معذبني غرامك ( قصة جريئة)

84

         مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

                                 Part : 84

دازت ديك الليلة و ليلة اخرى وراها و صبح صباح جديد و بالضبط الصبح ديال السبوع ..

تنصبو لخزاين قدام دار القايد ..  و الدوار كولو موجد راسو معروض لسبوع دار القايد ..

كانت منانة فبيتها كتوجد راسها .. لابسة قميص ديال جوهرة فلبيض و طالقا شعرها و دايرا سبنية غير من لفوق و مخليا خصيلات هابطين على وجها ... و دايرا ماكياج بلدي مكحلة عنيها و موردة حنيكاتها و شفايفها .. 

هزات وليدها فييدها ملمداه فيزار مطوز بالطرز الفاسي .. و تمات خارجة كتتمختر .. فرحااانة بلا قياس...

هبطات لتحت.. ل  الجردة د الدار لقاتهم تماك مجموعين كيصليو على النبي و يزغرتو .. عويناتها تغرغرو و هي كتشوف باها و خوما حتى هوما حاضرين معاها و دايرين ليها العز جايبين ليها حتى هوما الدبيـ.. حة...

قربات منهم مزنكة.. و ابراهيم ما محيدش عينيه من عليها كيشوف فيها و كأنها غير هي لي كاينا بنت فهاد الدنيا ...

نطقات الحاجة لي كانت ماشي اقل منهم بالفرحة : هاهي منانة هبطات يالله نبداو اولدي ...

ابراهيم حرك راسو بالإجاب: واخا الوليدة ...

و شاف فمنانة و نطق : باش سميتيه..

منانة تبسمات و نطقات : محمد ...

ابراهيم حرك راسو بالإجاب و نطق رافع صوتو : محمد ... بسم الله .. شد العربي..

العربي حرك راسو و قلب الحولي مثبتو مزيان غير بوحدو خلا غير الراس ل ابراهيم مين يشد و بنـ .. حر ... و داك الشي لي كان .. نحـ ر تحت الزغاريت دلعيالات و تعشاق.. و تبع ليه 2 آخرين ديالو هو .. و تبعو ليهم تا لحوالا لي جاب بن عيسى هدية لولد بنتو ...

دخلو لعيالات خلاو الرجال يسلخو..  و جلسو و دفعو لفطور لضياف هو لول...

و فأي مناسبة كيوقع التوشويش.. داك الشي لي وقع تا فهاد المناسبة.. جلسات الحاجة و جاو بناتها بجوج جلسو حداها .. و نطقات حنان بنتها لكبيرة: و مالها امي لي ما سماتو على سميت با الله يرحمو..

جهان خرجات فيها عينيها : ويلي دخلي سوق راسك ..

حنان هزات كثفها : علاش اختي هاداك راه خويا.. يكفي مي عطاتها ذهبها كولو و براهيم ما خلا ما جاب ليها ..

الحاجة شافت فيها و ضحكات : تستاهل مسيكينة لي عطيناها قليل .. راه دوزها عليها لوحم و لدات بلفتيح..

حنان : و مالنا كلنا ولدنا بلفتيح .. و مالها لي ما تخليك نتي تسميه..

الحاجة : انا لي نهار و مصارني مفردقين فلبلوك باش نسميه .. و تاقاي الله احنان .. ياك ولادك نتي بنفسك لي مسمياهم.. اوا دخلي سوق راسك و قلبي عليك مرات خوك ما تعصبيهاش راها نفيسة ..

حنان مصمصات الحامض بين شفايفها ما عاجبها حال و نطقات: هاهي ساكتا امي .. راه تا انا ولدت ليك الذكورا..

الحاجة ضحكات : ولدتيهم لعكوزتك ماشي ليا .. هادي ولداتو ليا ..

حنان خرجات فيها عينيها : ياااك امي ..

و بقات مناكرة هي و مها مني منك .. حنان معروفة عليها مغيارة .. ما تبغيش لبنادم الضر ولكن ما تبغيهش يفوتها بشي حاجة ..

✨

خليو تعليق على كل فقرة عجباتكم .. و خليو نجمة ⭐️ على اي بارت قريتوه