معذبني غرامك ( قصة جريئة)

83

         مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

                                 Part : 83

هبطو لمدينة تقداو داك الشي لي خاص .. العربي خدا لولد ختو خاتم د الذهب د الدراري الصغار .. و مغنية خدات لمنانة بيجامة بريستيج ديال النفيسات...  اكيد العربي لي خلص كلشي ..

رجعو لدوار و داها هي بدار القايد..  و رجع هو لدار .. دازو يومين و هي غايبة على الدار.. 

دخل العربي لبيت و فيديه صينية د اتاي نزلها على الطبلة و بدا كيكب فالكيسان... مد لباه لكاس و نطق : با .. بسم الله ..

بن عيسى ضحاااك كيشوف فداك الكاس و شدو من عندو و نطق : لما و الزغاريت اوليدي عاودتاني..

العربي حتى هو ضحك و نطق : اوا هادشي ما وجد ابا...

بن عيسى تنهد : اوا لهلا يخطي علينا ديك بنت الناس .. قايما بينا.. شتي اولدي كي خلاتنا كي ليتامة..

العربي تبسم و حرك راسو بالإجاب و نطق : ها السبرع ما بقا ليه والو ابا و غترج لدارها...

بن عيسى : خليها اولدي على راحتها .. نيت تعرف تا نت بحقها ...

العربي ضحك و حرك راسو يمين و شمال و باه قاني عليه شاد فيه و هو غير كيضحك .. فعلا خلات بلاصتها كبيرة بزاف .. و الدار بلا بيها خوات..

تعشاو و وصل باه لبيتو عطاه دواه و هو مشا لبيتو ... شعل الضو و تنهد تنهيدة طويلة .. و دخل .. بدل عليه .. و تكا فوق الناموسية ..و هز طيلفون ديالو .. دخل شويا يتلف الوقت و يتلف داك الإحساس لغريب لي جتاحو...

كان يدور يدور و يرجع يفكر فيها ..و ف أش غتكون كدير .. ما حسش براسو حتى دخل دوز نمرتها و حط الطليفون على ودنو كيتسناها تجاوب ...

بقا كيتسنا..حتى تفتح الخط و سمع صوتها الناعم: الو العربي ...

العربي نطق مجاوبها بخشونة: ما ناوياش اجي لدارك خلاص ..

سمع ضكيحتها من ورا السماعة : اويلي العربي ... ياك لاباس راه بعد غدا السبوع.. ما جاتش نخلي منانة راسها ...

العربي نطق منرفز : ودارك تخليها راسها ..

مغنية: و العربي الله يهديك راك نت و عمي بن عيسى تماك ..

زفر العربي منرفز كثر .. ما عارفش تا علاش عيط ليها و نطق : صافي ...

مغنية : يالله تصبح على خير ...

قطعات عليه مخلياه كيتأفف.. ما عرفتش مالو .. زدح داك الطيليفون مع الناموسية و رجع تكا حاط دراعو على جبهتو كيستغفر ...

عند مغنية .. قطعات و شافت فمنانة لي حداها و نطقات : فين خليناها ...

منانة ضيقات فيها عينيها و نطفات :خويا مع من كنتي داويا ..

مغنية حركات راسها بآه : هو يا ختي قالك ما ناوياش ترجعي لدارك .. و السبوع بعد غدا هدا خرج عقلو ..

منانة مدات ليها التريبية ديالها : هاكي شديه نمشي نبدل عليا ..

مغنية شداتو من عندها بكل فرح و عويناتها كيبرقو : اري ليا حبيب مرات خالو اريه ...

شداتو بين يديها كضحك معاه و قلبها كيفلفل عليه : الحبيب ديالي .. فن ديالي ..

✨

خليو تعليق على كل فقرة عجباتكم .. و خليو نجمة ⭐️ على اي بارت قريتوه