مْــــعَذْبْنيِ غْــــرَامْكْ
" باش يفيد البوح الا كان المقصود لوح ... "
بقلم : I.Imy
Part : 58
جمعات شتاتها و ناضت كتمسح فدموعها لي حلفو لا هوما حبسو ..
هزات لبلاستيكة د السقاطة كتقلب فيها .. حلاتها و هوما يبانو ليها داك الشي لي جاب ليها بن عيسى من السوق ... بقات كتشوف فداك الشي و تتنهد ..
فاللخر.. خدات منو شويا ستفاتو فطبيسلات... و دارت براد دأياي منعنع.. و حطات تا شويا د الكاطو ..
و تمات غادا بيه لبيت لي كيجلسو فيه .. حطاتهم فوق الطبلة كتسناهم يدخلو .. و الدموع باقين من حبسوش ليها ..
تنهدات بضيق .. و ناضت لبيتها تحاول تهدن راسها ..
على برا .. كان العربي عاون باه فالدوش او نقولو دوش ليه .. و عاونو يلبس حوايجو .. ناسي ديك السيدة لي خلاها مقهوورة .. خالقها مع باه بلمهاودة..
ال سالا و خرج مدببو من الحمام .. كيعاملو بحال شي دري صغير شاد ليه الخاطر و لي قالها ليه كيحدر راسو و يقول واخا ابا ...
مشاو للبيت د كلاس و هوما يلقاو الطبلة موجودة و ريحة اتاي منعنع كتنعش.. بن عيسى تبسم بحنان و نطق : شو مسيكينة انا جايب ليها هادشي ديرو فبيتها و تقصدو على راسها و هي حاطاه لينا ..
و دار شاف فولدو و نطق : والله لا لقيتي بحال هاد لمرا اولدي راك بزهرك ..
العربي تبسم شاد معاه الخاطر و زاد دخل هو وياه ..
بن عيسى : و فين هي اولدي ... عيط عليها ...
العربي كيسكرولي فتيليفونو مركز معاه : هاهي جايا تكون غا فالكوزينة ابا
بن عيسى شافو هاكداك و هو يبدا يعيط ليها هو بنفسو : مغنية ... مغنية ...
عندها ...
كانت متكية فوق الناموسية و ساااهية و دموعها كينزلو راسهم .. جاتها ديك الحالة د القهرة لي موالفا بيها .. الحالة لي اول واحد كتفكرو فاش كتجيها هو باها ...
قفزات فاش سمعات صوت بن عيسى كيناديها ... و نطقات رافعا صوتها باش يسمعها و فنفس الوقت كتمسح فدموعها : هانا جايا اعمي ...
ناضت كتمسح فدموعها بكم بيجامتها عينيها طااابو و تنفخوو بلبكا.. خرجات كتقاد فزيف فوق راسها .. تا دخلات عليهم .. راسما ابتسامة خفيفة على شفايفها .. قربات عند بن عيسى باست ليه على يدو و نطقات برقة : بالصحة اعمي بن عيسى ..
بن عيسى نطق ببشاشة: الله يعطيك الصحة ابنتي ...
و شاف فالطبلة كيفاش منورة و رجع شاف فيها و نطق : وا بنتي هاد السقاطة جبتها ليك تخزنيها لراسك .. فاش تشهاي شي حاجة تلقاها ..
مغنية تبسمات بخيبة امل عند بالها العربي تفكرها و نطقات : الله يكثر خيرك اعمي .. ماعليش ناكلو مجموعين حسن ..
بن عيسى تبسم و طبطب على كثفها : الله يرضي عليك ابنتي ..
مغنية حدرات راسها و بدات كتكب فآتاي .. حطات للعربي كاس قدامو عينيها عليه كيفاش غادي مع تيليفون وما مسوقش ليهم كاع ..
بن عيسى شاف فيها لقاها غاديا مع العربي و هو ينطق : العربي ..
و شار ليه براسو لطبلة: وا مد يدك اولدي ..
العربي شاف فيه .. و شاف فداك الشي لي محطوط .. و هز راسو فمغنية لقاها حادرة راسها و من وجها و عينيها لمنفوخين .. عرفها كانت كتبكي ..
تنهد و ناض جمع الوقفة و نطق : غا بصحة ابا ..
بن عيسى هز فيه راسو : فين غادي اولدي ...
العربي : غا خارج دارب دويرة فالدوار من تما ندوز شي فلوس لعلال ولد الشرادي بقا كيسالهم ليا من العرس ...
بن عيسى حرك راسو بتفهم : واخا الولدي .. سير الله يوضي عليك ..
العربي خرج من تماك مشا لبيتو هز لي خاصو من لفلوس و خرج ...

أنت تقرأ
معذبني غرامك ( قصة جريئة)
Romanceقصتنا واقعية 100% بنكهة مغربية بدوية .. 🇲🇦🔥 بقلمي انا IMANE IMY ..