معذبني غرامك ( قصة جريئة)

131

..
                         مْــــعَذْبْنيِ غْــــرَامْكْ

" باش يفيد البوح الا كان المقصود لوح ... "

بقلم : I.Imy

‏                                  Part : 131

في جهة اخرى ..

فاقت شاداها الطيارة راسها كيحرقها و صحتها كلها مهدودة عليها .. ما عرفاتش بالضبط شحال نعسات ولكن غير من الجو عرفات راسها يا ما نعساتش بزاف و لعشية تعاشات.. او نعسات بزاف و الصباح علين يصبح ..

وداك الشي لي كان..  كان الصباح بدا يصبح .. تكدب و تقول رجعات حسن..  لا .. نهائيا .. كانت عايشا ضمار نفسي .. قلبها كيتقطع.. و اكثر حاجة ضراتها انو ولدها ما عمر مزال غتشوفو كيف قبل ..

بقات جالسة بحال هاكداك سااعة و هي على نفس الوضع عقلها حابس كانت كتصنت غير على دار الحطام لي كتحس بيه فداخلها ..

فلحضة هاجمو عقلها بزاااف ديال الذكريات الزوينة ..كيفاش خرجات من هاد الدار فرحانة و رافعة راسها و رجعات ليها بعد وقت قليل و راسها فالأرض .. مكسورة الخاطر .. بلعات ريقها بمرارة .. كتسمع فالتحنحينة لمجهدة د العود د العربي  ..

وقفات غاديا فإتجاه الباب كتجر فرجليها واصلا لأقصى مراحل اليأس..  فتحاتو و مع خرجات ضربات فيها واحد النسمة د لهوى باااردة هازا خصلات شعرها المنكوش ..

دورات عينيها فأرجاء لبورينة .. و هو يبان ليها العربي واقف مع العود ديالو كيحك ليه و يمشط ليه و معتاني بيه .. كان العود كيبان فرحااان بزاااف و كتحكك بالعربي و يلعب برجالاتو ..

و كأنو كيقول ليه ركبني و نخرجو من هنا .. ولكن العربي ما كانش عندو الخاطر لحتى حاجة .. الحزن كان باقي مسيطر عليه ..

دار لمصدر الصوت غا حس بشي حركة حداه و هي تبان ليه ختو .. شاف فيها و نطق : منانة .. اش مفيقك فهاد الوقت ..

منانة قربات لعندو اكثر : طابو جنابي بالنعاس ..

العربي حرك راسو و بقا ساكت و متردد يفتح معاها الموضوع ولكن فالأخير نطق :  اش خرجك من دار راجلك ..

منانة زفرات بجهد حاسا بالخنقة من هاد السيرة و نطقات : ياك مشيتي عندو و هضرتي معاه و غيكون قالك اش خرجني من دار راجلي ..

العربي شاف فيها ناطق بجدية  : ما ديريش فيها مضلومة داك الشي لي لقا عليك ما يبغيه لا ربي لا عبدو .. السحر ابنت با !! السحر !

منانة عضات باطن حنكها و نطقات : ماشي سحور هاداك قبول و محبة لمًا نفعو ما يضرو راه مو لي و خواتاتو لي داوني درت معاهم يدي حتى انا .. هادي كاع لعيالات دايرينو لرجالهم ..

العربي عقد حجبانو فيها و نطق : و مغنية !؟... تا هي معاكم ..

منانة حركات راسها بالنفي : لا هي بغاتك تبغيها بلا هادشي ...

تنهد العربي تنهيدة طويلة و ما ينكرش زادت كبرات فعينو اكثر حيت ترفعات على لخرايف :  المهم دابا لبكا ورا لميت خصارة .. نتي هانتي فدار باك معززة مكرة حتى توصلك براتك و ولدك غتشوفيه بلي خرج ليك القانون .. مادام حرارت العيشة بيناتكم ما كاين لاش يضلمك او تضلميه ..

كلامو الجدي و القاصح نوعا ما ، خلا الغصة توقف فحلقها و بقات غير كتشوف فيه بعينيها لي كان التعب و الحزن باين فيهم .. عطاتو بالضهر راجعا ادراجها و فالداخل ديالها كانت منهااارة .. تمنات لو فقط العربي عنقها و واساها و طبطب عليها .. و ما بحسسهاش بغلطها اكثر .. و يزادش يكمل عليها ..

رجعات لبيتها .. شادا عليها الباب و تكات عليه بالضهر منهاااارة كليا و ربي لي عالم لحالها .. نزلو دموعها حارين .. كلهم حسرة و ألم ..  هي السباب فهادشي كامل .. كون نهار لأول ما وافقاتش على ديك الخرجة و ديك الحفلة كون راها باقيا مستقرة فدارها تحت جناح واجلها .. ولكن اي حاجة وقعات الا و ربي كاتبها .. و المكتوب ما منو هروب ..

دار الوقت و بالضبط اسبوع آخر .. وصل العون القضائي.. لقدام باب دار بن عيسى .. بدا كيدق و يعاود .. تا كيسمع صوت العربي وراه ..

العربي جاي عاقد حجبانو : الشريف علامن كتسول ..

العون القضائي جبد واحد الورقة مدها ليه و نطق : بلا شك ما هو العربي بن عبد الله .. هادي ليك .. من محكمة الاسرة..

العربي شدها بين يديه مستغرب : شنو هادي ..

العون القضائي شدها من عندو كيقولها ليه عند بابو ما قاريش : هادي استدعاء وقيلا لمرا عندك رفعات عليك دعوة طلاق الشقاق ..

العربي غير سمع الطلاق و هي العافية تشعل فيه .. نتر ليه ديك الورقة من يديه بعنف و التشربينة بدات تحكمو : كيفاش الطلاق ..

#الرررررعد حد هنا .. المهم القضية غتشخض و دار القايد غتقلب سفاها على علاها هاد الليلة ..
🔥🔥

الا بغيتو التتمة وصلو هاد لبارت لأكثر من 200 تعليق و 30 ڤوط 🔥🔥