فيها ببرودة و نطقات و لأول مرة بداك الشي لي فقلبها : اللهم دلو .. و لا عزك نتي امي.. باغاني نعيش حياتي كلها تحت جناحك تدليني كي بغيتي و تمرضين بحكامك و سمك .. من لي عقلت على راسي و الهضرة لي نسمعها من عند البراني نسمعها من عندك نتي لولا .. تا عقدتيني و شككتيتي فراسي و مرررضتيتي ...

زادت قربات منها و عينيها رجعو حمرييين و هي كتسترجع ذكريات قصح بزاااف من داك شي لي دار فيها العربي : كانت عندي 10 سنين .. و بنات الدوار كلهم كيقولو ليا الوحشة.. و البوطة .. و من عندمن سمعوها .. سمعوووووك نتي ..

زادت رقعات صوتها اكثر كتخرج داك الشي لي فقلبها داساع من زمان كي شي جمرة بالعاها كتحرق فيها : نتي امي نتييييي .. نتييييي لي كانو كيضربوني كيقطعو ليا حوايجي .. و كنجي عمدك نتشكا ليك كتشديني تسلخييييييني كثرررر .. تا كنبقا نلقف .. عمرررررك كنتي حنييينة فيا عمرررررك ... عشت معاك أسوء ايام حياتي ... نهار حق عليا اول مرة .. الناس كتفرح لبناتها .. نضتي نتي بزز مني درتي ليا التقاااف .. علااااش هادشي كامل هاه علااااش.. حيت انا بنت ؟ كررررهتيني فعيشتي.. كرهتيني فراااسي و خليتيني ديما كنشوف راسي قل من الناس .. الدللللل لي كتهضري ليا عليه ..نتي اووول وحدة دليتيني بيه .. ياك تا لقراية خرجتيني منها و انا كنت كنموووو ت عليها .. كنت كنجي انا اولا .. تا كبرت انا عاد بان ليك العز من الدل هاه ؟ اوا لا الالة فقتي معطلااااا .. انا غنرجع لعندو اللهم هو ولا نتي .. و سخطي ولا رضي ولا ديري لي عجبك ...

قالت كلامها مفجراه ليها وسط وجها مخلياها مصدوووومة ... و تخطاتها و خرجات مرررفوووعة كلها كتترعد و واحد الجرح قديييييييييم عندها رجع حيا و تحل .. جرح امها ..

ما دازش بزاف و هي فديك الحالة .. حتى دخل عليها ابراهيم .. و فيدو ميكة د اللحم كبيرة .. حطها تماك .. و جبد من جيبو جرا صفر .. عاامرة بلفلوس ..مدها لمغنية لي كانت باقي كلها كتغزل و نطق : صداقك الالة ..و الدوار كولو عرف العربي رجع مغنية . يالله نوضي راجلك برا كيتسناك ...

مغنية حركات راسها بالإجاب و شدات من عندو داك الجوا .. و سلمات على الحاجة عنقاتها و دموعها نزلو و اخييييرا .. و بقات معنقاها شحااال .. و الحاجة كانت حنييينة فيها بلا قياس .. كتوصيها .. وتطبطب عليها ...

تفارقات معاها و ما سولاتس كاع فحليمة حيت عارفا مها من قسوتها تمو ت ولا تتنازلش ..

سلمات على ابراهيم .. لي خرج معاها حتى لطوموبيل ديال العربي ..

هاد الأخير لي كان كيتسنا قدام طوموبيل .. غير شافها جايا تبشر ... سلم على ابرهيم .. و هي ركبات فبلاصتها مرجعها معاه .. هو لي كانت فرحتو ربي لي عالم بيها.. كيسوق و عينو مرة مرة كتزيغ ليها هي الطريق كلها دموعها ما حبسوش...

تا حبسات الطوموبيل قدام باب الدار ...

__________
يتبع يوم الأربعاء المقبل انشاء الله ... ما تنساش فوط لأي بارت قريتو ... و تعليق على اي فقرة عجباتكم .. 🔥