معذبني غرامك ( قصة جريئة)

59

مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

Part : 59

وصل لدار ديال الشرادي .. وقف قدام الباب .. و دق جوج دقات بالحساب .. و نطق رافع صوتو بعض الشيء : علااال... علاال..

بعد على الباب شويا داير يديه ورا ضهرو .. كيتسنا فعلال يناديه او يخرج عندو .. تا كيسمع الباب تحل .. دار لمصدر الصوت .. و هي تبان ليه خارجة ... كتشوف فيه و تتبسم ...

حدر راسو بالزربة و هي قربات منو و نطقات برقة فيه شيء من الميوعة : العربي .. عاش من شافت ..

العربي نطق بجدية و هو مهرب عينيه منها : كاين علال ..

حسناء ميلات شفايفو علين تاكلو بعينيها و نطق : لاء ماشا لمدينة دابا و هو جا .. دخل لدار تسناه العربي ..

العربي حرك راسو بالرفض و نطق و هو عاطيها بالضهر غادي بحالو : فاش يجي قولو يدوز عندي ...

حسناء قهقهات بالجهد محاولا تلفت انتباهو و نطقات بنفس المياعة : واخا العربي .. و سلم ليا معاك على مغنية ...

العربي زاد ما رجعش شاف وراه .. حركاتها بقوة ما مكانش دايها فيهم و ما مسوقش ليهم ما عطاش تا لراسو الفرصة يفهمهم...

زاد لدوار لداخل و هو يلقا واحد المجمع ديال الدراري الصغار .. مشا وقف على واحد لوليد تبسم ليه و حنى العندو سلم عليك كيرفو : يوسف لاباس عليك ..

يوسف حرك راسو : الحمد الله العربي ..

و شاف فيديه لي دايرهم فجيابو و نطق : ما جبتي ليا والو معاك من السوق ...

العربي ضحاااك و باسو فراسو و نطق : غنعطيها ليك اسيدي فلوس و دير بيها لي بغيتي ولكن بشرط..

الوليد شاف فيه بتركيز و نطق : لي هو ...

العربي زاد قرب من ودنو و نطق بداك الشي لي بغاه يتسخر ليه .. و بعد و نطق رافع صوتو : ولكن هاه .. راه بربي و تقولها لشي حد ... ما نبقا نعرفك ..

لوليد حط يدو على صدرو و نطق : اقسم بالله العربي ما نقولها لشي حد ... كلمة د الرجال

العربي طبطب ليه على كثفو و نطق : يالله سير و قولو يديرو ليك فميكة كحلة ...

مشا الوليد كيجري و تا بعد عليه و دار عندو داير براسو ناسي اش قال ليه : اولويز ياك العربي ...

العربي خرج فيه عينيه كيتحلف عليه بيديه.. و الدري دار مشا كيجري و يضحك .. دارها بالعاني باغي يبسط معاه

ما دازش بزاف و رجع هازو فيديه .. مغلفو ليه مول لحانوت بصاشية و دايرو ليه فميكة لونها مغلوق ما باينش منو ..

مدو ليه و مدلو الصرف و نطق : هاهو بريكولك مقضي .. و ارا دابا ..

العربي ضحك و شد كاع داك الصرف لي ردو ليه حطو ليه فيدو و نطق :هاهو اسيدي جاك ...

الولد تصدم حيت كانت اكثر من خمسة دراهم خداها علين يطير بالفرحة : الله يحفضك العربي .. هانتا شوف فينما يخصك انا نتسخر ليك ..

العربي حك ليه على شعرو و نطق : تستاهل المرضي يالله سير خبعها لا يكريسيوك..

الولد هاداك ما سمع و مشا كيجري دخل لدارهم خلا العربي متبعو بعينيه و كيضحك ...
و زاد راجع بحالو لدار حتى هو .. و فيديه اولويز علامن وصاتو...